جىلدار بويى ءسابي سۇيە الماي جۇرگەن ەرلى-زايىپتىلاردىڭ ەكستراكورپورالدىق ۇرىقتاندىرۋ ءادىسى №3 قالالىق اۋرۋحانادا جۇزەگە اسىرىلادى.
وسىندا رەپرودۋكتسيا بولىمشەسى اشىلعالى جاساندى جولمەن 23 ءسابي دۇنيەگە كەلگەن. اق حالاتتىلاردىڭ ايتۋىنشا, وتباسىلاردىڭ بالا سۇيە الماۋىنا كوبىنە ەر مەن ايەلدىڭ دەنساۋلىعىنداعى دىمكاستىك نەمەسە فيزيولوگيالىق ۇيلەسىمسىزدىك سەبەپ بولۋى مۇمكىن. بىراق مەديتسينانىڭ بۇگىنگىدەي قارىشتاپ دامىعان كەزىندە بەدەۋلىك اقىرعى ۇكىم ەمەس. سوڭعى جىلدارى نازىكجاندىلار اراسىندا ەكستراكورپورالدىق ۇرىقتاندىرۋدىڭ كومەگىنە جۇگىنۋشىلەر قاتارى ارتىپ كەلەدى. جۇرتشىلىققا بۇل پروتسەدۋرا “ەكو” دەگەن قىسقارتىلعان اتاۋمەن تانىس. مۇنداي جاساندى رەپرودۋكتسيا بولىمشەسى قالالىق №3 اۋرۋحانا بازاسىندا 2012 جىلدان بەرى جۇمىس ىستەيدى. زەرتحانالىق جولمەن دۇنيەگە كەلگەن العاشقى سولتۇستىكقازاقستاندىق ەگىز ۇل مەن قىز بيىل 6 جاسقا تولادى. بۇدان كەيىن وڭىردە ەكستراكورپورالدىق ۇرىقتاندىرۋ ارقىلى تاعى 21 ءسابي تۋعان.
«جۇرتشىلىققا ولاردىڭ تابيعي جولمەن تۋعان بالالاردان ەش ايىرماشىلىعى جوق ەكەندىگىن ءتۇسىندىرۋ وتە قيىن. سوندىقتان, اتا-انالار قوعامنىڭ قىزۋ تالقىسىنا ۇشىرايمىز دەپ جاسقانشاقتايدى. ەكستراكورپورالدىق ۇرىقتاندىرۋ بالا سۇيە الماي جۇرگەن ەرلى-زايىپتىلاردىڭ ارمانىنا قول جەتكىزۋلەرىنە مۇمكىندىك بەرەتىنىن باسا ايتقىم كەلەدى», دەيدى رەپرودۋكتولوگ دارىگەر ولگا زۆياگينا.
ول زەرتحانادا دارىگەر-رەپرودۋكتولوگ ەرلى-زايىپتىنىڭ جىنىستىق جاسۋشالارىن جاساندى جولمەن ۇرىقتاندىراتىنىن, ناتيجەسىندە پايدا بولعان ەمبريونداردىڭ بىرنەشەۋى بولاشاق انانىڭ قۇرساعىنا ەندىرىلەتىنىن جەتكىزدى. ايەل جاتىرىندا ەمبريونداردىڭ ەكىگە ءبولىنۋى دە عاجاپ ەمەس. وندايدا ومىرگە ەگىز سابيلەر دۇنيەگە كەلەدى. ال سىنامادا قالعان وزگە ەمبريونداردى قالاۋلارى بويىنشا كونسەرۆىلەۋگە بولادى. ولار 25 جىلعا دەيىن ساقتالادى. كونسەرۆىلەنگەن ەمبريونداردى پايدالانۋ مۇمكىندىگى بار.
بۇگىندە ەكستراكورپورالدىق ۇرىقتاندىرۋدى ءبىر رەت جاساۋ قۇنى 424 مىڭ تەڭگەنى قۇرايدى. بۇدان بولەك “ەكو پليۋس يكسي” باعدارلاماسى بار. ونىڭ باعاسى – 524 مىڭ 682 تەڭگە.
پەتروپاۆلداعى رەپرودۋكتسيا بولىمشەسى ەكستراكورپورالدىق ۇرىقتاندىرۋ پروتسەدۋراسىن تەك اقىلى تۇردە جۇرگىزەدى. ء سابي سۇيە الماي جۇرگەن جۇپتاردىڭ مەملەكەتتىك كۆوتاعا يە بولۋ مۇمكىندىگى دە جوق ەمەس. بيىلعى جىلى ەل قازىناسىنىڭ قاراجاتى ەسەبىنەن 25 سولتۇستىكقازاقستاندىق وتباسى ەكو جاساتقان. بىراق, تەگىن ۇرىقتاندىرۋ تەك الماتى, استانا جانە تاراز قالالارىندا جاسالادى.
وڭىردە ايەلدەردى جۇكتى ەتۋدىڭ تاعى بىرنەشە ءادىسى قولدانىلادى. سولاردىڭ ءبىرى – جاتىرىشىلىك ينسەميناتسيا. بۇل جاعدايدا كوبىنە جالعىزباستى نازىكجاندىلار دونوردىڭ كومەگىمەن بالالى بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىس