پەتروپاۆلدا وقۋشىلار وزدەرىن جايسىز سەزىنىپ, دارىگەرگە جۇگىنگەن

بۇل ءبىلىم وشاعىندا 180-گە جۋىق بالا ءبىلىم الادى.ولاردىڭ ۇشتەن ءبىرى وسىنداعى اسحانادان تاماقتانسا, وقىس وقيعا ورىن العان كۇنى  بىرقاتارى  وزدەرىن جايسىز سەزىنىپ, ونىڭ اقىرى جەدەل جاردەم شاقىرتۋعا تۋرا كەلگەن.

اتا-انالار  اسحاناداعى تاماق ساپاسىز ازىرلەنگەن  بولماسا وزگە ءبىر جۇقپالى ينفەكتسيا ارقىلى تارالۋى مۇمكىن دەگەن كۇدىكتەرىن جاسىرمايدى.

«كەشكە تامان  6 جاسار اليسامنىڭ دەنە قىزۋى كوتەرىلىپ, ءىشى اۋىرىپ, جۇرەگى اينىدى. ءتۇننىڭ ءبىر ۋاعىندا جاعدايى اۋىرلاعاننان كەيىن شۇعىل تۇردە  اۋرۋحاناعا جەتكىزىلدى», دەيدى انجەليكا تسيكۋن. ونىڭ  ايتۋىنشا قىزى اسحاناداعى تاماقتان ۋلانعان ءتارىزدى. ويتكەنى, اس قورىتۋ جۇيەسىنىڭ قابىنۋى, باۋىرىنىڭ ۇلكەيۋى سەكىلدى بەلگىلەر پايدا بولعان. 28 اتا-انادان شاعىم ءتۇسىپتى.

الايدا اسقا جاۋاپتى «لىسەنكو» جەكە كاسىپكەرلىگىنىڭ ديرەكتورى اتا-انالاردىڭ جورامالىن  جوققا شىعارىپ وتىر. وسى سالادا 12 جىل بويى جۇمىس ىستەيتىن بيزنەسمەن  تاعامنىڭ سانيتارلىق نورما مەن تالاپقا ساي كەلەتىنىن ايتادى. تاعامدار وقۋشىلارعا بەرىلمەس بۇرىن مەيىربيكەمەن بىرگە تەكسەرىلەتىن كورىنەدى. بالالار توسەك تارتىپ قالعان كۇنى اس مازىرىندە سالات, بالىق پەن كارتوپ ەزبەسى بولىپتى.

ۆالەنتينا فريدريحتىڭ بالاسى دا قاتتى سىرقاتتانىپ قالىپتى.  دارىگەرلەر ىشەك ۋلانۋى دەگەن دياگنوز قويعان.  بىراق ۇلى اسحانادان تاماق ىشپەپتى. سوندىقتان اسپازدارعا كىنا تاقپايدى.

ءتىپتى مەكتەپ ديرەكتورى راۋشان رامازانوۆا  دا ءوزىن  جايسىز سەزىنىپ, جەدەل جاردەم شاقىرتىپتى. دارىگەرلەر روتاۆيرۋستىق جۇقپا دەگەن دياگنوز قويىپتى. ول دا بالاردىڭ تاماقتان ۋلانۋىن جوققا شىعارادى. مەكتەپ ىشىندە ينفەكتسيا بولۋى مۇمكىن دەيدى.

ۋايىمداۋعا ەش نەگىز جوق دەگەن ۇيعارىممەن قالالىق قوعامدىق دەنساۋلىق ساقتاۋ باسقارماسى دا كەلىسىپ وتىر.

ءومىر ەسقالي,

«ەگەمەن قازاقستان»

سولتۇستىك قازاقستان وبلىسى