«ازىرەت-سۇلتان» مەملەكەتتىك تاريحي-مادەني قورىق-مۋزەيى تۋريزم سالاسىنداعى ىنتىماقتاستىقتى نىعايتۋ جانە بىرلەسە دامىتۋ ماقساتىندا بىرقاتار تۋريستىك ورتالىقتارمەن كەلىسىمگە كەلدى. بۇل تۋرالى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ءباسپاسوز قىزمەتى حابارلادى.
«ازىرەت-سۇلتان» مەملەكەتتىك تاريحي-مادەني قورىق-مۋزەي ديرەكتورى احمەتجانوۆ نۇربولات قادىر ۇلى, «Turkestan Tour» تۋريستىك اگەنتتىگىنىڭ ديرەكتورى يبراگيموۆا مەرۋەرت ابيلاياتقىزى جانە «تۇران-ساياحات» تۋريستىك فيرماسىنىڭ ديرەكتورى ۋسەنتاەۆ ماقسات فازىلبەك ۇلى مەموراندۋمعا قول قويىپ, تۇركىستان قالاسىنا كەلۋشى تۋريستەر سانىن ارتتىرۋ جانە ولارعا جاعداي جاساۋ بويىنشا كەلىستى.
- جىل باسىنان بەرى ەلىمىزدەگى كوپتەگەن تۋريستىك اگەنتتىكتەرمەن مەموراندۋم تۇزە وتىرىپ, تۇركىستان قالاسىن ناسيحاتتاۋ جانە دارىپتەۋ, كەلۋشىلەر سانىن ارتتىرۋ بويىنشا اۋقىمدى جۇمىستار قولعا الىنعان. وسى ورايدا, شەتەلدىك تۋريستىك ورتالىقتارمەن دە بايلانىس ورناتىلىپ, كەلىسسوزدەر جۇرۋدە. مەملەكەت باسشىسىنىڭ تۇركىستان قالاسىنا وبلىس ورتالىعى مارتەبەسىن بەرۋ تۋرالى شەشىمى تاريحي وقيعاعا اينالعانى بەلگىلى. ەلباسىنىڭ تۇركىستان وبلىسىنا ساپارى بارىسىندا «ازىرەت-سۇلتان» مۋزەي-قورىعىن يۋنەسكو-نىڭ بىرەگەي ەسكەرتكىشى رەتىندە قالپىنا كەلتىرۋ جوسپارى بەكىتىلدى. الداعى ۋاقىتتا, تۇركىستانعا كەلۋشىلەر كوپتەگەن تاريحي مالىمەتتەر مەن نىسانداردى كورەتىن بولادى. ولاردىڭ قاتارىندا كۇلتوبە قالاشىعى, حان ورداسى, حان مەشىتى جانە كونە تۇركىستان كوشەسى سىندا كوپتەگەن تاريحي ورىندار بار. سونىمەن قاتار, «ازىرەت سۇلتان» مەملەكەتتىك تاريحي-مادەني قورىق-مۋزەيىنە قاراستى 99 تاريحي-مادەني, رۋحاني ەسكەرتكىشتەر دە كەلۋشىلەر نازارىنا ۇسىنىلادى»,-دەدى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى احمەتجانوۆ نۇربولات قادىر ۇلى.
ايتا كەتسەك, «ازىرەت سۇلتان» قورىق-مۋزەيىنە قاراستى تاريحي ورىنداردى انىقتاۋ جانە قايتا جاڭارتۋ جۇمىستارىنا ارنالعان جوبالار ەجەلگى ريمدىك پومپەي قالاسىنىڭ مۋزەيى, وسمان يمپەرياسىنىڭ «توپكاپى» سارايى, يەرۋساليم قالاسى سياقتى الەم ەسكەرتكىشتەرىنىڭ تاجىريبەسىنە سۇيەنە وتىرىپ, ازىرلەندى. ولارعا جىل سايىن وسى ەلدەردىڭ ەكونوميكاسىنا ۇلكەن كىرىس اكەلەتىن ميلليونداعان تۋريستەر بارادى.
وسى ورايدا 2023 جىلعا قاراي تۇركىستانعا كەلەتىن تۋريستەردىڭ سانى 5 ملن اسا ادامدى قۇرايتىن بولادى, ولاردىڭ كەلۋ ۋاقىتى دا 3 ساعاتتان 4-5 كۇنگە دەيىن ۇلعايماق.
وسى رەتتە اتالعان كومپانيا باسشىلارى دا شەتەلدىك تۋريستەرمەن قارىم-قاتىناس جاساي وتىرىپ, تۇركىستان قالاسىنىڭ تاريحي-مادەني كەلبەتىن بىرلەسە تانىستىرۋعا كۇش سالۋعا ۋاعدالاستى.