ءوڭىر كاسىپكەرلەرى ۇن ونىمدەرىن شەتەلگە ەكسپورتتاي الماۋدىڭ سالدارىنان تىعىرىققا تىرەلىپ وتىرعان جايى بار.
باستى سەبەبى, ۇنعا قاراعاندا, قازىر بيدايدىڭ باعاسى الدەقايدا قىمبات. ونىڭ ۇستىنە وزبەكستان بيدايدى قازاقستاننان ساتىپ الىپ, وزدەرىندە وڭدەگەندىكتەن, ۇننىڭ باعاسى تومەندەپ كەتكەن.
ۇن ۇگۋ كومبيناتىنىڭ كوممەرتسيالىق ماسەلەلەر جونىندەگى ديرەكتورى تايسيا كولەگوۆانىڭ ايتۋىنا قاراعاندا, بۇرىندارى جۇك ۆاگوندارىنىڭ تاپشىلىعى قاتتى سەزىلسە, بۇگىندە قاڭتارۋلى تۇر. سوڭعى ونىمدەر رەسەيگە جونەلتىلۋدە.
«استىقتىڭ ءبىر تونناسى – 70 مىڭ تەڭگە. ونى وڭدەپ,شەتەلگە جىبەرۋ ءتيىمسىز. جاعداي بۇلاي جالعاسا بەرسە, ىشكى نارىقتا شيكىزات جەتپەي قالۋى مۇمكىن. ونىڭ اقىرى كاسىپورىنداردىڭ توقىراۋىنا اكەلىپ سوقتىرادى», دەيدى ول. ديىرمەندە جۇمىس ىستەگەن 50 جۇمىسشى ءتۇرلى ناۋقاندىق شارۋالارعا تارتىلعان.
تىعىرىققا تىرەلگەن ورتا جانە شاعىن بيزنەس وكىلدەرى اۋىل شارۋاشىلىعى جانە ۇلتتىق ەكونوميكا مينيسترلىكتەرىنە حات جازىپ, كومەك قولىن سوزۋدى ءوتىنىپ وتىر.
سالى سۋعا كەتكەن ۇن ۇگۋ كومبيناتىنىڭ ديرەكتورى يسا اللاحياروۆتىڭ بارماعان جەرى, اشپاعان ەسىگى جوق كورىنەدى. 2017 جىلى 38 مىڭ توننا ءونىم شىعارىلسا, بىلتىرعى كورسەتكىش 17 مىڭ توننا عانا. ءوندىرىس كولەمى بىردەن ەكى ەسەگە قۇلدىراعان. ول بيدايعا باج سالىعىن كوتەرۋ كەرەك. وسى ماسەلە ۇكىمەت تاراپىنان شەشىلسە, باعا ساياساتى رەتتەلەر ەدى, دەيدى.
باستى تۇتىنۋشى سانالاتىن اۋعانستان نەگىزىنەن وزبەكستاننىڭ ارزان ۇنىن ساتىپ الادى ەكەن. سوڭعى جىلدارى الا تاقيالى اعايىندار ديىرمەن كەشەندەرىن كوپتەپ سالىپ, باسەكەلەستىكتى كۇرت ارتتىرىپ جىبەرگەن. بۇرىندارى ەلىمىز تەك تاجىكستانعا 700 مىڭ تونناعا دەيىن ۇن ەكسپورتتاپ كەلگەن.
وبلىستىق اۋىل شارۋاشىلىعى باسقارماسى باسشىسىنىڭ ورىنباسارى قۋاندىق شاكۋباەۆ وسى سالادا جۇمىس ىستەيتىن كاسىپكەرلەرگە قولداۋ كورسەتۋ قاجەتتىگىن العا تارتادى. ونىڭ ويىنشا تەمىرجول تاسىمالى مەن وڭدەۋ كاسىپورىندارىنىڭ شىعىنىن جابۋ ءۇشىن سۋبسيديا بەرىلۋى كەرەك.
ازىرگە ءسوز كوپ, ناتيجە جوق. قازىرگى تاڭدا قازاقستاندا 250-دەن استام ديىرمەن كەشەنى بار. جاعداي رەتتەلمەسە, ءاربىر ءتورتىنشى كاسىپورىن ءوز جۇمىسىن توقتاتۋى ىقتيمال.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى