اپتانىڭ «اپتىعىن» باسىپ, جۇما دا جەتتى. ال الداعى دەمالىس كۇندەرىن قالاي وتكىزۋدى جوسپارلاپ وتىرساڭىز, بىزدەن ءبىر كەڭەس بولسىن.
كەز كەلگەن قالادان تابۋعا بولاتىن تەراپيا تۋرالى ايتقىمىز كەلەدى. ال اۋىلداعىلار بۇل عاجاپتىڭ شاپاعاتىن, راقاتىن كۇندەلىكتى كورىپ وتىرعان دا بولار. دەگەنمەن, ارتىق بولماس.
«The Times» گازەتى جاريالاعان «وليمپياداداعى 100 كەرەمەت ساتتەر» (https://www.thetimes.co.uk/article/100-greatest-olympic-moments-rider-blazes-trail-for-polio-victims-m55km662rfb) اتتى ماقالادا 1952 جىلعى وليمپيادالىق ويىندا اتقا ءمىنىپ جارىسۋدان كۇمىس مەدال يەلەنگەن دانيالىق ليز حارتەل (Lis Hartel) جايىندا جازادى.
بىراق مەنى ەلەڭ ەتكىزگەنى – سال اۋرۋىنا شالدىققان قىز. ليز 23 جاسىندا كەنەتتەن قوس اياعى ىستەمەي, ارباعا تاڭىلعان. ءيا, ءدال سول سال اۋرۋىنا شالدىققان قىز جەتى جىلدى ارتقا تاستاپ, 31-ىندە الەمنىڭ جۇيرىكتەرى جيىلعان جارىستا جۇلدەگەر بولعان. بۇل قالاي دەرسىز؟ ونىڭ ادال دارىگەرى ەليزابەت بوديكەر مەديتسينالىق ەمدەۋ تولىق ناتيجە بەرمەگەندىكتەن باسقا جولىن ىزدەپ, 9 جىل بويى اتقا مىنگىزىپ ەكسپەريمەنت جاسايدى. ونىڭ جەڭىسى – كۇمىس مەدال. بۇعان ءبارى تاڭعالادى, دۇنيەنى ءدۇر سىلكىندىرگەن وسى وقيعادان كەيىن اتقا مىنگىزۋ ارنايى تەراپيا تۇرىنە اينالادى.
1953 جىلى العاش رەت نورۆەگيادا مۇگەدەك بالالارعا ارنالعان اتقا مىنگىزىپ ەمدەيتىن ورتالىق اشىلدى. ارتىنشا الەمنىڭ ءتۇرلى ەلدەرىندە ىسكە قوسىلا باستادى. قازىر اقش-تا 1000, ال ۇلىبريتانيادا 700 ورتالىق جۇمىس ىستەيدى. فرانتسيا ءتىپتى وسى تەراپيا ماماندارىن دايىنداۋدى قولعا العان.
اتقا مىنۋگە قايدا بارۋعا بولادى؟ بارلىق قالادا يپپودروم بولۋى كەرەك. ءوز قالاڭىزدان سونداي ورىندى تاۋىپ الىڭىز, ونداعى اتتار ارنايى ۇيرەتىلگەن, سونداي-اق كومەكتەسەتىن ماماندار دا جانىڭىزدان تابىلادى. العاشقى مىنۋشىلەرگە اساۋ اتتاردان الشاق بولعان دۇرىس. ال استانالىقتار ءۇشىن تومەندە يپپودرومدار ءتىزىمىن ۇسىنا كەتكىمىز كەلەدى:
«تۇلپار» ات-سپورت كەشەنى, ەڭلىك-كەبەك كوشەسى, 22;
«قازانات» يپپودرومى, روجدەستۆو تاس جولى, 1;
«قۇلاگەر» سپورت كەشەنى, جاعاجاي 59.
ايدانا شوتبايقىزى,
«Egemen Qazaqstan»