الماتى وبلىسىنىڭ فەرمەرلەرى تۇقىم مەن تىڭايتقىشتاردى 20% ارزان ساتىپ الۋ مۇمكىندىگىنە يە بولدى. بۇل كۇندەرى اتالمىش وبلىستىڭ 200-دەن استام فەرمەرى ء«ىىى اۋىلشارۋاشىلىق جارمەڭكەسىنە» قاتىسىپ وتىر.
«اۋىلدىق ايماقتاردى دامىتۋ» باعدارلاماسى اياسىندا ۇيىمداستىرىلعان شارادا فەرمەرلەر تىڭايتقىشتاردى, وسىمدىكتەردى قورعاۋ قۇرالدارىن, وتاندىق جانە شەتەلدىك تۇقىمدار مەن اۋىل شارۋاشىلىعى ماتەريالدارىن ارزانداتىلعان باعامەن الۋعا مۇمكىندىك تۋدى. ءوز كەزەگىندە بۇل شارالار شارۋالارعا ءوز شىعىندارىن ەداۋىر قىسقارتۋعا مۇمكىندىك بەرەدى. جارمەڭكەگە الماتى وبلىسىنىڭ اۋىل شارۋاشىلىعى باسقارماسى, الماتى وبلىسىنىڭ «اتامەكەن» قر ۇلتتىق كاسىپكەرلەر پالاتاسى (ۇكپ), ەڭبەكشىقازاق اۋدانىنىڭ جانە شەلەك اۋىلدىق وكرۋگىنىڭ اكىمدىكتەرى رەسمي تۇردە قولداۋ كورسەتتى.
«ەلباسى قازان ايىنداعى جولداۋىندا اگروونەركاسىپتىك كەشەننىڭ الەۋەتىن تولىعىمەن ىسكە اسىرۋ قاجەت ەكەندىگىن اتاپ كورسەتكەن. پرەزيدەنت تاپسىرماسىنا سايكەس, بارلىق مەملەكەتتىك قولداۋ شارالارىن ەلگە زاماناۋي اگروتەحنولوگيالاردى اۋقىمدى تارتۋعا باعىتتاۋ قاجەت. ءوز كەزەگىندە وسى تەحنولوگيالار ءبىزدىڭ وبلىسقا دا جەتىپ وتىر. ەگىن القاپتارى تسيفرلىق نىسانعا كوشىرىلۋدە, جاردەم قاراجات بەرۋ ۇدەرىسى اۆتوماتتاندىرىلىپ, اۋىل كاسىپكەرلەرى شارۋاشىلىقتى جۇرگىزۋدىڭ جاڭا داعدىلارىنا وقىتىلۋدا. بۇگىنگى جارمەڭكە ءبىزدىڭ ايماقتىڭ اۋىلشارۋاشىلىق وندىرۋشىلەرى اراسىندا تاجىريبە جانە وزىق پراكتيكامەن الماسۋدىڭ تاعى ءبىر مۇمكىندىگى», – دەدى الماتى وبلىسىنىڭ اۋىل شارۋاشىلىعى باسقارماسى باسشىسىنىڭ ورىنباسارى كويۋمچان وماروۆ.
سونداي-اق الماتى وبلىسى اكىمدىگى مەن «اتامەكەن» ۇكپ وكىلدەرى فەرمەرلەرگە سۋبسيديانى قالاي الۋ كەرەكتىگىن جانە ولارعا مەملەكەتتىڭ قولداۋى قانداي پايدا اكەلەتىنىن ءتۇسىندىردى. اتاپ ايتقاندا, اعىمداعى جىلدىڭ 1 قاڭتارىنان باستاپ ساتىپ الۋ نورمالارى بويىنشا تاڭداۋلى تۇقىمدار مەن 1 رەپرودۋكتسيا تۇقىمدارىن سۋبسيديالاۋدى ەسكەرەتىن تۇقىم ءوسىرۋ شارۋاشىلىعىندا جاردەم قاراجات بەرۋدىڭ جاڭا ءتاسىمى ەنگىزىلگەن. بۇل رەتتە تۇقىمدار اۋىلشارۋاشىلىق ونىمدەرىن وندىرۋشىگە باستاپقى جارناسىز تولەمنىڭ كۇزگە دەيىن قالدىرىلۋىمەن بەرىلەدى, ال ولاردىڭ شىعىستارى وبلىس اكىمدىگىمەن 100%-عا وتەلەدى. كۇزدە, ەگىن جينالعاننان كەيىن, اۋىلشارۋاشىلىق ونىمدەرىن ءوندىرۋشى مامانداندىرىلعان ۇيىمعا نورما بويىنشا تاڭداۋلى تۇقىمدار نەمەسە 1 رەپرودۋكتسيا تۇقىمدار قۇنىنىڭ 30%-ىن قايتارادى.
«بيىلعى جارمەڭكەگە وتكەن جىلعا قاراعاندا ەكى ەسە كوپ فەرمەر قاتىستى. بۇل دا بولسا, الداعى كوكتەمگى ەگىس ماۋسىمىن جوسپارلاۋ الاڭى رەتىندە ءوزىن تانىتقان ءىس-شارانىڭ تانىمالدىلىعى ارتىپ كەلە جاتقاندىعىن كورسەتەدى. جارمەڭكەنىڭ ارقاسىندا فەرمەرلەر كەرەكتى ونىمدەرىن جەتكىزۋشىلەردەن تىكەلەي الاتىن بولدى. ال بۇل ولاردىڭ شىعىندارىن ايتارلىقتاي ازايتادى. ەندى ولار جىل بويى شەلەك اۋىلىنداعى اگروبيزنەس ورتالىعى بازاسىندا اشىلعان «اگرودۇكەننەن» بارلىق قاجەتتى تاۋارلارىن ەڭ تومەن باعامەن ساتىپ الا الادى. ول ءبىزدىڭ باعدارلاما شەڭبەرىندە بيزنەستىڭ قولداۋى ارقاسىندا اشىلدى. جانە ءبىز اۋىلىمىزداعى ءومىردى جاقسارتۋعا جاردەمدەسىپ, فەرمەرلەرىمىزدىڭ دامۋىنا ۇدايى مۇمكىندىكتەر تۋعىزىپ وتىرعان, ياعني وسى جوبانى ىسكە اسىراتىن «فيليپ مورريس قازاقستان» كومپانياسىنا وتە ريزامىز», – دەيدى ەڭبەكشىقازاق اۋداندىق جەرگىلىكتى قاۋىمداستىقتار قورىنىڭ ديرەكتورى باقىتگۇل ەلشىباەۆا.
ايناش ەسالي,
«Egemen Qazaqstan»
الماتى