7 اقپان كۇنى تاڭەرتەڭ باتىس قازاقستان وبلىسىنىڭ اقساي قالاسىنداعى جۇمىسشىلار قالاشىعىندا نارازىلىق اكتسياسى ءوتتى. قاراشىعاناق گاز ءوندىرۋ جانە وڭدەۋ كەنىشىندەگى «سيچيم» كومپانياسىنىڭ 200 جۇمىسشىسى جالاقى كولەمى مەن جۇمىس جاعدايىنا شاعىم ايتىپ, جۇمىسقا شىعۋدان باس تارتقان.
وقيعا بولعان جەرگە كومپانيا باسشىلىعىمەن بىرگە ءبورلى اۋدانىنىڭ اكىمى سانجار اليەۆ, اۋدان پروكۋرورى, ەڭبەك ينسپەكتورى, اۋداندىق پوليتسيا ءبولىمىنىڭ باسشىسى بارعان. جۇمىسشىلارمەن كەزدەسۋگە ءبورلى اۋدانىنىڭ اكىمى دە اتتانعان.
- بۇل ءبىر كومپانيانىڭ ءوز ىشىندەگى, جۇمىس بەرۋشى مەن جۇمىسشىلاردىڭ ءوزارا كەلىسپەۋشىلىگىنەن بولعان نارازىلىق. ەكى جاق كەزدەسىپ, ماسەلەنى تالقىلاپ, ورتاق پىكىرگە كەلگەننەن كەيىن جۇمىسشىلار تاراپ كەتتى, - دەيدى ءبورلى اۋدانىنىڭ اكىمى الپامىس كوشكىنباەۆ.
اۋدان پروكۋرورى جۇمىسشىلارعا ۇجىمدىق ارىز جازىپ, تالاپتارىن بەكىتىلگەن زاڭناماعا ساي ءبىلدىرۋدى ۇسىنعان.
«كومپانيانىڭ ەڭبەك شارتى بويىنشا بىلىكتىلىكتەن وتپەگەن جۇمىسشىنىڭ جالاقىسى – 160 مىڭ تەڭگە. ال تومەن جانە ورتا بىلىكتى جۇمىسشىلار 28/14 كۇن ۆاحتالىق ادىسپەن جۇمىس ىستەسە, 230-250 مىڭ تەڭگە جالاقى الادى» دەپ مالىمدەگەن «KKS-SICIM» جشس-نىڭ اتقارۋشى ديرەكتورى التىن كۋلباەۆا.
قازبەك قۇتتىمۇرات ۇلى,
«Egemen Qazaqstan»
باتىس قازاقستان