اقتوبە قالاسىنداعى «ونەر ورتالىعى» كونتسەرت زالىندا وتكەن مۋزىكالىق كەشتە ع.جۇبانوۆ اتىنداعى وبلىستىق فيلورمونيانىڭ 25 ءانشىسى رەكورد جاسادى. ولار ءار 20 مينۋت سايىن 150 مارتەدەن «اقتوبە» ءسوزىن انگە قوسىپ, ءبىر ساعاتتا 450 رەت «اقتوبە» دەپ ايتتى. ءبىر قىزىعى, مۇنداي وقيعا ەلىمىزدىڭ ەشبىر قالاسىندا بولماعان.
بيىل اقتوبە وبلىسىنىڭ ورتالىعى اقتوبە قالاسىنىڭ ىرگە قالاعانىنا 150 جىل تولادى. مەرەيتويدىڭ العاشقى شاراسى وسىلاي باستالدى. وبلىستىق ونەر ۇجىمىنىڭ «قۇتتى مەكەن اقتوبەم» اتتى كونتسەرتىنە قر ەڭبەك سىڭىرگەن قايراتكەرى م.ءايتىموۆ, مادەنيەت سالاسىنىڭ ۇزدىكتەرى ورال-قوساي بايسەڭگىر, ج.نۇرقاسىموۆا, بەلگىلى انشىلەر گ.ساعىنعانوۆا, ا.ماجىكباەۆ, د.ايتجانوۆ, ا.ماقاشەۆ, م.ساپاروۆا, ا.تولەسىنوۆ, ج.بەكبوسىنوۆ, م.ەسەتوۆ, گ.ءبورىباسوۆا, ا.ەستىلەۋوۆا, ە.قۇماروۆ, ن.وماروۆ, س.بەگىمان, ا.ۋرازوۆا, ءا.شاكىروۆ, ە.الدانازاروۆ, ب.بالماعامبەتوۆا, ە.دۇيسەەۆ, «تامسان» توبى, ءو.ەلەكوۆ, شىنتاس-ايناگۇل وماروۆتار جانە ۆيا «جاسىن» (مۇعالجار اۋدانى), «قوس-نۇر» دۋەتى قاتىستى.
«اقتوبە قالاسىنىڭ مەگاپوليس شاھارعا اينالۋىنا بارلىق مۇمكىندىگىمىز بار. سوڭعى جىلدارى اقتوبەنىڭ ساۋلەتتىك كەلبەتى ادام تانىماستاي وزگەرىپ, ەكونوميكاسىنىڭ وركەندەگەنىنە ءبارىمىز كۋامىز. وعان ارقايسىمىزدىڭ ەڭبەگىمىز ءسىڭدى, ارقايسىڭىز ۇلەس قوستىڭىزدار. بۇگىنگى كونتسەرتتىڭ دە ەرەكشە جاعدايدا وتكەنىن قۋانىشپەن تاماشالادىق. كوركەمونەرپازدارىمىزدىڭ ءۇش ساعاتتىق شارادا «اقتوبە» ءسوزىن 450 مارتە ايتقانى دا رەكورد, ونى سىزدەردىڭ تىڭداعاندارىڭىز دا رەكورد», دەدى قالا اكىمى ءىلياس يسپانوۆ انسۇيەر اقتوبەلىكتەرگە ايتقان سوزىندە.
ايتا كەتەيىك, ءان كەشىندە اق جاۋلىقتى اجەلەر شاشۋ شاشسا, ء«بىز بىرگەمىز!» جانە «150 يگى ءىس» اكتسياسى اياسىندا «قاراكەت» قورىنىڭ قولداۋىمەن 1-توپتاعى مۇگەدەك ماناس قۇلماعانبەتوۆ ءۇش بولمەلى پاتەر كىلتىنە يە بولدى. سونىمەن قاتار اقتوبەگە ارنالعان اندەردىڭ اۆتورلارى مەن ورىنداۋشىلارىنا قالا اكىمىنىڭ العىس حاتى تاپسىرىلدى.