تسيفرلى مەديتسينانىڭ مۇمكىندىگى مول

«قىزىل ءدالىزدىڭ» كومەگى

ەلورداداعى №2 قالالىق اۋرۋ­حانا – جوعارى مامان­دان­دى­رىلعان مەدي­تسينالىق كو­مەك كورسەتەتىن 360 ورىندىق كوپ­بەيىندى ستاتسيو­نار. ياعني ءتۇر­لى ءپروفيلدى مامانداردى شوعىر­لاندىرعان جەدەل دياگنوستيكالاۋ مەن پاتسيەنت­تەرگە جوعارى دەڭگەيدە مەديتسينالىق كومەك كورسەتۋدە بار جابدىعى مەن جايى ساي كلينيكانىڭ ءبىرى. №2 قالالىق اۋرۋحانانىڭ باس دارىگەرى يۆان لي «استانا – ادالدىق الاڭى» جو­باسى اياسىندا جۋرناليستەرگە ادەتتەگىدەن وز­گەشە «قابىلداۋ بولمەلەرىن» تانىستىردى.

قابىلداۋ بولمەلەرى بىرنەشە دالىزگە جىكتەلىپتى. ەڭ جەدەلى – «جەدەل جاردەم» كومەگى ارقىلى اسا شۇعىل تۇردە جەتكىزىلەتىن اۋىر حالدەگى ناۋقاستار ءۇشىن ارنايى جابدىقتالعان, بىرنەشە قىزىل پەردەلى بوكسقا بولىنگەن «قىزىل ءدالىز». بۇگىندە مەديتسيناعا ەن­گىزىلگەن تسيفرلاندىرۋدىڭ نا­تي­جەسىندە «جەدەل جاردەم» دارى­گەر­لەرى پاتسيەنتتىڭ جاعدايىن اۋرۋ­حاناعا جەتپەي تۇرىپ حابارلاۋ مۇمكىندىگىنە يە بولعان. اۋىرعان جاننىڭ جسن ارقىلى ونىڭ بويىندا قانداي سوزىلمالى سىرقاتى بارلىعى, قانداي دارىگە اللەرگيا بەرەتىنى, قىسقاسى اعزاسىنداعى اۋرۋلارىنىڭ دەرەگى كومپيۋتەردە ساقتالادى. ال اۋرۋ­­­­­حانا ديسپەتچەرلەرى كولىكتىڭ قاي­ ماڭدا كەلە جاتقانىن كورىپ, قانداي مامانداردىڭ قاجەتتىگىن ناقتىلاپ, پاتسيەنت «قابىلداۋ بولىمىنە» جەتپەستەن بۇرىن, دارىگەرلەردى ساقاداي ساي دايىنداپ قويادى. ويتكەنى مۇنداي ساتتە سەكۋندتاردىڭ ءوزىنىڭ اتقاراتىن ءرولى بار. ال «قىزىل ءدالىزدى قا­بىلداۋ ءبولىمى» جابدىقتالۋى جو­نىنەن الەمدىك وزىق كلينيكالاردان ەش كەم ەمەس. جۇرەك جانە قان تامىرلارى, وكپە جۇيەلەرى جۇمىسىن اتقارا الماي جاتقاندا ونى الماستىراتىن ارنايى اپپاراتتارمەن, ءتىپتى قاجەت بولسا وتا ۇستەلى بولىپ كەتەتىن جىلجىمالى توسەك, ۋلترادىبىستىق زەرتتەۋ, جۇرەك سوعىسىن جازۋ سىندى تولىپ جاتقان باسقا دا كەرەكتى قوندىرعىلارمەن جابدىقتالعان بوكستارداعى تسيفرلى الەم دەرتتى جانعا ءتۇرلى كومەك كورسەتەدى. «سارى ءدالىز» قىزىلعا قارا­عاندا جەڭىلدەۋ بولعانىمەن, پا­تسيەنتتىڭ جانىنا باتىپ, جە­دەل ستاتسيونارلىق كومەك كور­سەتۋدى تالاپ ەتەتىن اۋرۋلاردى قابىل­داي­دى. بۇل جەردە دە كەلگەن اۋرۋ ايناعا ءتۇسۋ, قان تاپسىرۋ, الدەقالاي قاجەتتى انىقتاۋلاردان ءوتۋ بارىسىندا اۋرۋحانانى شار­­لا­مايدى. بارلىعى «جەدەل جار­دەم» قالدىرعاننان كەيىنگى توسەك­تىڭ ۇستىندە جاسالادى. 

سونداي-اق «جاسىل ءدالىز» جوسپارلى تۇردە ەمدەلەتىندەردى قابىلدايتىن ءبولىم. مۇندا كەلۋ­شى ەلەكتروندى دۇڭگىرشەكتەن كەزەك تۇبىرتەگىن الىپ, تابلودان وزىنە تيەسىلى ساننىڭ جانۋىن كۇ­تەدى, ءارى قاراي قاجەتتى ستا­تسيو­نارلىق بولىمگە جاتقىزى­لا­دى.

