سەمينار كونفەرەنتسيانىڭ نەگىزى تاقىرىبى: «گازدار مەن سۇيىقتىقتاردى تاسىمالدايتىن جابدىقتار سالاسىنداعى سوڭعى جەتىستىكتەر» دەپ اتالدى.
زاۋىتتىڭ قوعاممەن بايلانىس جاساۋ ءبولىمىنىڭ مالىمەتىنشە, ءىس-شاراعا ماسكەۋ, ۆولگوگراد, پەنزا, كازان قالالارى, ۆيلنيۋس ليتۆا ەلىنەن وكىلدەر كەلدى.
ياعني, كاسىپورىنعا قۇرال-جابدىقتار جەتكىزۋشى كومپانيالاردىڭ باسشىلارى جانە مۇناي-گاز سالاسىنا ارنالعان تەحنولوگيالىق جابدىقتاردى وندىرۋشىلەر بولدى.
ولاردىڭ جوبالارى عىلىمي-وندىرىستىك جانە وندىرىستىك-تەحنيكالىق بازالارى, نوۋ-حاۋ, پاتەنتتەرى, كوپجىلدىق تابىستى قىزمەتى, وكىلدىكتەرى كوپ, قىزمەت كورسەتۋ ورتالىقتارىنىڭ اۋقىمدى گەوگرافياسى, الەمدەگى كليەنتتەر جانە سەنىمدى سەرىكتەستەرى بار كاسىپورىنداردى تاڭداۋعا باعىتتالعان.
جيىنعا جەرگىلىكتى عالىمدار, ومبى مەملەكەتتىك تەحنيكالىق ۋنيۆەرسيتەتىنىڭ عىلىمي-ءبىلىم بەرۋ رەسۋرستىق ورتالىعىنىڭ وقىتۋشىلارى شاقىرىلدى.
سونىمەن بىرگە, تەحنيكالىق ماماندار-جەتەكشى ينجەنەرلەر, تەحنولوگتار قاتىسىپ, ءوز ويلارىن ورتاعا سالدى.
جالپى, كاسىپورىندا «گازدار مەن سۇيىقتىقتاردى تاسىمالدايتىن جابدىقتار سالاسىنداعى سوڭعى جەتىستىكتەر» اتتى سەمينار وتكىزۋدەگى ماقسات-ءوندىرىستى ەكونوميكالىق تۇرعىدان جەتىلدىرۋ.
ياعني, كاسىپورىنداعى قۇرال-جابدىقتاردى كۇردەلى جوندەۋدەن وتكىزۋدى ازايتۋ جانە توقتاپ تۇرۋىن نولگە دەيىن ازايتۋ.
سوندىقتان, قازىرگى زامانعى سەنىمدى, قاۋىپسىز جاڭا قۇرىلعىلاردى وندىرىسكە ەنگىزۋ قاجەت.
زاۋىتتىڭ مەحانيك, كومپرەسسورلىق قوندىرعىلار ماشينيستەرى, تەحنولوگيالىق سورعىلار ماشينيستەرى ماماندارىنىڭ بىلىكتىلىكتەرىن كوتەرۋ.
سونىمەن بىرگە, جاڭا تەحنولوگيالاردى وندىرىسكە ەنگىزۋدە وتاندىق, رەسەيلىك جانە ەۋروپا كاسىپورىندارىنىڭ مۇناي-حيميا سالاسىنا قاجەتتى قۇرال جابدىقتاردى ءوندىرۋ, پايدالانۋداعى وزىق ۇلگىلەرىن كورسەتۋگە باعىتتالدى.
بۇل كۇندەرى «پاۆلودار مۇناي-حيميا زاۋىتى» جشس-ءنىڭ جوبالىق قۋاتى-جىلىنا 6 ميلليون توننا مۇناي وڭدەۋ.
مۇنايدى العاشقى وڭدەۋ بويىنشا نەگىزگى تەحنولوگيالىق پروتسەسس لك-6ۋ–قۇراما قوندىرعىسىندا جۇرگىزىلەدى.
ءونىمنىڭ ساپاسىن باقىلاۋ- زاماناۋي جابدىقتاردا جۇرگىزىلەدى.
زاۋىتتا جوعارى بىلىكتى ماماندار جۇمىس ىستەيدى.
ولار مۇناي ونىمدەرىن وڭدەۋدىڭ الەمدىك تاجىريبەسىندە قابىلدانعان ستاندارتتارعا سايكەس شىعارىلاتىن ءونىم ساپاسىن باقىلاي الادى.
فاريدا بىقاي,
«ەگەمەن قازاقستان»
پاۆلودار