جيىنعا بارلىق وبلىستاردان جانە استانا, الماتى, شىمكەنت قالالارىنان اۆاريالىق-قۇتقارۋ قىزمەتتەرى مەن قۇرىلىمدارى كەلدى.
وقۋ-جاتتىعۋ شتابىنىڭ جەتەكشىسى, توتەنشە جاعدايلار جونىندەگى كوميتەت توراعاسىنىڭ ورىنباسارى مارات كۇلدىكوۆ ءوز سوزىندە كوكتەمگى سۋ تاسقىنى كەزەڭىندە توتەنشە جاعدايلاردى جويۋدىڭ, وڭىرارالىق ءىس-قيمىلداردى ۇيلەستىرۋدىڭ, ازاماتتىق قورعاۋ مەملەكەتتىك جۇيەسىن ءتيىمدى پايدالانۋدىڭ ماڭىزىن اتاپ كورسەتتى. وقۋ-جاتتىعۋدى باسقارۋ شتابى پەتروپاۆل قالاسىندا ورنالاسقان.
«كوكتەم-2019» رەسپۋبليكالىق كوماندالىق-شتابتىق وقۋ-جاتتىعۋ جيىنىنىڭ العاشقى كۇنى قۇتقارۋشىلار كاسىبي دايارلىقتارى بويىنشا سىنعا ءتۇستى. وقۋ-جاتتىعۋ وبلىس ورتالىعىنداعى ويقالا, زارەچنىي شاعىناۋداندارى مەن جۇمىسشى كەنتىندە وتكىزىلىپ, شارا بارىسىندا 233 قۇتقارۋشى مەن 46 ارنايى تەحنيكانىڭ توتەنشە جاعدايلار كەزىندەگى ازىرلىگى تەكسەرىلدى. ورتالىق جانە جەرگىلىكتى اتقارۋشى ورگانداردىڭ ءوزارا ءىس-قيمىلدارى ءجان اپاتتى جاعدايلار جونىندە جۇرتشىلىقتى دەر كەزىندە قۇلاقتاندىرۋ, قاۋىپسىز ايماقتارعا الىپ شىعۋ مۇمكىندىكتەرى سارالاندى. سۋ تاسقىنىنا قارسى ءىس-شارالاردا ونىڭ الدىن الۋ جولدارى الدەقايدا ءتيىمدى ەكەنى اتاپ كورسەتىلدى. قاردى جيناۋ جانە شىعارۋ, ارىقتاردى تازالاۋ, ينەرتتى ماتەريالدارمەن قامتاماسىز ەتۋ جاعدايى بارىنشا ەسكەرىلدى. ازاماتتىق قورعاۋ قۇرىلىمدارى كۇشتەرىنىڭ جانە حالىقتىڭ سۋ تاسقىنى كەزەڭىندە ءىس-قيمىلدارى بويىنشا ارنايى-تاكتيكالىق جاتتىعۋلار وتكىزۋ, سونداي-اق ازاماتتىق قورعاۋدىڭ مەملەكەتتىك جۇيەسىنىڭ اۋماقتىق جانە سالالىق كىشى جۇيەلەرىنىڭ قىزمەتىن دەر كەزىندە جوعارعى ازىرلىك رەجيمىنە كەلتىرۋ ماسەلەلەرىنە ەرەكشە ءمان بەرىلدى.
وقۋ-جاتتىعۋ جالعاسۋدا. قۇتقارۋشىلار مامليۋت اۋدانىندا ءوز ازىرلىكتەرىن پىسىقتايتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى