استانا قالاسىنىڭ اكىمى باقىت سۇلتانوۆ ءورت سالدارىنان 5 بالاسىن جوعالتقان وتباسىنىڭ ۇيىنە باردى.
استانا قالاسى اكىمىنىڭ ءباسپاسوز حاتشىسى ەلۆيرا جۇرگەنباەۆا بريفينگ بارىسىندا ەلوردا اكىمىنىڭ قايتىس بولعان بالالاردىڭ اتا-اناسىنا, تۋعان-تۋىستارىنا قايعىرا كوڭىل ايتىپ, قولىنان كەلگەن كومەكتىڭ ءبارىن جاساۋعا دايىن ەكەندىگىن جەتكىزدى.
«قايعىلى جاعدايعا بايلانىستى قالا اكىمى باقىت سۇلتانوۆ شۇعىل جيىن وتكىزىپ, قۇزىرەتتى ورگاندارعا بولعان جاعدايدىڭ بارلىق ءمان-جايىن انىقتاۋدى تاپسىردى. جيىننان سوڭ باقىت سۇلتانوۆ «سارىارقا» اۋدانىنىڭ اكىمى ارمان تۇرلىبەكپەن بىرگە وقيعا ورنىنا بارىپ, وتباسىنا كوڭىل ايتتى. باقىت سۇلتانوۆ اۋدان اكىمىنە قاجەتتى بارلىق ماتەريالدىق, مەديتسينالىق كومەك كورسەتۋدى جانە جەرلەۋ ءراسىمىن ۇيىمداستىرۋعا كومەكتەسۋدى تاپسىردى. قازىر قازا تاپقان بالالاردىڭ اتا-اناسىمەن پسيحولوگتار, الەۋمەتتىك قىزمەت ماماندارى جۇمىس ىستەۋدە», – دەپ مالىمدەدى ەلۆيرا جۇرگەنباەۆا.
تجد باستىعىنىڭ مىندەتىن اتقارۋشى مارعۇلان امانباەۆتىڭ ايتۋىنشا, وسىعان دەيىن «كوكتال-1» تۇرعىن الابىندا ءورت جانە باسقا دا توتەنشە جاعدايلاردىڭ الدىن الۋ ماقساتىندا پروفيلاكتيكالىق جۇمىستار جۇرگىزىلگەن. اتالمىش جۇمىستاردىڭ بارىسىندا تجد-ءنىڭ قىزمەتكەرلەرى بۇل ۇيگە بارىپ, وتباسى مۇشەلەرىنە ولقىلىقتاردى جويۋعا قاتىستى ەسكەرتۋ جاساعان بولاتىن.
«باقىت سۇلتانوۆ اۋدان اكىمدەرى مەن توتەنشە جاعدايلار دەپارتامەنتى جانە پوليتسيا بىرلەسىپ, جەكە سەكتورداعى ءار ۇيگە بارىپ ءورت قاۋىپسىزدىگى ەرەجەلەرىن ساقتاۋ تۇرعىسىندا قايتادان تەكسەرىس, ءتۇسىندىرۋ جۇمىستارىن جۇرگىزۋدى تالاپ ەتتى. استانا اكىمدىگى كەمەروۆتاعى وقيعادان سوڭ, ءورت قاۋىپسىزدىگى تۋرالى ماسەلەنى بىرنەشە رەت كوتەرىپ, تجد-ءتى وزگە دە ۆەدومستۆولارمەن بىرلەسىپ بىرقاتار رەيد جۇرگىزدى», – دەدى ە. جۇرگەنباەۆا.
استانا قالاسىنىڭ جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ اقپاراتىنشا, بالالاردىڭ اناسى پلاستيكالىق كارتا شىعاراتىن زاۋىتتا, ال اكەسى تقكس-دا مونتاجداۋشى بولىپ جۇمىس ىستەيدى. اكىمنىڭ ءباسپاسوز حاتشىسىنىڭ ايتۋىنشا, وتباسى جەرگىلىكتى اتقارۋشى ورگانداردان كومەك سۇراماعان, جەكە تۇرعىن ءۇي كەزەگىندە تۇرماعان, كوپبالالى وتباسى رەتىندە جاردەماقى الىپ تۇرعان. قازا تاپقان بەس بالانىڭ ەكەۋى مەكتەپتە وقىعان بولسا, 2014 جىلى تۋعان بالا مەملەكەتتىك بالاباقشاعا بارعان, ال قالعان ەكەۋى كەزەكتە تۇرعان. قالعان ەكەۋى بالاباقشا كەزەگىندە تۇرىپتى.
«مەكتەپ تاراپىنان وتباسىعا مەملەكەتتىك جانە دەمەۋشىلىك قولداۋ كورسەتىلدى. مۇعالىمدەردىڭ ايتۋىنشا, بالالار ساباقتان قالماعان, قاتارلاستارىمەن جاقسى ارالاسقان. استانا اكىمى قايتىس بولعان بالالاردىڭ اتا-اناسىنا, تۋعان-تۋىستارىنا قايعىرا كوڭىل ايتىپ, قولىنان كەلگەن كومەكتىڭ ءبارىن جاساۋعا دايىن», – دەدى ەلۆيرا جۇرگەنباەۆا.