كوركەم گيمناستيكادان قازاقستان كومانداسىنىڭ باس باپكەرى ءاليا يۋسۋپوۆا Olympic.kz سايتىنا سۇحبات بەرىپ, سپورتشىلاردىڭ جاڭا ماۋسىمداعى اياق الىسىن باعامدادى. باس باپكەردىڭ ايتۋىنشا, گيمناستارىمىز ءۇشىن جىل باسىنداعى تۋرنيرلەر جامان باستالعان جوق.
- ەرەسەكتەر مەن جاسوسپىرىمدەر ءۇشىن بيىلعى ماۋسىمداعى العاشقى رەسمي جارىستار باستالدى. ۇلتتىق قۇراما ۇزدىگى الينا ءادىلحانوۆا ماسكەۋدە وتكەن ءىرى تۋرنير – گران-پري باسەكەسىندە باق سىنادى. ءيا, الينا ءۇشىن جارىس قيىنداۋ ءوتتى. ويتكەنى, ول سىرقاتتانىپ قالۋىنا بايلانىستى استاناداعى سىنعا قاتىسپاعان بولاتىن. سول سەبەپتى, ماسكەۋدەگى تۋرنيردە ول تولىعىمەن بابىندا بولعان جوق.
جالپى, جالعىز ءادىلحانوۆا عانا ەمەس, كومانداداعى بارلىق سپورتشىلار ءالى بابىندا ەمەس. جىلدىڭ باسى بولعاندىقتان, سپورتتىق فورماعا ەنۋگە ءالى ءبىراز ۋاقىت قاجەت. ءبىزدىڭ بيىلعى ماۋسىمداعى باستى ماقساتىمىز – قىركۇيەكتە وتەتىن ليتسەنزيالىق الەم چەمپيوناتى مەن ماۋسىم ايىندا تايلاندتا جالاۋى جەلبىرەيتىن ازيا بىرىنشىلىگىندە ءساتتى ونەر كورسەتۋ. اتالعان تۋرنيرلەرگە دەيىن گيمناستارىمىز ءالى ىسىلاتىنى انىق.
قازىر سپورتشىلارعا قويىلعان نەگىزگى تالاپ – جاڭا باعدارلامانى تولىعىمەن مەڭگەرىپ, تۇراقتى تۇردە ونەر كورسەتۋ. بيىل ءبىزدىڭ سپورتتا ازداعان وزگەرىستەر بار. ناقتىلاپ ايتار بولسام, جاتتىعۋ قۇرالدارىمەن جۇمىس ىستەۋ بۇرىنعىدان دا قيىنداي ءتۇستى. ەگەر بيىلعى تۋرنيرلەردى كورگەن بولساڭىزدار, مۇنى بىردەن بايقاۋعا بولادى. وتكەن جىلعىمەن سالىستىرعاندا جاتتىعۋ الدەقايدا اۋىرلاعان.
سول سەبەپتى, الينا باستاعان گيمناستارىمىز ازداپ قاتەلىككە بوي الدىرۋدا. دەگەنمەن, تاعى دا قايتالاپ ايتامىن, بۇل جىلدىڭ باسى. ۋاقىت وتە كەلە بۇل كەمشىلىكتەردى جويامىز. ءبىر اپتادان سوڭ ءادىلحانوۆا يسپانيادا وتەتىن گران-پري كەزەڭىنە قاتىسادى. بارشاڭىزدى سپورتشىلارىمىزعا جانكۇيەر بولۋعا شاقىرامىن, - دەدى ءاليا يۋسۋپوۆا.
ەسكە سالا كەتەيىك, الينا ءادىلحانوۆا ماسكەۋدەگى گران-پري كەزەڭىندە كوپسايىس قورىتىندىسى بويىنشا 19-شى ورىن يەلەندى.