جاسىراتىنى جوق, قوعامدا الەۋمەتتىك جاعىنان از قامتىلعان ادامدار لەگى كوبەيىپ كەلەدى. قازىر تۇرعىندار اراسىندا جۇمىسقا ورنالاسۋ, بالالاردى تەگىن ىستىق تاماقپەن قامتۋ, تۇرعىن ءۇي جايى, قىستىق وتىن ماسەلەسى سياقتى تۇرمىستىق ماسەلەسىن ايتىپ ارىزدانۋشىلار از ەمەس. جانە الەۋمەتتىڭ كومەك سۇراپ باراتىن جەرى دە ساناۋلى بولىپ وتىر. «نۇر وتان» پارتياسىنىڭ قوعامدىق قابىلداۋ بولىمدەرى سولاردىڭ قاتارىندا.
وتكەن جىلى «نۇر وتان» پارتياسى الماتى وبلىستىق فيليالىنىڭ قوعامدىق قابىلداۋ بولىمىنە 5516 ادام ارىز-ارمانىن ايتىپ كەلگەن ەكەن. ءارتۇرلى دەڭگەيدەگى 2176 ءوتىنىش قاناعاتتاندىرىلىپ, وڭىنان شەشىلىپتى. ءار ءوتىنىش يەسى پارتياعا كەلگەندە ماسەلەسىنىڭ ماڭىزدىلىعى ەسكەرىلسە, شەشىمىن تاپپاعان سۇراعىنا جاۋاپ السام دەپ كەلەدى.
مىسالعا, پارتيانىڭ وبلىستىق فيليالىنا قابىلداۋعا جازىلعان تالدىقورعان قالاسىنىڭ تۇرعىنى, جالعىزباستى انا ينديرا تۇرسىنبەكوۆا تۇرمىسىنىڭ تومەندىگىن, قاراۋىندا مۇمكىندىگى شەكتەۋلى بالاسى بار ەكەنىن ايتقان بولاتىن. جاس انانىڭ جاعدايىن تىڭداعان وبلىستىق فيليال توراعاسىنىڭ ءبىرىنشى ورىنباسارى, وبلىستىق ءماسليحات دەپۋتاتى عالياسقار سارىباەۆ مۇگەدەك بالاعا كومەك قولىن سوزىپ, ءبىلىم الاتىن مەكتەبىنىڭ باسشىلىعىنا حابارلاستى. ناتيجەسىندە بالانىڭ تەگىن تاماقتانۋ ماسەلەسى شەشىلدى. جالعىزىلىكتى اناعا تيەسىلى جاردەماقى الۋىنا وراي وبلىستىق فيليال باسشىسى قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى گۇلجان وسپانوۆاعا حابارلاسىپ, ءمان-جايدى انىقتاپ, جاردەماقى الۋىنا دا جاردەمدەستى. پارتيانىڭ شاراپاتى تيگەن جاننىڭ ءبىرى – ارايلىم ۋاليەۆا. ارايلىم جاس وتباسىلى, تۇرمىس قۇرعانىنا نەبارى جارتى جىل بولعان. جۇمىسسىز. وبلىس ورتالىعىنا كوشىپ كەلگەن ۋاقىتتان بەرى ءوز ماماندىعى بويىنشا قىزمەت ەتىپ, مەيىربيكە بولۋدى ارمان ەتەتىن. الايدا, جاس مامانعا ەشبىر جەردەن كومەك قولىن سوزاتىن ادامدار تابىلمادى. تاۋى شاعىلىپ, كوڭىلى قۇلازىعان ارايلىم تالدىقورعان قالالىق فيليالىنىڭ قوعامدىق قابىلداۋ بولمەسىنە كەلىپ, بار جاعدايدى ايتتى. پارتيالىقتار جاس مامانعا كومەك كورسەتۋگە ءازىر ەكەندىكتەرىن ايتىپ, تالدىقورعان قالالىق قوعامدىق دەنساۋلىق ساقتاۋ باسقارماسىنىڭ باسشىسى ەرمەك اسەمقۇلوۆتىڭ قابىلداۋىنا كىرگىزدى. ول كىسى ارايلىمنىڭ نازىن تىڭداپ, جاس انانىڭ تالدىقورعان قالالىق اۋرۋحاناسىنا مەيىربيكە بولىپ جۇمىسقا قابىلدانۋىنا ىقپال ەتتى.
الەۋمەتتىك تۇرمىسى تومەن وتباسىلارىنان دا پارتيالىقتارعا كەلۋشىلەردىڭ قاتارى از ەمەس. سولاردىڭ ءبىرى ەركىن اۋىلىنىڭ تۇرعىنى ساۋلە قاناپيانوۆا. ساۋلە اپاي قالالىق فيليالعا كومىر الۋعا جاردەمدەسۋگە كومەك سۇراپ كەلدى. «نۇروتاندىقتار» وكرۋگتەن سايلانعان وبلىستىق ءماسليحات دەپۋتاتى قالماحانبەت دونسەباۆقا حابارلاسىپ, قابىلداۋعا كەلگەن انانىڭ ءوتىنىشىن جەتكىزدى. ماسەلە بىردەن شەشىمىن تاۋىپ, ءۇش كۇننىڭ ىشىندە ساۋلە اپايدىڭ ۇيىنە كومىر ءتۇسىرىلىپ, اۋىلدىق وكرۋگ اكىمشىلىگى تاراپىنان جانە قالالىق ءماسليحات دەپۋتاتى تەمىربولات احاجاننان دا ازىق-ت ۇلىك جەتكىزىلدى. نۇروتاندىقتار دا ماسەلەدەن شەتكەرى قالماي, قىستىق اياق كيىم الىپ بەردى. كوكسۋ اۋدانىندا دا وسىنداي بىرنەشە ماسەلەمەن پارتيا ەسىگىن قاققان ازاماتتارعا قولعابىس بەرىلدى. كوكسۋ اۋدانىنىڭ ءبىلىم ءبولىمىنىڭ باسشىسى تلەۋمۇرات سەيتنيازوۆ قابىلداۋىنا جازىلعان جۇلدىز قالقاباەۆا كوپبالالى انا, بالالارىنا مەكتەپتەن تەگىن تاماقتانۋعا مۇمكىندىك سۇراپ كەلدى. بۇل سۇرانىسى وڭتايلى شەشىلىپ, قازىرگى ۋاقىتتا مەكتەپ وقۋشىلارى ىستىق تاماقپەن قامتىلدى.
قوعامدىق قابىلداۋ بولمەسىنىڭ كوپشىلىككە قولجەتىمدىلىگى, قابىلداۋ جۇرگىزەتىن ازاماتتىڭ كەز كەلگەن ساۋالعا جاۋاپ بەرۋگە دايارلىعى, ءتىپتى فيليال قىزمەتكەرىنىڭ قابىلداۋ كەلۋشىلەردى جىلى شىرايمەن كۇتىپ الۋىنىڭ ءوزى – كوڭىلگە قۋات. اركىم مەيىرىمدىلىك پەن قايىرىمدىلىققا ءوزى جول باستاسا, قوعام دا وسى باعىتقا بەت بۇرار ەدى...
قالماحانبەت مۇقامەتقالي,
«Egemen Qazaqstan»
الماتى وبلىسى