بەينەۋ شەكارا جاساعىنىڭ «بەينەۋ تەمىرجول» شەكارالىق باقىلاۋ بولىمشەسىندە شەكاراشىلار «نوكىس-بەينەۋ» باعىتىنداعى № 647 تەمىرجول كولىگىنىڭ قۇرامىن تەكسەرۋ بارىسىندا ىلەسپە قۇجاتسىز 0,5 ليترلىك 359 شولمەك سپيرتتىك ىشىمدىگىن (اراق) الىپ وتپەك بولعان 27 جاستاعى وزبەكستان رەسپۋبليكاسىنىڭ ازاماتىن ۇستادى. جۇك «بەينەۋ» كەدەندىك بەكەتىنىڭ قىزمەتكەرلەرىنە تاپسىرىلدى.بۇل تۋرالى ۇقك شق ءباسپاسوز قىزمەتى حابارلادى.
وسىعان ۇقساس جۇكتى قورداي شەكارا جاساعىنىڭ شەكاراشىلارى دا ۇستادى. «قورداي اۆتو» شەكارالىق باقىلاۋ بولىمشەسى «مەرەسەدەتس بەنتس سپرينتەر» اۆتوماشيناسىمەن قازاقستان رەسپۋبليكاسىنان قىرعىز رەسپۋبليكاسىنا كەتىپ بارا جاتقان 35 جاستاعى قىرعىز رەسپۋبليكاسىنىڭ ازاماتىن ۇستادى. ءاۆتوموبيلدى تەكسەرۋ كەزىندە سالونىنان جالپى مولشەرى 1000 ليتردەن ستام ءارتۇرلى ماركاداعى 2203 شولمەك اراق-شاراپ بۇيىمدارى تابىلدى. جۇكتىڭ قۇجاتى بولعان جوق. جۇك قورداي اۋداندىق مكد-گە تاپسىرىلدى.
ورال شەكارا جاساعىنىڭ «سىرىم اۆتو» شەكارالىق باقىلاۋ بولىمشەسىندە «Lexus» اۆتوماشيناسىمەن قر-دان رف-عا كەتىپ بارا جاتقان رەسەي فەدەراتسياسىنىڭ 43 جاستاعى ازاماتى ۇستالدى. ءاۆتوموبيلدى تەكسەرۋ كەزىندە (باگاجدىق بولىگىنەن) «BLASER R-8» ماركالى كارابين جانە وعان قوسا 30-06 كاليبردىڭ 25 وعى تابىلدى. ۇستالعان ازامات قارۋىمەن بىرگە بايتەرەك اۋداندىق ىشكى ىستەر ورگانىنا تاپسىرىلدى.