ل.تولستوي اتىنداعى وبلىستىق امبەباپ كىتاپحاناسىندا جاستار جىلىنا ارنالىپ «قۋاتتى ەلدىڭ جاستارى» دەگەن اتپەن اشىلعان كىتاپ كورمەسى جىل اياعىنا دەيىن جۇمىس ىستەيدى. كىتاپ كورمەسىنىڭ نەگىزگى بولىمدەرى كەلۋشىلەرگە ەلباسى ن.نازارباەۆتىڭ قازاقستاندىق تالانتتى جاستار مەن جاس ماماندارعا جان-جاقتى قولداۋ كورسەتۋگە باعىتتالعان ساياساتىنان مول اقپاراتتار بەرەدى. كورمەنىڭ اشىلۋ سالتاناتىنا كىتاپحانا وقىرماندارىمەن قاتار قر ۇلتتىق ۇلانى №6697 اسكەري ءبولىمىنىڭ ساربازدارى قاتىستى.
كوركەم بەزەندىرىلگەن, 100-گە جۋىق كىتاپ جانە مەرزىمدى باسىلىمدار قويىلعان كورمە كىتاپحاناعا كەلۋشىلەردىڭ نازارىن اۋدارادى.
ء«بىزدىڭ كىتاپحانا قىزمەتكەرلەرى ۇيىمداستىرعان كورمە جاستار جىلىنا ارنالعان شارالاردىڭ باستالۋى بولدى دەپ ويلايمىن. جاستار جىلىنا ارناعان جوسپارىمىز بار, ول بويىنشا جىل بويى جۇمىستار اتقارىلادى. بۇل كورمەدەن كەلۋشىلەر جاستار جىلىنىڭ باستالۋىنا بايلانىستى بارلىق قۇجاتتاردى, وبلىستا, رەسپۋبليكادا اتقارىلعان جۇمىستاردى, جاستار جەتىستىكتەرىن ءبىلىپ وتىراتىن بولادى. سەبەبى, كورمەنى ءبىز ماتەريالدارمەن تولىقتىرىپ وتىرامىز» دەيدى ل.تولستوي اتىنداعى وبلىستىق امبەباپ-عىلىمي كىتاپحاناسى امبەباپ وقۋ زالىنىڭ مەڭگەرۋشىسى ايگۇل ميناسوۆا.
«قۋاتتى ەلدىڭ جاستارى» كىتاپ كورمەسى جىل بويى جۇمىس ىستەيدى. كىتاپحانا قىزمەتكەرلەرىنىڭ ايتۋىنشا, كورمە وقىتۋشىلار, عىلىمي قىزمەتكەرلەر, ستۋدەنتتەر, سونداي-اق, جالپى ەلىمىزدەگى جانە الەمدەگى جاستارعا قاتىستى وزەكتى ماسەلەلەر, ولاردىڭ جەتىستىكتەرى تۋرالى بىلگىسى كەلەتىن جالپى وقىرمان ءۇشىن دە قىزىقتى بولماق.
ءنازيرا جارىمبەت,
«ەگەمەن قازاقستان»
قوستاناي