ريددەر قالاسىنداعى ءورت ءسوندىرۋ بولىمىندە 5 جىلدان بەرى جۇمىس ىستەيتىن رۋستام كونباەۆ بىلتىر قارا كۇزدە ءۇيى ورتەنىپ كەتىپ, ءۇش بالاسىمەن دالادا قالعان بولاتىن.
«29 قازاننان 30 قازانعا قاراعان ءتۇن ءالى ەسىمىزدەن كەتپەيدى. ويانا كەلسەك, ءۇيدىڭ ءىشى كوك ءتۇتىن. ءورت ەسىككە بارار جولدى جاۋىپ تاستاعانىن كورىپ, بالالاردى تەرەزەدەن شىعارۋعا تۋرا كەلدى» دەپ ەسكە الادى سول شاقتى قۇتقارۋشى.
ريددەرلىكتەر رۋستامدى جۇمىسىندا عانا ەمەس, ومىردە دە اينالاسىنا بەي-جاي قارامايتىن ازامات رەتىندە ەرەكشە قۇرمەتتەيدى. ول ءتورت جىل بۇرىن بۇلاننىڭ جەتىم قوزىسىن تاۋىپ, امان الىپ قالسا, تاعى بىردە جالعىز ءوزى كورشىسىنىڭ ءۇيىن ورتەنىپ كەتۋدەن ساقتاپتى. بىلتىر كوكتەمدە قۇتقارۋ شارالارىنا بارا جاتقاندا ماشينالارى اۋدارىلىپ, ءوزى دە ءبىر اجالدان امان قالىپتى. قايسار جىگىت جارتى جىلداي ەم-دوم العاننان كەيىن جۇمىسىنا قايتا ورالىپتى. «كۇن سايىن وتپەن, سۋمەن الىسىپ, ءبىزدىڭ تىنىشتىعىمىز بەن قاۋىپسىزدىگىمىز ءۇشىن تەر توگىپ جۇرگەن وسىنداي ەلىن, جەرىن سۇيەتىن ازاماتتىڭ باسپاناسىز قالعانىن ەستىگەندە قول قۋسىرىپ وتىرا المادىق. كومەك كورسەتۋدى, جاردەمدەسۋدى ءجون سانادىق», - دەيدى «قازتسينك» جشس اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ.
رۋستام كاسىپورىن تاراپىنان بەرىلگەن قوماقتى قارجىعا وزدەرىنىڭ جيعان-تەرگەندەرىن قوسىپ, ءتورت بولمەلى پاتەر ساتىپ العانىن ايتىپ, كومەك قولىن سوزعان ءوندىرىس ورنى باسشىلىعىنا العىسى شەكسىز ەكەندىگىن جەتكىزدى.
ازامات قاسىم,
«Egemen Qazaqstan»
شىعىس قازاقستان وبلىسى, ريددەر قالاسى