وتكەن اپتادا وبلىس كولەمىندە رەسپۋبليكالىق «مال ۇرىسى» جەدەل-پروفيلاكتيكالىق ءىس-شاراسى وتكىزىلدى. بۇل تۋرالى قىزىلوردا وبلىسى پوليتسيا دەپارتامەنتىنىڭ ءباسپاسوز قىزمەتى حابارلادى.
ءىس-شارا دەپارتامەنتتىڭ كريمينالدى پوليتسيا باسقارماسىنىڭ جەتەكشىلىگىمەن جۇرگىزىلسە, ءىس-شارانىڭ ماقساتى - مال ۇرلىعىن جاساۋعا قاتىسى بار ادامداردى انىقتاۋ, ولاردى ۇستاۋ جانە قىلمىستىق جاۋاپكەرشىلىككە تارتۋ.
ءىس-شارانىڭ 3 كۇنىندە 6 مال ۇرلىعى قىلمىسى تىركەلىپ, سونداي-اق, بۇرىن جاسالعان 7-ءى مال ۇرلىعى قىلمىسى اشىلدى. ءىس-شارا بارىسىندا جالاعاش اۋدانىندا 2018 جىلدىڭ اياعىنان جايىلىم مەن قورادان مال ۇرلىعى قىلمىستارىن جاساعان قىلمىستىق توپ قۇرىقتالدى.
مال ۇرلىقتارىن جاساپ, وڭاي پايدا تابۋ ماقساتىندا ولار تۇنگى مەزگىلدە باقتاشىسىز جايىلىمدا جۇرگەن مالداردى اتىس قارۋىمەن اتىپ الىپ, سويىلعان مال ەتتەرىن وبلىس ورتالىعىنداعى جەكە كاسىپكەرلەرگە ارزان باعامەن ساتىپ وتىرعان.
جالپى, وسى مەرزىمدە جابىرلەنۋشى 4 ازاماتتان ارىزدار ءتۇسىپ, ولاردان 3 جىلقى, 2 ءىرى قارا مالى ۇرلانعانى جانە ولارعا جالپى قۇنى 1,5 ملن تەڭگە شاماسىنداعى شىعىن كەلتىرگەنى انىقتالدى.
جەدەل ىزدەستىرۋ شارالارى بارىسىندا قۇرىقتالعان 22-31 جاس ارالىعىنداعى 6 ازاماتتىڭ جالاعاش اۋدانىنىڭ تۇرعىندارى ەكەنى انىقتالىپ, ولار ءوز قىلمىستارىن تولىعىمەن مويىنداعان.
سونىمەن قاتار ولاردىڭ تۇرعىن ۇيلەرىنە جۇرگىزىلگەن ءتىنتۋ بارىسىندا 12 جانە 16 كاليبرلى تەگىس ۇڭعىلى اڭشى مىلتىقتارى مەن مال ەتىن تاسىمالداعان اۆتوكولىك تاركىلەندى.
قىلمىسكەرلەر مال ۇرلىعى قىلمىسىنان بولەك زاڭسىز قارۋ ساقتاعانى ءۇشىن جاۋاپكەرشىلىككە تارتىلاتىن بولادى. ۇستالعاندارعا قاتىستى تەرگەۋ ارەكەتتەرى جۇرگىزىلۋدە جانە ولاردىڭ باسقا دا قىلمىسقا قاتىستىلىعى تەكسەرىلۋدە.