31 جاستاعى الماتىلىق تۇرعىن ءبىر كۇننىڭ ىشىندە وسىنداي ۇلكەن سومانى جوعالتىپ الدى. ول قولما-قول اقشا سالىنعان سومكەنى ءوزىنىڭ كولىگىنىڭ ىشىنە تاستاپ كەتكەن. قاسكويلەر وسى جاعدايدى پايدالانىپ, اۆتوكولىكتىڭ تەرەزەسىن سىندىرىپ, سومكەنى الىپ كەتكەن. بۇل تۋرالى الماتى قالالىق پد ءباسپاسوز قىزمەتى حابارلادى.
«كۇدىكتىلەردىڭ جەكە تۇلعالارىن بىردەن انىقتادىق, ولار 4 ادامنان قۇرالعان توپ بولىپ شىقتى جانە ولاردى ۇستاۋ ءۇشىن ءبىرشاما ۋاقىت كەتتى. قازىرگى تاڭدا ەكى نەگىزگى ايىپتالۋشى ۇستالدى, قالعان ەكەۋى – ىزدەستىرىلۋدە. ولاردى ۇستاۋ – ۋاقىتتىڭ ەنشىسىندە. ايتا كەتۋ كەرەك, كۇدىكتىلەر – شىعىس قازاقستاننىڭ تۇرعىندارى. سولاردىڭ ءبىرى – 45 جاستاعى ك.ەسىمدى ازامات, الماتى وبلىسىنىڭ اۋماعىندا ءبىزدىڭ بولىمشەنىڭ قىزمەتكەرلەرىمەن ۇستالدى, ال, ەكىنشى ادام – 49 جاستاعى ا.ەسىمدى ازامات, قالادان شىعىپ كەتۋگە ۇلگەرمەگەن, ءبىز ونى الاتاۋ اۋدانىندا انىقتادىق. قازىرگى ۋاقىتتا ولار قاماۋدا وتىر. كۇدىكتىلەردىڭ دوسەسىنەن: ەر ادامدار بوتەننىڭ مۇلكىن ۇرلاعانى جانە قاراقشىلىق جاساعاندارى ءۇشىن قىلمىستىق جاۋاپكەرشىلىككە تارتىلعان», - دەپ حابارلادى الماتى قالالىق پد قىلمىستىق پوليتسيا باسقارماسىنىڭ باستىعى, پوليتسيا پودپولكوۆنيگى ەسەن ىسقاقوۆ.
باسقا بىرەۋدىڭ مۇلكىن ۇرلاۋ فاكتىسى بويىنشا باستاندىق اۋداندىق پوليتسيا باسقارماسىمەن قر قك-ءنىڭ 188 بابى 3 تارماعىندا كوزدەلگەن قىلمىس نەگىزىندە سوتقا دەيىنگى تەرگەۋ جۇرگىزىلۋدە.