QR كود – تۇتىنۋشىعا كومەك

جۋىردا مەملەكەتتىك قىز­مەت ىستەرى جانە سىبايلاس­ جەم­قورلىققا قارسى ءىس-قيمىل اگەنت­تىگىندە ەلوردالىق اۋرۋحا­نا­لا­ر­دىڭ قىزمەت كورسەتۋ دەڭ­گە­يىن كوتەرۋ بويىنشا وت­كىز­گەن بريفينگتە كەيبىر مەدي­تسي­­­­نالىق مەكەمەلەردىڭ پالاتالارى مەن قابىلداۋ بولىم­شەلەرىندە ەمدەلۋشىلەردى قا­بىل­داۋ پروتسەدۋراسىنىڭ ناق­­­تى ەرەجەسىنىڭ جوقتىعى, ك­ە­زەك­­­تە 1 جانە 2 ساعاتتان ار­­تىق­­ كۇتۋ فاكتىلەرى كەزدەسە­تى­­نى, ستا­­­تسيونارلىق ەمدەۋ­دە پا­لا­تا­لاردىڭ جوندەۋ جۇمىس­تا­رىن جۇرگىزۋدى, سونداي-اق­ تە­رە­زەلەرىن اۋىستىرۋدى قا­جەت ەتەتىنى ايتىلعان. جوبا كەڭسەسىنىڭ جەتەكشىسى جازيرا جىل­قىشيەۆا قوعامدىق دەنساۋ­لىق ساقتاۋ باسقارماسىمەن بىر­لەسىپ, تۇرعىندارعا تۇسىنىكتى ءارى قولجەتىمدى تۇردە تسيفرلى, قاعاز جانە اۋديو-ۆيزۋالدى فورمات­تا الگوريتم جاساقتاۋ قولعا الى­ناتىندىعىن اتاپ وتكەن بولاتىن.

سونداي-اق اتالعان جيىندا استانا قالالىق قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ جوبا شەڭبەرىندە جۇزەگە اسىرىل­عان جاڭاشىلدىق ۇلگىلەرى تۋرا­لى بايانداعان. ونىڭ ايتۋىنشا, بيىل اقپان ايىنان باستاپ ەمحا­نالاردىڭ باس دارىگەرلەرىنىڭ حا­لىق­قا اتقارىلعان جۇمىستار تۋرالى اي سايىن ەسەپ بەرۋى جۇر­گىزىلەدى. وسىلايشا, ەمحانا­لاردىڭ باس دارىگەرلەرى ەمحاناعا تىركەلگەن تۇرعىندارمەن تىعىز قارىم-قاتىناس ورناتىپ, ماسە­لەنى «قاجەتتى جەردە جانە جەدەل كومەك كورسەتۋ» قاعيداتى بو­يىنشا شەشەدى جانە ءاربىر ەم­دەۋ مە­كەمەسىندە ارنايى QR كود ورنالاستىرىلدى. وندا قولىن­دا گادجەتى, سمارتفونى بار ءار ادام سكانەردەن وتكىزۋ ارقىلى ساۋال­ناماعا ءوتىپ مەديتسينالىق ۇيىم­نىڭ جۇمىسىن, «سمارت-استانا» ءموبيلدى قوسىمشاسى ارقىلى وزىنە كورسەتىلگەن كومەك پەن اۋرۋ­حانانىڭ قىزمەت ساپاسىنا قا­تىستى پىكىرىن جانە ءوز باعاسىن بەرەدى. QR كودتاردىڭ ەندى ءبىر پاي­دالى جەرى جالعان ەڭبەككە جا­رام­سىزدىق تۋرالى انىقتاما بە­رۋ­دىڭ جولىن كەسۋى. كامالجان نادىروۆتىڭ ايتۋىنشا, بۇدان بىلاي مەديتسينالىق ۇيىمداردا ەڭبەككە جارامسىزدىق پاراعى­نىڭ زاڭدىلىعىن تەكسەرۋ ءۇشىن «سمارت-استانا» ءموبيلدى قو­­­سىم­شاسىندا اقپاراتتىق قىز­­مەتكە قوسا بلانكتەگى QR كود­تىڭ بولۋى ونىڭ جالعان ەمەس­تىگىنىڭ دالەلى بول­ماق. «وسى­لايشا, جۇمىس بە­رۋشى بەرىلگەن مەديتسينالىق قۇ­جات­تىڭ شى­نايىلىعىن دەربەس تەكسەرە الادى», دەدى ك.نادىروۆ.

