بۇگىن ۇكىمەت ۇيىندە پرەمەر-مينيستر اسقار مامين ۇكىمەتتىڭ جاڭا قۇرامداعى العاشقى ۇيىمداستىرۋ وتىرىسىن وتكىزدى. بۇل تۋرالى ۇكىمەتتىڭ ءباسپاسوز قىزمەتى حابارلادى.
پرەمەر-مينيستر ۇكىمەتتىڭ جاڭا قۇرامى مەملەكەت باسشىسىنىڭ جوعارى سەنىمىن اقتاۋى كەرەكتىگىن ايتتى.
«ۇكىمەتتىڭ جاڭا قۇرامى ايقىن ناتيجەلەرگە باعدار العان ناقتى ىستەر ۇكىمەتىنە اينالۋى ءتيىس», — دەدى اسقار مامين.
پرەزيدەنت ۇكىمەت الدىنا حالىقتىڭ تابىسى مەن تۇرمىس دەڭگەيىن ارتتىرۋ, ەكونوميكانى ودان ءارى ءارتاراپتاندىرۋ, ءتيىمدى جاڭا جۇمىس ورىندارىن قۇرۋ, شاعىن جانە ورتا بيزنەستى دامىتۋ بويىنشا ءبىرىنشى كەزەكتەگى مىندەتتەردى قويىپ وتىر.
«حالىقتىڭ تۇرمىس ساپاسىن جاقسارتۋعا ىقپال ەتەتىن ناقتى ناتيجەلەر الۋىمىز كەرەك», — دەدى پرەمەر-مينيستر.
ەرتەڭ «نۇر وتان» پارتياسىنىڭ سەزىندە حالىقتى الەۋمەتتىك قولداۋدى كۇشەيتۋ جانە ولاردىڭ تۇرمىس ساپاسىن ارتتىرۋ بويىنشا بىرقاتار جاڭا شارا جاريالاناتىنى اتالىپ ءوتتى. كەلەسى ۇكىمەت وتىرىسىندا پرەزيدەنتتىڭ سەزدە بەرگەن جاڭا تاپسىرمالارى قارالادى.
وتىرىستىڭ سوڭىندا «قازاقستان رەسپۋبليكاسىنىڭ ۇكىمەتى تۋرالى» كونستيتۋتسيالىق زاڭدى ورىنداۋ ءۇشىن ۇكىمەت قۇرامىنا العاش كىرگەندەردىڭ: ءبىلىم جانە عىلىم ءمينيسترى ك. ءشامشيدينوۆانىڭ, يندۋستريا جانە ينفراقۇرىلىمدىق دامۋ ءمينيسترى ر. سكلياردىڭ, ۇلتتىق ەكونوميكا ءمينيسترى ر. دالەنوۆتىڭ انت بەرۋ ءراسىمى ءوتتى.
ەسكە سالا كەتەيىك, مەملەكەت باسشىسىنىڭ جارلىقتارىمەن ۇكىمەتتىڭ جاڭا قۇرامى بەكىتىلدى:
پرەمەر-ءمينيستردىڭ ءبىرىنشى ورىنباسارى – قارجى ءمينيسترى — ءاليحان اسحان ۇلى سمايىلوۆ;
پرەمەر-ءمينيستردىڭ ورىنباسارى — گۇلشارا ناۋشاقىزى ابدىقالىقوۆا;
پرەمەر-ءمينيستردىڭ ورىنباسارى — جەڭىس ماحمۇد ۇلى قاسىمبەك;
ءبىلىم جانە عىلىم ءمينيسترى — كۇلاش نوعاتايقىزى ءشامشيدينوۆا;
ۇلتتىق ەكونوميكا ءمينيسترى — رۋسلان ەربولات ۇلى دالەنوۆ;
يندۋستريا جانە ينفراقۇرىلىمدىق دامۋ ءمينيسترى — رومان ۆاسيلەۆيچ سكليار;
اۋىل شارۋاشىلىعى ءمينيسترى — ساپارحان كەسىكباي ۇلى وماروۆ;
سىرتقى ىستەر ءمينيسترى — بەيبىت باكىر ۇلى اتامقۇلوۆ;
قورعانىس ءمينيسترى — نۇرلان بايۇزاق ۇلى ەرمەكباەۆ;
ىشكى ىستەر ءمينيسترى — ەرلان زامانبەك ۇلى تۇرعىمباەۆ;
ادىلەت ءمينيسترى — مارات باكىتجان ۇلى بەكەتاەۆ;
ەنەرگەتيكا ءمينيسترى — قانات الدابەرگەن ۇلى بوزىمباەۆ;
دەنساۋلىق ساقتاۋ ءمينيسترى — ەلجان امانتاي ۇلى ءبىرتانوۆ;
مادەنيەت جانە سپورت ءمينيسترى — ارىستانبەك مۇحامەدي ۇلى;
ەڭبەك جانە حالىقتى الەۋمەتتىك قورعاۋ ءمينيسترى — بەردىبەك ماشبەك ۇلى ساپارباەۆ.
بۇدان وزگە, قازاقستان رەسپۋبليكاسى پرەزيدەنتىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى جارلىعىنا سايكەس كەيبىر مەملەكەتتىك ورگاندار قايتا قۇرىلدى. قازاقستاننىڭ قورعانىس جانە اەروعارىش ونەركاسىبى مينيسترلىگى تسيفرلىق دامۋ, قورعانىس جانە اەروعارىش ونەركاسىبى مينيسترلىگى بولىپ قايتا قۇرىلدى. جاڭا مينيسترلىك اقپارات جانە كوممۋنيكاتسيالار مينيسترلىگىنىڭ بايلانىس, اقپاراتتاندىرۋ, «ەلەكتروندىق ۇكىمەت», مەملەكەتتىك قىزمەتتەر كورسەتۋ سالاسىنداعى مەملەكەتتىك ساياساتتى دامىتۋعا جاۋاپتى بولادى. جاڭا مينيسترلىككە اسقار قۋانىش ۇلى جۇماعاليەۆ باسشىلىق ەتەدى.