قالا بيلىگى تۇرعىن ءۇي ماسەلەسىن شەشۋ ءۇشىن پارمەندى شارالاردى قولدانادى, دەپ حابارلايدى ەلوردا اكىمدىگىنىڭ رەسمي سايتى.
قالالىق قۇرىلىس جانە تۇرعىن ءۇي ساياساتى باسقارماسىنىڭ باسشىسى رۋسلان احمەتوۆ اكىمدىك وتىرىسىندا «نۇرلى جەر» جانە «نۇرلى جول» مەملەكەتتىك باعدارلامالارىن جۇزەگە اسىرۋ بارىسى تۋرالى ايتتى. رۋسلان احمەتوۆتىڭ حابارلاۋىنشا, استانادا اتالمىش مەملەكەتتىك باعدارلاما اياسىندا باسقارما ءبىلىم بەرۋ, تۇرعىن ءۇي قۇرىلىسى جانە ينجەنەرلىك-كوممۋنيكاتسيالىق ينفراقۇرىلىمدى دامىتۋ سالاسىنداعى ينۆەستجوبالاردى جۇزەگە اسىردى.
«نۇرلى جول» ينفراقۇرىلىمدىق دامۋ مەملەكەتتىك باعدارلاماسىن جۇزەگە اسىرۋ اياسىندا 2015-2017 جىلدار ارالىعىندا ۇلتتىق قوردان نىسانالى ترانسفەرتتەر ەسەبىنەن ينۆەستيتسيالىق جوبالاردى سالۋعا 9 ملرد تەڭگە, ونىڭ ىشىندە تۇرعىن ءۇي قۇرىلىسىنا 634 ملن تەڭگە (قوسىمشا قارجىلاندىرۋ), ءبىلىم بەرۋ سالاسىنا 3,5 ملرد تەڭگە, ينجەنەرلىك-كوممۋنيكاتسيالىق ينفراقۇرىلىم قۇرىلىسىنا 4,8 ملرد تەڭگە ءبولىندى. قازىرگى ۋاقىتتا مەملەكەتتىك باعدارلامانى ىسكە اسىرۋ اياقتالدى», – دەدى ۆەدومستۆو باسشىسى.
سونىمەن قاتار, قالانى دامىتۋدىڭ كەشەندى جوسپارىنا سايكەس «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسىن ىسكە اسىرۋ اياسىندا تۇرعىن ۇيلەردىڭ قۇرىلىسى جالعاستىرىلماق. وسى ماقساتتارعا ەسەپتى كەزەڭدە 34 ملرد تەڭگە كولەمىندە مەملەكەتتىك ينۆەستيتسيا باعىتتالدى. اعىمداعى جىلى 1 261 پاتەرگە ارنالعان جالپى اۋدانى 90,8 مىڭ شارشى مەتر جالعا بەرىلەتىن تۇرعىن ءۇي قۇرىلىسى جالعاستىرىلدى, 2019 جىلى اۋماعى 59,1 مىڭ شارشى مەتر بولاتىن 731 پاتەر پايدالانۋعا بەرىلەدى. سونىمەن قاتار, اعىمداعى جىلى جوسپارلى كورسەتكىشتەرگە سايكەس جالپى اۋدانى 15,5 مىڭ شارشى مەتر 188 پاتەرلىك تۇرعىن ءۇي قۇرىلىسىن باستاۋ جوسپارلانعان.
«كرەديتتىك تۇرعىن ءۇي قۇرىلىسى» باعىتى بويىنشا «بايتەرەك دەۆەلوپمەنت» اق-نان قاراجاتتى قارىزعا الۋ بويىنشا اكىمدىك وبليگاتسيالارىن شىعارۋ ارقىلى تۇرعىن ءۇي قۇرىلىسى جۇزەگە اسىرىلۋدا. وسى باعىت بويىنشا باعدارلامانى ىسكە اسىرۋ باستالعاننان بەرى بۇگىنگى تاڭدا جالپى اۋدانى 103 مىڭ شارشى مەتر بولاتىن 1 351 پاتەر پايدالانۋعا بەرىلدى.
«اعىمداعى جىلدىڭ بەكىتىلگەن جوسپارلارىنا سايكەس وسى باعىت بويىنشا ءبىز 1 575 پاتەرلىك 138,4 مىڭ شارشى مەتر تۇرعىن ءۇي قۇرىلىسىن جالعاستىردىق. اعىمداعى جىلدىڭ سوڭىنا دەيىن 653 پاتەرلىك 57,7 مىڭ شارشى مەتر تۇرعىن ءۇي پايدالانۋعا بەرىلەدى», – دەپ اتاپ ءوتتى ر. احمەتوۆ.
اعىمداعى جىلى جەتكىزىلگەن ليميتتەر شەڭبەرىندە جالپى اۋدانى 32,1 مىڭ شارشى مەتردى قۇرايتىن 392 پاتەرلى نەسيەلىك تۇرعىن ءۇي قۇرىلىسى باستالادى. سونىمەن قاتار, 10,6 گا جەر ۋچاسكەلەرى بويىنشا باعدارلامانى ودان ءارى ىسكە اسىرۋ ماقساتىندا جەرگىلىكتى بيۋدجەت قاراجاتى ەسەبىنەن جالپى كولەمى 120 مىڭ شارشى مەتر بولاتىن 1 688 پاتەرلىك بەس كوپپاتەرلى تۇرعىن ءۇي كەشەنىن جوبالاۋ باستالدى.
«تۇرعىن ءۇي قۇرىلىسىنىڭ قارقىنىن ساقتاۋ ءۇشىن ءبىز مەملەكەتتىك ينۆەستيتسيا ەسەبىنەن باعدارلاما اياسىندا جۇزەگە اسىرىلاتىن تۇرعىن ءۇي قۇرىلىسى اۋداندارىن ينجەنەرلىك-كوممۋنيكاتسيالىق ينفراقۇرىلىممەن قامتاماسىز ەتەمىز», – دەپ اتاپ ءوتتى قالالىق قۇرىلىس جانە تۇرعىن ءۇي ساياساتى باسقارماسىنىڭ باسشىسى.