قازاق ۇلتتىق قىزدار پەداگوگيكالىق ۋنيۆەرسيتەتىندە الماتى قالاسىنداعى جاستار كوشباسشىلارىنىڭ كەڭەسى ءوتتى.
«JasStar moments» دەپ ات قويىپ, ايدار تاققان جيىننىڭ ۇيىمداستىرىلۋىنا تاربيە جانە الەۋمەتتىك جۇمىستار جونىندەگى دەپارتامەنتى مۇرىندىق بولدى.
جاستار جىلى قارساڭىندا قولعا الىنعان باسقوسۋعا جۋرناليستيكا, سپورت, بيزنەس جانە تاعى دا باسقا سالالاردا تابىسقا جەتكەن تۇلعالار بەلگىلى تاقىرىپ اياسىندا ءسوز سويلەپ, ءوز تاجىريبەلەرىمەن ءبولىستى.
– جوبانىڭ ماقساتى – وڭتۇستىك استاناداعى جاستار كوشباسشىلارىمەن بىرلەسە وتىرىپ جاستار جىلىندا اتقارىلار جۇمىستاردى جۇيەلەۋ, ناقتى جوسپار دايىنداۋ. جۇرتشىلىققا تانىمال, بەلگىلى ءبىر سالادا جەتىستىككە جەتكەن تۇلعالارمەن كەزدەسۋ وتكىزىپ,وسكەلەڭ ۇرپاقتىڭ پاتريوتتىق سەزىمدەرىن ارتتىرۋعا ىقپال ەتۋ. سونداي-اق قالا جاستارى اراسىندا ءوزارا تىعىز بايلانىس ورناتۋدى دا كوزدەپ وتىرمىز, – دەيدى ۇيىمداستىرۋشىلار.
اتاپ ايتقاندا شارا بارىسىندا «ستۋدەنت – سپورت» تاقىرىبىندا سيدنەي وليمپياداسىنىڭ چەمپيونى, قازاقستانعا ەڭبەگى سىڭگەن سپورت شەبەرى ەرماحان يبرايموۆ پەن پاراليمپيادا ويىندارىنىڭ جەڭىمپازى, «100 جاڭا ەسىم» جوباسىنىڭ جەڭىمپازى سەرىك ەسماتوۆ, «ستۋدەنت – الەۋمەت» تاقىرىبىندا «جاستار ءۇنى» قوعامدىق بىرلەستىگىنىڭ توراعاسى داۋرەن بابامۇراتوۆ, «ستۋدەنت – مادەنيەت» تاقىرىبىندا تەلەجۇرگىزۋشى گۇلناز اۋدانباەۆا, «ستۋدەنت – بيزنەس» تاقىرىبىندا جاس كاسىپكەر اسەت جۇماقۇلوۆ جانە «ستۋدەنت – ءبىلىم» تاقىرىبىندا «بولاشاق» قاۋىمداستىعىنىڭ الماتى قالاسىنداعى فيليالىنىڭ ءتورايىمى قىمبات ابدىكەرىموۆا مەن اسحات ابجانوۆ ءسوز سويلەدى.
تاعىلىمى مول, موتيۆاتسياسى زور جيىنعا سونىمەن قاتار الماتى قالاسىنداعى 21 جوعارى وقۋ ورنىنان 70 دەلەگات, «قازاقستان ستۋدەنتتەر اليانسى» جانە «جاراسىم» جاستار ۇيىمىنىڭ مۇشەلەرى قاتىستى.
دەلەگاتتار قىزدار ۋنيۆەرسيتەتىنىڭ باستاماسىمەن ۇيىمداستىرىلىپ وتىرعان وسى تاقىلەتتەس باسقوسۋلاردىڭ جاستاردىڭ تانىم دەڭگەيى مەن سانا-سەزىمىن ءھام وي-ءورىسىن ارتتىرۋعا تيگىزەتىن سەپتىگى زور ەكەندىگىن ايتادى. ولار الداعى ۋاقىتتا ۋنيۆەرسيتەتتىڭ بەلسەندى ستۋدەنتتەرىنىڭ باستاماسىمەن ۇيىمداستىرىلعان وسىنداي فورماتتاعى جيىنداردى ءوز وقۋ ورنىندا دا وتكىزۋگە نيەت ءبىلدىردى.
انمەن اسپەتتەلگەن فورۋم اياسىندا قىزدار ۋنيۆەرسيتەتىنىڭ جاستار ۇيىمدارىنىڭ ءتورايىمدارى جانە بەلسەندىلەرى انت قابىلدادى.
ايناش ەسالي,
«Egemen Qazaqstan»
الماتى