ۇكىمەت وتىرىسىندا بايانداما جاساعان داۋرەن اباەۆتىڭ ايتۋىنشا, 2018 جىلى 20 ءىس-شارانى جۇزەگە اسىرۋ جوسپارلانعان. سول جوسپارعا ساي جۇمىستار تولىق ورىندالىپ, قارجىنىڭ 99,8% يگەرىلگەن.
«ەكونوميكا سالالارىن تسيفرلاندىرۋ» باعىتى بويىنشا وتىن-ەنەرگەتيكالىق جانە تاۋ-كەن مەتاللۋرگيالىق كەشەندەرىندە 4.0 يندۋسترياسى ەلەمەنتتەرىن قولدانۋ ارقىلى:
ەڭبەك ونىمدىلىگى ورتاشا ەسەپپەن 10%-عا ارتقان, جەكەلەگەن وندىرىستەردە ەلەكتر قۋاتى 33%-عا دەيىن ۇنەمدەلگەن, جابدىقتاردى پايدالانۋ كوەففيتسەنتى 50%-عا ۇلعايعان.پايدالى قازبالارى بار 7 ءىرى كەن ورنىنا «ينتەللەكتۋالدى كەن ورنى» جانە «تسيفرلىق بۇلاق» جوبالارى ەنگىزىلگەن.
اتاپ ايتار بولساق, «ەمبىمۇنايگاز» اق ۋاز شوعىرىندا مۇناي ءوندىرۋدى 773 تونناعا ارتتىرۋعا مۇمكىندىك پايدا بولىپ, ال ەلەكتر قۋاتى 33%-عا ۇنەمدەلگەن.
ءمينيستردىڭ ايتۋى بويىنشا, 2019 جىلى وسىنداي جۇيە بويىنشا جۇمىس جاسايتىن نىساندار سانىن 12 بىرلىككە جەتكىزۋ جوسپارلانعان.
تاۋ-كەن ونەركاسىبىندە 102 كاسىپورىن «ايقىن» ءوندىرىس دەڭگەيىنە اۋىستىرىلعان. بۇل بارلىق ءوندىرىس دەرەكتەرىن تسيفرلاندىرۋعا جانە اقپاراتتىق اعىندى باسقارۋعا جول اشادى ەكەن.
بۇگىنگى كۇنى 4 جوبا پايدالانۋعا بەرىلگەن. اتالعان كاسىپورىنداردا تسيفرلىق تەحنولوگيالاردى قولدانۋ ەسەبىنەن ونىمدىلىك 10%-عا ارتىپ, ەڭبەك شىعىندارى 30%-عا دەيىن جانە وندىرىستىك شىعىندار 10%-عا دەيىن تومەندەگەن.
ەستەرىڭىزگە سالا كەتسەك, «تسيفرلىق قازاقستان» مەملەكەتتىك باعدارلاماسى نەگىزگى 5 باعىتتان جانە 17 باستامادان جانە 120 ءىس-شارادان تۇرادى.