بۇگىن «بجزق» اق سالىمشىلار مەن الۋشىلارعا اقپارات بەرۋ جونىندەگى اتقارىلعان جۇمىستار تۋرالى حابارلادى.
بىرىڭعاي جيناقتاۋشى زەينەتاقى قورىنىڭ سالىمشىلارى مەن الۋشىلارى جەكە زەينەتاقى شوتىنان ءۇزىندى كوشىرمەنى كەز كەلگەن ۋاقىتتا (ەلەكتروندىق تاسىلمەن) تەگىن الۋعا قۇقىلى. بۇل زاڭ جۇزىندە بەكىتىلگەن.
العاشقى جىلدارى سالىمشىلار مەن الۋشىلاردىڭ كوپشىلىگى زەينەتاقىمەن قامسىزداندىرۋ تۋرالى شارت جاساسۋ بارىسىندا شوتتان انىقتاما الۋ ءتاسىلى رەتىندە پوشتا بايلانىسىن تاڭداعان بولاتىن. بۇل رەتتە زەينەتاقى شوتىنان ءۇزىندى كوشىرمە سالىمشىلار مەن الۋشىلارعا جىلىنا ءبىر رەت جىبەرىلەدى. ال پوشتالىق مەكەنجاي وزگەرگەن جاعدايدا, بۇل تۋرالى قورعا مىندەتتى تۇردە حابارلاۋ قاجەت. ەگەر حابار بەرىلمەسە, بجزق بۇدان كەيىن زەينەتاقى جيناقتارى تۋرالى انىقتامانى جىبەرمەۋگە قۇقىلى. سونىمەن قاتار شوتتارىندا اقشا جوق سالىمشىلار مەن الۋشىلارعا ءۇزىندى كوشىرمە جىبەرىلمەيدى.
بۇگىنگى تاڭدا زەينەتاقى جيناقتارىنىڭ جاي-كۇيى تۋرالى انىقتامانى مىناداي تاسىلدەرمەن الۋعا بولادى:
بجزق-عا تىكەلەي كەلىپ ءوتىنىش بەرۋ; ەلەكتروندىق ءتاسىل, ونىڭ ىشىندە:– ءۇزىندى كوشىرمە بجزق-عا ۇسىنىلعان ەلەكتروندىق مەكەن-جايعا جىبەرىلەدى. سالىمشى, ياكي الۋشى تاڭداپ الىنعان كەستەگە سايكەس زەينەتاقى شوتىنان ءۇزىندى كوشىرمەنى: اي سايىن, ءۇش اي سايىن, جارتى جىلدا ءبىر رەت نەمەسە جىل سايىن الادى;
– لوگين مەن پارول (قۇپيا ءسوز) نەمەسە ەلەكتروندىق تسيفرلىق قولتاڭبانىڭ كومەگىمەن, قور سايتىنىڭ جەكە كابينەتى ارقىلى;
– ەلەكتروندىق ۇكىمەت پورتالىنىڭ جەكە كابينەتى نەمەسە ءبىر رەتتىك sms-پارول ارقىلى, مۇندا sms-پارول mGov ءموبيلدى ازاماتتار بازاسىندا تىركەلگەن سالىمشىلار مەن الۋشىلاردىڭ ۇيالى تەلەفونىنا جىبەرىلەدى;
ءداستۇرلى پوشتا بايلانىسى ارقىلى.اقپارات الۋ ءتاسىلىن تاڭداۋ ءۇشىن سالىمشى (الۋشى) جەكە باسىن كۋالاندىراتىن قۇجاتپەن بجزق كەڭسەسىنە كەلەدى. ەلەكتروندىق تسيفرلىق قولتاڭبا بولعان جاعدايدا, اقپارات الۋ ءتاسىلىن قور سايتىنىڭ جەكە كابينەتىندە تاڭداۋعا نەمەسە وزگەرتۋگە بولادى.
جەكە زەينەتاقى شوتىنىڭ جاي-كۇيى تۋرالى انىقتامانى ەلەكتروندىق پوشتا ارقىلى الۋ ءتاسىلىن 800 مىڭنان استام سالىمشى (الۋشى) تاڭداعان. 2018 جىلى ولارعا شامامەن 5,6 ملن حابارلاما جىبەرىلگەن.
2019 جىلدىڭ 1 قاڭتارىنا قاراي 5,2 ملن ادام زەينەتاقى شوتىنىڭ جاي-كۇيى تۋرالى انىقتامانى قوردىڭ enpf.kz سايتىنىڭ جەكە كابينەتى ارقىلى الۋ مۇمكىندىگىنە يە.
ءبىر جىل ىشىندە ينتەرنەت-حابارلاندىرۋ ءتاسىلىن تاڭداعاندار سانى 1,2 ملن جۋىق ادامعا كوبەيدى. بۇل ءتاسىل شىنىندا دا وتە ىڭعايلى: زەينەتاقى شوتىنىڭ جاي-كۇيى تۋرالى انىقتامانى كەز كەلگەن جەردە اپتاسىنا 7 كۇن, تاۋلىگىنە 24 ساعات بويى جەدەل تۇردە الىپ تۇرۋعا بولادى.
2019 جىلدىڭ قاڭتار-اقپان ايلارىندا قور 2019 جىلدىڭ 1 قاڭتارىنا قاراي زەينەتاقى جيناقتارىنىڭ جاي-كۇيى تۋرالى 1 ميلليونعا جۋىق انىقتامانى سالىمشىلار مەن الۋشىلارعا جىبەرۋ شاراسىن جۇزەگە اسىردى. ياعني, بجزق جىل باسىنان بەرى 2018 جىلدىڭ قورىتىندىسى بويىنشا سالىمشىلارعا (الۋشىلارعا) اقپارات بەرۋ شاراسىن جۇرگىزىپ جاتىر.
ايتا كەتەلىك, ءۇزىندى كوشىرمەنى قور كەڭسەسىنە كەلىپ الۋ ءتاسىلىن 1,8 ملن استام ادام تاڭداعان.
ايناش ەسالي,
«ەگەمەن قازاقستان»
الماتى