قازاقستان جاڭا ۇكىمەتىنىڭ العاشقى وتىرىسى ءوتتى. پرەمەر-مينيستر اسقار مامين جاڭا تاعايىندالعان مينيسترلەردى تانىستىردى.
جيىندا ءسوز سويلەگەن پرەمەر-مينيستر ا. مامين ۇكىمەتتىڭ جاڭا قۇرامىنا جۇكتەلىپ وتىرعان مىندەتتەردى تانىستىردى.
«مەملەكەت باسشىسى بىزگە ۇلكەن سەنىم ارتىپ وتىر. بۇل - ۇلكەن جاۋاپكەرشىلىك. سول سەنىمدى اقتاۋىمىز كەرەك. ۇكىمەتتىڭ جاڭا قۇرامى ناتيجەلەرگە باعدار العان ناقتى ىستەر ۇكىمەتىنە اينالۋى ءتيىس. مەملەكەت باسشىسى ەلىمىزدىڭ الەۋمەتتىك جانە ەكونوميكالىق دامۋىن جاڭا ساپالى دەڭگەيگە شىعارۋ, حالىقتىڭ تابىسى مەن تۇرمىسى دەڭگەيىن ارتتىرۋ, ءتيىمدى جاڭا جۇمىس ورىندارىن قۇرۋ, شاعىن جانە ورتا بيزنەستى دامىتۋ بويىنشا بىرنەشە مىندەتتەر جۇكتەپ وتىر. وسىنداي ناقتى شارالاردىڭ ناتيجەسىندە حالىقتىڭ ءال-اۋقاتىن جاقسارتا الامىز», دەدى پرەمەر-مينيستر.
سودان كەيىن ا.مامين ۇكىمەتتىڭ قۇرامىنا جاڭادان ەنگەن مينيسترلەردى انت بەرۋگە شاقىردى. اتاپ ايتار بولساق, ءبىلىم جانە عىلىم ءمينيسترى كۇلاش شامشيدينوۆا, يندۋستريا جانە ينفراقۇرىلىمدىق دامۋ ءمينيسترى رومان سكليار, اۋىل شارۋاشىلىعى ءمينيسترى ساپارحان وماروۆ, ۇلتتىق ەكونوميكا ءمينيسترى رۋسلان دالەنوۆ انت بەردى.