مەملەكەتتىك «نۇرلى جول» باعدارلاماسىندا ەرەكشە ماڭىز بەرىلگەن ىشكى كوشى-قون ۇدەرىسىن رەتتەۋ, ەڭبەك رەسۋرستارىنىڭ تەڭگەرىمدىگىن ارتتىرۋ مىندەتتەرى شىعىس قازاقستان وبلىسىندا جۇيەلى تۇردە جۇزەگە اسىرىلىپ كەلەدى.
وبلىس ەلدەن جىراقتاعى قانداستارىمىز بەن ەڭبەك كۇشى جەتكىلىكتى وڭىرلەردىڭ تۇرعىندارىن كوشىرىپ اكەلۋ جۇمىستارىن ودان ءارى جالعاستىرۋدا. ماسەلەن, 2018 جىلى ايماققا 1816 ادام (608 وتباسى) كوشىپ كەلىپتى. ەلىمىزدىڭ وڭتۇستىك وڭىرلەرىنەن شىعىسقا قونىس اۋدارعان تۇرعىنداردىڭ ماماندىقتارى - قازاق جانە اعىلشىن تىلدەرى, دەنەشىنىقتىرۋ جانە ەڭبەك پاندەرىنىڭ مۇعالىمدەرى, پسيحولوگتار, دارىگەرلەر, بۋحگالتەرلەر, ەلەكترومونتەرلار, ۆەتەرينارلار.
قازىرگى ۋاقىتتا وبلىسقا قازىق بايلاعان 483 ەڭبەككە جارامدى ادامنىڭ 364-ءى وزدەرىنە جۇمىس تاۋىپتى. جەرگىلىكتى بيلىك ولاردىڭ اراسىنداعى كاسىپ اشۋعا نيەتتى ازاماتتارعا ويلارىن ىسكە اسىرۋلارى ءۇشىن 100 اەك (ايلىق ەسەپتىك كورسەتكىش) دەيىن گرانتتار بولۋدە. گرانتقا قولى جەتكەن وبلىستىڭ جاڭا تۇرعىندارىنىڭ ءبىرى پەش ساتىپ الىپ, تاندىر پىسىرۋگە كىرىسسە, ەكىنشىسى قوناق ءۇي مەن ءدامحانانى جالعا الىپ, شارۋاسىن دوڭگەلەتۋدە. مەملەكەت كوشىپ كەلۋشىلەرگە قونىس اۋدارۋ شىعىندارى مەن باسپانا ساتىپ الۋلارى ءۇشىن سۋبسيديا بەرەدى. ولار ءۇشىن ارنايى تۇرعىن ۇيلەر دە سالىنۋدا.
ماسەلەن, شەمونايحا اۋدانىندا وتكەن جىلى كوشىپ كەلۋشىلەرگە 60 پاتەرلى تۇرعىن ءۇي پايدالانۋعا بەرىلدى. 2019 جىلى «سەرپىن» باعدارلاماسى بويىنشا جەرگىلىكتى وقۋ ورىندارىن 208 ستۋدەنت ءتامامدايدى. باعدارلاما شارتىنا سايكەس وقۋ ورنىن بىتىرگەن تۇلەكتەر ءبىزدىڭ وبلىستا ءۇش جىلدان كەم ەمەس مەرزىم ەڭبەك ەتۋلەرى ءتيىس. ء«بىز بۇل ماسەلەگە مەملەكەتتىك مۇددە تۇرعىسىنان قاراۋىمىز قاجەت. وبلىستىڭ شالعايداعى شەكارالىق اۋداندارىنان ادامدار كوشىپ جاتىر. ول جاقتارعا جۇمىس كۇشى كەرەك. ال وڭتۇستىكتە ءبىزدىڭ جاققا كوشىپ كەلۋگە دايار وتىرعان ادامدار بار. ءبىز ولاردى وزىمىزگە تارتۋىمىز قاجەت. مۇنىڭ ەشقانداي ساياسي استارى جوق, قالىپتى ەكونوميكالىق, ۋربانيزاتسيالىق ءۇردىس. وڭتۇستىك وڭىرلەردە حالىق اسا تىعىز قونىستانعان. ينفراقۇرىلىم نىساندارى – مەكتەپتەر, بالاباقشالار جەتىسپەيدى. وسى رەتتە تەڭگەرىمدى قامتاماسىز ەتۋ ءۇشىن ەڭبەك رەسۋرستارىن دۇرىس بولە ءبىلۋ قاجەتتىلىگى تۋىندايدى»,- دەيدى وبلىس اكىمىنىڭ ورىنباسارى اسەم ءنۇسىپوۆا.
قازاقستاندا ەڭبەك كۇشى ارتىق وڭىرلەر قاتارىنا الماتى, جامبىل, تۇركىستان, ماڭعىستاۋ, قىزىلوردا وبلىستارى جانە شىمكەنت قالاسى كىرەدى.
ازامات قاسىم,
«Egemen Qazaqstan»
شىعىس قازاقستان وبلىسى