بۇرىنعى دەنساۋلىق ساقتاۋ ۆيتسە-ءمينيسترى الەكسەي تسوي قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعىنىڭ باسشىسى بولىپ تاعايىندالدى.
الەكسەي تسوي 1977 جىلى 2 ساۋىردە شىمكەنت قالاسىندا دۇنيەگە كەلگەن.
Sels College (لوندون), قازاق مەملەكەتتىك مەديتسينا اكادەمياسىنىڭ اسپەرانتۋراسىن, وڭتۇستىك قازاقستان مەملەكەتتىك مەديتسينا اكادەمياسىن, «دانەكەر» حالىقارالىق قۇقىق جانە حالىقارالىق بيزنەس ينستيتۋتىن, رەسەي فەدەراتسياسى پرەزيدەنتىنىڭ جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ كورپوراتيۆتىك باسقارۋ جوعارى مەكتەبىن جانە حالىقارالىق بيزنەس اكادەمياسىن بىتىرگەن. ەڭبەك جولىن حيرۋرگ-ەندوسكوپيست رەتىندە باستاعان.
2007-2010 جىلدارى قازاقستان رەسپۋبليكاسى پرەزيدەنتىنىڭ ءىس باسقارماسىنىڭ زاماناۋي مەديتسينالىق تەحنولوگيالاردى ەنگىزۋ ورتالىعىنىڭ باسشىسى بولعان. 2010-2011 جىلدارى قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعىنىڭ باستىعى قىزمەتىن اتقارعان. 2011-2014 جىلدارى استانا قالاسىنداعى №1 قالالىق اۋرۋحاناسىنىڭ باس دارىگەرى بولعان. 2014 جىلدان باستاپ قازاقستان رەسپۋبليكاسىنىڭ دەنساۋلىق ساقتاۋ ۆيتسە-ءمينيسترى قىزمەتىن اتقارعان.
ەسكە سالا كەتەيىك, الەكسەي تسوي دەنساۋلىق ساقتاۋ ۆيتسە-ءمينيسترى لاۋازىمىنان بوساتىلعان ەدى.