ەلشىلەر ينستيتۋتى قازاقستانعا وتاندىق جۇلدىزداردىڭ جانكۇيەرلەرىن تارتۋعا جول اشادى

Kazakh Tourism ۇكىمەت تاپسىرماسى بويىنشا وتكەن جىلى ەلدىك تۋريستىك برەندتى ازىرلەۋگە كىرىستى. ونىڭ ايتۋىنشا, برەند ازىرلەۋ مەن مەملەكەتتىك باعدارلامانى قابىلداۋ ۇزاققا سوزىلاتىن ۇدەرىس ەكەنىن تۇسىنە وتىرىپ, باق پەن ينتەرنەتتە قازاقستاندىق تۋريزم تۋرالى كونتەنتتى ۇلعايتۋعا باسا كوڭىل ءبولۋ تۋرالى شەشىم قابىلداندى.

«ەڭ الدىمەن, ءبىز قازاقستان تۋرالى اقپاراتتىڭ الەۋمەتتىك جەلىلەردە كوپ بولۋىنا قاتىستى جۇمىستار جۇرگىزە باستادىق. وتكەن جىلى قىتايدىڭ جازىلۋشىلار سانى 100 ملن-نان اساتىن تانىمال بلوگەرلەرىنىڭ ەلىمىزگە كەلۋىن ۇيىمداستىردىق. بلوگەرلەر استانانىڭ, ششۋچينسك-بۋراباي شيپاجاي ايماعىنىڭ, الماتى مەن الماتى وبلىسىنىڭ, شىعىس قازاقستان مەن تۇركىستان وبلىستارىنىڭ تۋريستىك نىساندارىن ارالادى. بۇگىندە ولاردىڭ جاريالانىمدارىنىڭ قامتىلۋ دەڭگەيى 150 ملن-نان استام قىتايلىق وقىرمانداردى قۇرايدى جانە ولاردىڭ سانى كۇن سايىن وسۋدە» دەدى ر. كۇزەمباەۆ.

سونىمەن قاتار, قازاقستان ءتۋريزمىنىڭ ەلشىلەر ينستيتۋتىن قالىپتاستىرۋ جۇمىستارى باستالدى: العاشقى ەلشى رەتىندە تانىمال قازاقستاندىق ءانشى ديماش قۇدايبەرگەن تاڭدالدى.

«ديماشتىڭ قىتايلىق جانكۇيەرلەر مەن وڭتۇستىك-شىعىس ازيا مەن ەۋروپانىڭ كەيبىر ەلدەرىندەگى مۋزىكا سۇيەر قاۋىم اراسىنداعى ەرەكشە تانىمالدىعىن نازارعا الا وتىرىپ, 10 ەلدەن جانكۇيەرلەر قوزعالىستارىنىڭ كوشباسشىلارىنىڭ قاتىسۋىمەن «ديماشتىڭ وتانى» اتتى پرومو-تۋر وتكىزدىك, وعان قاتىسۋشىلار قازاقستاننىڭ 3 قالاسىندا بولدى. اتالعان قوزعالىستاردا جالپى 5 ملن-نان استام ادام بار. ءانشىنىڭ جانكۇيەرلەرىنىڭ ۇلكەن قىزىعۋشىلىعىن بايقادىق. جاقىن ارادا ديماش قازاقستاندا ەكى كونتسەرت وتكىزەدى, وعان ونىڭ فاناتتارى كەلەتىنى ءسوزسىز جانە دە «ديماشتىڭ وتانى» تۋرى اياسىندا تۋريستەر قازاقستان قالالارىن ارالاي الادى. وسىلايشا, وتاندىق ءتۋريزمنىڭ دامۋىنا ءوز ۇلەستەرىن قوسادى» دەدى ول.

ر. كۇزەمباەۆتىڭ ايتۋىنشا, كەلەسى ەلشىلەر تانىمال عارىشكەرلەر تالعات مۇساباەۆ, اناتولي ارتسەبارسكي, يۋري مالەنچەنكو جانە يۋري باتۋرين بولماق. كەڭەس ۋاقىتىندا الاكول كولىندە عارىشقا ۇشىپ كەلگەننەن كەيىن ۇشقىش-عارىشكەرلەردى مەديتسينالىق وڭالتۋ كەزەڭدەرىنىڭ ءبىرى وتكىزىلدى. سوندىقتان دا, ولار وسى ءداستۇردى جاڭعىرتۋ ءۇشىن كۋرورتتىق ايماققا شاقىرىلدى.

تسيفرلىق ماركەتينگپەن قاتار, ءداستۇرلى تاسىلدەر بويىنشا دا جۇمىستار اتقارىلىپ جاتىر. 2018 جىلى Kazakh Tourism-ءنىڭ ۇيىمداستىرۋىمەن بەرليندە, ماسكەۋدە, بەيجىڭدە, گونكونگتا جانە بىرقاتار باسقا دا قالالاردا وتكەن 7 حالىقارالىق كورمەگە قازاقستاندىق تۋربيزنەس قاتىستى.

«ەتنيكالىق ەرەكشەلىك ارقىلى كەلۋشىلەردىڭ قىزىعۋشىلىعىن وياتا الدىق. وعان بويلارى 2 مەتردەن جوعارى قازاق باتىرلارى, مۋزىكانتتار, قولونەرشىلەر تارتىلدى, اسىقتاردان كادەسىيلار جيىنتىعى ازىرلەندى. ستەندتى باتىرلارمەن, ۇلتتىق اسحانا بويىنشا شەبەرلىك-سىنىپتارىمەن, ۇلتتىق مۋزىكا مەن بيلەرمەن ەتنيكالىق تۇردە تولتىرۋ ەرەكشە اسەر قالدىردى» دەدى ر. كۇزەمباەۆ.

بۇدان وزگە, ەلوردانىڭ 20 جىلدىعىن مەرەكەلەۋ اياسىندا قازاقستاننىڭ بارلىق دەرلىك جەرىن قامتىعان 6 باعدار بويىنشا, سونداي-اق 20 تاۋ شىڭىنا ەكسپەديتسيالار ۇيىمداستىرىلدى. ەكسپەديتسيا قورىتىندىسى بويىنشا جالپى قامتۋ شامامەن 1,5 ملن ادامدى قۇرادى.