«Qazaq Epos» رەسپۋبليكالىق اعارتۋ جوباسى 6-10 سىنىپ وقۋشىلارى اراسىندا «تۇلپار ءمىنىپ, تۋ العان!» بايقاۋىن جاريالادى. جوبا اياسىندا 107 بەتتەن تۇراتىن «قوبىلاندى باتىر» جىرىن 50 000 وقۋشىعا تولىق جاتتاتۋ كوزدەلگەن.
«بۇل جوبا مەملەكەت باسشىسىنىڭ « ۇلى دالانىڭ جەتى قىرى» اتتى ماقالاسىمەن دە, بيىلعى جاستار جىلىمەن دە تىعىز بايلانىستى. باستى ماقسات – وقۋشىلاردى رۋحاني ادامگەرشىلىك قىرىنان دامىتۋ مەن قازاق حالقىنىڭ «الپامىس», «ەر تارعىن», «قوبىلاندى» جانە ت.ب. ەپوستارى ارقىلى قازاق حالقىنىڭ باي ەتنو-مادەني جانە فيلوسوفيالىق مۇراسى نەگىزىندە تاربيەلەۋ بولماق», - دەپ مالىمدەدى اقپارات جانە كوممۋنيكاتسيالار ءمينيسترى داۋرەن اباەۆ.
بايقاۋ رەسپۋبليكا بويىنشا 5 000 مەكتەپتەن 50 000 وقۋشى مەن 25 000 مۇعالىمدى قامتيدى.
«نەگىزگى باعىت - تاريحي ەپوستاردى جاتتاۋ. تۋىندىنى تولىق جاتقا ايتۋ, مانەرلەپ وقۋ, ەپوستاعى ءار ءسوزدىڭ ماعىناسى مەن مازمۇنىن ءتۇسىنۋ باستى تالاپتاردىڭ ءبىرى. پوەتيكالىق تەكستى مەڭگەرۋ ارقىلى وقۋشى تاريحتى دا تەرەڭ تۇسىنە باستايدى. سونداي-اق, ەستە قالاتىن پوەتيكالىق ءماتىن وقۋشىنىڭ سويلەۋ مادەنيەتىن, ساۋاتتى جازۋىن قالىپتاستىرادى. وسىلايشا, ادەبي شىعارمالاردى تالعاممەن تاڭداۋىنا نەگىز قالايدى. سونىمەن قاتار, بۇل جوبانىڭ «رۋحاني جاڭعىرۋ» باعدارلاماسىندا ايتىلعان ۇلتتىق كودتى قالىپتاستىرۋ ءۇشىن دە ىقپالى زور بولماق», - دەدى اقپارات جانە كوممۋنيكاتسيالار ءمينيسترى.
جوبا اۋداندىق, وبلىستىق, رەسپۋبليكالىق 3 كەزەڭنەن تۇرادى. وقۋشىلارعا ارنالعان جۇلدە قورى بويىنشا اۋداندىق كەزەڭدە 1-ورىن ءۇشىن 150 000 تەڭگە, 2-ورىن 100 000 تەڭگە, 3-ورىن 50 000 تەڭگە, ال وبلىستىق كەزەڭدە 1-ورىن ءۇشىن 1 000 000 تەڭگە, 2-ورىن 600 000 تەڭگە, 3-ورىن 300 000 تەڭگە سىياقى بەرىلەدى.
سونداي-اق, وبلىستىق كەزەڭدە جەڭىمپاز اتانعان وقۋشىلاردىڭ مۇعالىمدەرىنە دە اقشالاي جۇلدە قورى ەسكەرىلگەن.
«جوبا ەلىمىزدىڭ 6-10 سىنىپ وقۋشىلارى اراسىندا وتەدى. قاتىسۋشىلار «قوبىلاندى باتىر» جىرىن جاتقا ايتىپ, جىردىڭ ىشىندەگى كونەرگەن, تاريحي سوزدەردىڭ ماعىناسىن اشىپ, "قازاق ادەبيەتى" وقۋلىعى بويىنشا ازىرلەنگەن سۇراقتارعا جاۋاپ بەرەدى. سونلداي-اق, الدىن الا بۇقارالىق اقپارات قۇرالدارىندا جاريالانعان تاقىرىپتار بويىنشا ەسسە جازادى», - دەپ اتاپ ءوتتى داۋرەن اباەۆ.
ايتا كەتسەك, جوبا قازاقستان رەسپۋبليكاسى اقپارات جانە كوممۋنيكاتسيالار مينيسترلىگى مەن «Qazaq Epos» قوعامدىق قورىنىڭ باستاماسىمەن, سونداي-اق, قازاقستان رەسپۋبليكاسىنىڭ ءبىلىم جانە عىلىم مينيسترلىگى, «حابار» اگەنتتىگى جانە جەرگىلىكتى اتقارۋشى ورگانداردىڭ قولداۋىمەن جۇزەگە اسىرىلادى.