«تاراز» فۋتبول كلۋبى تۇركيانىڭ انتاليا قالاسىنداعى وقۋ-جاتتىعۋ جيىنىن اياقتادى. كوماندا مۇندا بىرنەشە جولداستىق ويىن وتكىزگەن بولاتىن. سونىمەن قاتار, انتاليادا جەرگىلىكتى تاربيەلەنۋشىلەر مەن جاڭادان كەلگەن ويىنشىلاردىڭ مۇمكىندىكتەرى قارالدى.
جولداستىق ماتچتىڭ ماقساتى – ءار ويىنشىنىڭ مۇمكىندىكتەرىن انىقتاۋ بولعاندىقتان, مۇندا ءار ءتۇرلى ويىن ستيلىندەگى كوماندالارمەن جەكپە-جەكتەر وتكىزىلدى. ءوز ەلىنىڭ ءبىرىنشى ديۆيزيونىن ۇسىناتىن تۋنيستىك «زيتۋني» كومانداسىمەن وتكىزىلگەن ماتچ تارتىستى ويىنعا قۇرىلدى. قازاقستاندىق كوماندا 7:0 ەسەبىمەن ايقىن جەڭىسكە جەتتى. بۇل ويىندا كلۋب تاربيەلەنۋشىسى ابزال تاۋباي ەرەكشە ويىنىمەن ەكى رەت كوزگە تۇسسە, ال ويىنشى دۋمان تۇرسىنباي ءبىر گول سالىپ, ەل مەرەيىن اسىردى.
شۆەيتساريالىق سۋپەرليگادان ەۋروكۋبوكتاردىڭ تۇراقتى قاتىسۋشىسىمەن – «ۆادۋتس» كومانداسىمەن كەلەسى ويىن تاباندى تۇردە ءوتتى. مۇندا قىزىقتى جەكپە-جەكتە ەكىجاقتى وتكىر ساتتەرىمەن تارازدىقتار 0:2 ەسەبىمەن ەسە جىبەرىپ الدى. كەيىن رۋمىندىق «گەرمانشتادت» كومانداسىمەن دە قىزىقتى ويىن ءوتتى. قارسىلاس وتە بىلىكتى كوماندا, بىراق جامبىلدىقتار ولارمەن دەس بەرمەستەن ەكى مارتە ەسەپ بەرىپ وتىردى. ءبىرىنشى تايمدا «تاراز» ساپىندا ويناعان برازيليالىق ەليۆەلتو ءبىزدىڭ كوماندانى العا شىعاردى. قارسىلاستار پەنالتيمەن ەسەپتى تەڭەستىردى. ەكىنشى تايم كەزەڭىندە الىشەر سۇلەي تارازدىقتاردى 2:1 ەسەبىمەن العا شىعاردى.
ودان كەيىن 23 جاسقا دەيىنگى وزبەكستاننىڭ جاستار قۇراماسىمەن جولداستىق ويىننىڭ ءبىرىنشى تايمىندا گاۆريل كان سوققان گولدىڭ ناتيجەسىندە تارازدىقتار وڭاي ەمەس ماتچتا جەڭىستى قولدان بەرمەي, ەسەپتى 1:0-گە جەتكىزدى. سوڭعى ويىن ۋكرايندىق پرەمەر-ليگانىڭ «كارپاتى» (لۆوۆ) كلۋبىنا قارسى ءوتتى. ءبىرىنشى تايمنان كەيىن قارسىلاس كوماندا 2:0 ەسەبىمەن جەڭىسكە جەتتى. ەكىنشى تايمدا ەليۆەلتو ءبىر گول سوققانمەن, كوپ ۇزاماي سۋلەي پەنالتيدى جۇزەگە اسىرمادى. ءوز كەزەگىندە ۋكرايندىقتار پەنالتيدەن بەرىلگەن مۇمكىندىكتى دۇرىس پايدالانىپ, ءۇشىنشى گول سوقتى.
جيىن قورىتىندىسى بويىنشا بىرقاتار ويىنشىلارمەن كەلىسىمشارتقا قول قويىلدى. بۇل اتاقتى «فلامەنگو» مەكتەبىنىڭ تاربيەلەنۋشىسى, بىرنەشە جىل بويى ەۋروپالىق كوماندالاردا ونەر كورسەتكەن 26 جاسار برازيالىق ەليۆەلتو بولاتىن. سونداي-اق, كوماندانى شەتەلدىك كلۋبتاردا تاجىريبە جيناقتاعان ويىنشىلار تولىقتىردى. ول 26 جاسار نەمانيا سۋبوتيچ جانە 28 جاسار ميحايلو يوۆانوۆيچ. تاعى ءبىر ايتا كەتەرلىگى, تارازدىقتار ءۇشىن گرۋزيالىق فۋتبولشى لاشا كاسرادزە مەن قازاقستاندىق راحىمجان روزىباكيەۆ ونەر كورسەتەتىن بولادى.
حاميت ەسامان,
«Egemen Qazagstan»
جامبىل وبلىسى