باتىس قازاقستان وبلىسىندا جاستار جىلىنىڭ جوبا-جوسپارىنا ارنالعان «جەتىستىككە باستايتىن 7 قادام» اتتى شارادا جالپاقتالدىق ءبىر توپ كاسىپكەر سامبودان الەم چەمپيونى نۇربول سەرىكوۆكە ورال قالاسىنان ەكى بولمەلى پاتەر كىلتىن تابىس ەتتى.
ءبىر توپ كاسىپكەر 2018 جىلى قاراشا ايىندا رۋمىنيا استاناسى بۋحارەستە وتكەن سامبودان الەم چەمپيوناتىندا 68 كيلوگرامدىق سالماقتا جەڭىمپاز اتانعان جەرلەسى نۇربول سەرىكوۆكە ورال قالاسىنان جايلى پاتەر كىلتىن سىيعا تارتتى.
جومارتتىق كورسەتكەن تۇراربەك تىلەمىسوۆ, قاينار ەسمۇحانوۆ, الەكساندر قاراعويشين, الىبەك سارتاەۆ, بەرىك قۇرمانعاليەۆ, سامات حاسانوۆ بۇگىندە ورال مەن اقتوبە وڭىرىندە ءتۇرلى سالادا تابىستى قىزمەت اتقارىپ جۇرگەن ازاماتتار. ولاردىڭ ءبارى دە باتىس قازاقستان وبلىسى قازتالوۆ اۋدانىنا قاراستى جالپاقتال وڭىرىندە تۋىپ-وسكەن. جالپاقتال – ەجەلدەن ۇيىمشىلدىعىمەن, اسىرەسە «تۋعان جەر» باعدارلاماسى اياسىندا اتقارعان قىرۋار شارالارمەن تانىمال ولكە.
- ءبىز بۇگىن ءار تاراپتا جۇرسەك تە جالپاقتال وڭىرىندە تۋعانىمىزدى ۇمىتپايمىز. تۋعان جەردىڭ ءار جەتىستىگىنە, سول جەردە تۋعان ۇل-قىزداردىڭ جەڭىسىنە وزگەدەن بولەك قۋانامىز. نۇربول, سەن دە ون جىلدان بەرى سپورت الەمىندە ءبىراز جەتىستىككە جەتتىڭ, مىنە, الەم چەمپيونى بولدىڭ. ەندى وليمپيادا چەمپيونى بولۋىڭا تىلەكتەسپىز. ەلدىڭ تۋىن, قازاقستاننىڭ بايراعىن بيىك كوتەرىپ جاتىرسىڭ, سوعان اعالىق العىسىمىز بولسىن دەپ باسپانا سىيلاپ وتىرمىز, - دەدى «ورال ترانس» جشس ديرەكتورى, ورال قالالىق ءماسليحاتىنىڭ دەپۋتاتى تۇراربەك تىلەمىسوۆ.
نۇربول سەرىكوۆ 1993 جىلى 16 قاراشادا باتىس قازاقستان وبلىسى قازتالوۆ اۋدانى اقپاتەر اۋىلىندا دۇنيەگە كەلگەن. ورال قالاسىنداعى سپورتقا دارىندى بالالارعا ارنالعان مامانداندىرىلعان وبلىستىق مەكتەپ-ينتەرناتىنىڭ تۇلەگى ن.سەرىكوۆ ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ دەنە شىنىقتىرۋ جانە سپورت فاكۋلتەتىن بىتىرگەن. ول دزيۋ-دودان قازاقستان رەسپۋبليكاسىنىڭ سپورت شەبەرى, سامبودان حالىقارالىق دارەجەدەگى سپورت شەبەرى.
2009 جىلى تەمىرتاۋدا وتكەن دزيۋدو كۇرەسى بويىنشا قر چەمپيوناتىندا 1-ورىن, 2010 جىلى چەحيادا وتكەن حالىقارالىق جارىستا 1-ورىن, 2011 جىلى اتىراۋ قالاسىندا وتكەن قر چەمپيوناتىندا 2-ورىن, 2011 جىلى تەمىرتاۋ قالاسىندا وتكەن قر چەمپيوناتىندا 1-ورىن, 2011 جىلى وزبەكستان استاناسى تاشكەنت قالاسىندا وتكەن ازيا چەمپيوناتىندا 1-ورىن, 2012 جىلى گەر-مانيانىڭ برەمەن قالاسى وتكەن حالىقارالىق تۋرنيردە 2-ورىن, قاراعاندىدا وتكەن قر چەمپيوناتىندا 1-ورىن, تاشكەنت قالاسى ازيا چەمپيوناتى 3-ورىن, 2013 جىلى كورەيادا وتكەن ازيا چەم-پيوناتىندا التىن مەدال, 2015 جىلى بەلارۋس استاناسى مينسك قالاسىندا وتكەن ەرلەر, ايەلدەر جانە اسكەري سامبودان بەلارۋس رەسپۋبليكاسى پرەزيدەنتى جۇلدەسىنىڭ 3-ورىن يەگەرى بولعان.
قازبەك قۇتتىمۇرات ۇلى,
«Egemen Qazaqstan»
باتىس قازاقستان