تسيفرلى جۇيە ۋاقىتقا ۇنەم

تسيفرلى جۇيەنىڭ ۋاقىتقا قانشا ۇنەم ەكەنىنە استانا قالا­سىنىڭ ناركولوگيا جانە پسيحوتەراپيا ورتالىعى مەن قالالىق №4, 8 ەمحانالارعا بارعاندا كوزى­مىز جەتتى.

ەلىمىزدەگى ناركولوگيالىق بەيىن­دەگى ۇيىمداردىڭ ۇزدىگى سا­­نالاتىن ورتالىقتىڭ جوعارى بىلىكتى ماماندارى, دارىگەرلەر, پسيحوتەراپەۆتەر, پسيحولوگتار ماسكۇنەمدىك, ناشاقورلىق پەن توكسيكومانياعا, ويىنقۇمار­لىققا شالدىققان ناۋقاستارعا ءتيىمدى مامانداندىرىلعان كو­مەك كورسەتۋدە تسيفرلى جۇيەنى كەڭىنەن پايدالانادى. قان قۇ­رامىندا قانشالىقتى زياندى زاتتىڭ بار ەكەنىن انىقتاپ, ونى ناقتى تانىپ, اتىن اتاپ بەرۋگە كومەكتەسەتىن ارنايى كىتاپحاناسى بار زەرتحانا قوندىرعىسى زاماناۋي تسيفرلى تەحنولوگياعا نەگىزدەلگەن. كىتاپحانا جۇيە ىشىن­­دەگى باعدارلاما ەكەنىن ايتا كەتكەن ءجون. ەمحانالارداعى تسيفرلاندىرۋ كومەگىنە سۇيەنگەن جاڭالىقتار دارىگەرگە دە, پاتسيەنتتەرگە دە­ قو­لايلى. الدىمەن تىركەۋ ءبولى­مىنىڭ الدىنداعى سارىلعان كەزەك­تى جويۋ, دارىگەرگە جازىلۋدا ار­­نايى قوسىم­شالاردى پايدالانۋ, ونىڭ ۇس­تىنە ەمحانانىڭ كىرە­بەرىسىنە قويىل­عان تابلوعا جسن ارقىلى ەش قيىندىقسىز قاجەتتى مامانعا جازىلۋ وسىدان بىرنەشە جىل بۇ­رىن ايتىلعاندا ەرتەك ءتارىزدى ەستى­لەتىن. ال قازىر ءبارى ىسكە اسىرىلۋدا.

№4 ەمحانادا QR-كود پەن جابدىقتالعان مەديتسينالىق بىلەزىگى بار پاتسيەنتكە جولىق­تىق. قانت ديابەتى جانە ارتەريا­لىق گيپەرتەنزيامەن اۋىراتىن پاتسيەنت بىلەزىك تاققالى دارى­گەرمەن اراداعى بايلانىستىڭ جاق­سارعانىن جەتكىزدى. دارى­گەرلەر QR-كود ارقىلى سىرقات جان تۋرالى اقپارات الىپ, ونىڭ جاعدايىنا قاراي ەمىنە وز­گە­رىستەر ەنگىزۋگە مۇمكىندىك ال­سا, ناۋقاستىڭ تۋىستارى ەگەر پا­­­­تسيەنت­كە ءبىر جاعداي تۋسا ونىڭ جاع­دايى تۋرالى لەزدە حابارلاما الادى ەكەن. بۇل, اسىرەسە ناۋقاس تىلدەن ايرىلىپ قالعان كەزدە وتە ماڭىزدى. «ستاتيستيكا بويىنشا قابىلداۋ بولىمىنە كۇن سايىن 500 ناۋقاس ەس-ءتۇسسىز تۇسەدى. وسىنداي ۋاقىتتا قولىندا بىلەزىگى بار ناۋقاس جايىندا دارىگەرلەر بارىنشا تولىق اقپارات الادى. بۇل ادام ءومىرىنىڭ ساقتالۋى جانە دارىگەردىڭ تەز جانە ناقتى كومەك كورسەتۋىنە جول اشىلۋى دەر ەدىك. قولىندا بىلەزىگى بار ءار ناۋقاستىڭ «جەكە كابينەتى» بار جانە وندا پاتسيەنت ءوزىنىڭ فوتوسىن, وزگە بايلانىس اقپاراتتارىن وزگەرتە الادى», دەيدى ەمحانانىڭ باس دارىگەرى سەرىك شايمەردەنوۆ. 

قىسقاسى, تسيفرلى جۇيە پا­­تسيەنت­كە كومەككە كەلدى, ءارى بار­لىق مەديتسينالىق قىزمەتتىڭ اشىق كورسەتىلۋىنە جول اشىپ وتىر. 

انار تولەۋحانقىزى,

«Egemen Qazaqstan»