18-20 قىركۇيەك كۇندەرى استانادا «PATA Travel Mart» اتتى حالىقارالىق كورمە وتەدى. بۇل تۋرالى «Kazakh Tourism» ۇك-نىڭ ءباسپاسوز قىزمەتى حابارلادى.
حالىقارالىق كورمەنى وتكىزۋ تۋرالى كەلىسىمگە PATA (Pacific Asia Travel Association) پرەزيدەنتى, دوكتور ماريو حاردي مەن «Kazakh Tourism» ۇلتتىق كومپانياسىنىڭ باسقارما توراعاسى راشيد كۇزەمباەۆ قول قويدى.
ء«بىز كورمەنىڭ PATA تاريحىندا العاشقى رەت ورتالىق ازيا تەرريتورياسى بويىنشا قازاقستاندا وتەتىنىنە قۋانىشتىمىز. ازيا مەن ەۋروپانىڭ توعىسقان جەرىندە ورنالاسقان قازاقستان حالىقارالىق تۋريستىك كورمەنى ۇيىمداستىرۋ ءۇشىن ناعىز قولايلى ەل. ال, استانا شىعىس جانە باتىس مادەنيەتى مەن مۇراسىنىڭ ءوزارا ۇيلەسىمى كەلىسكەن ەرەكشە قالا. شارانى وتكىزۋدى ءوز جاۋاپكەرشىلىگىنە العان قازاقستانمەن كورمەدە ەرەكشە دۇنيە ۇسىنىپ, بىرىگىپ جۇمىس ىستەۋدى اسىعا كۇتەمىز», - دەدى PATA پرەزيدەنتى ماريو حاردي.
حالىقارالىق كورمە قر مادەنيەت جانە سپورت مينيسترلىگى مەن «Kazakh Tourism» اق-نىڭ ۇيىمداستىرۋىمەن جانە استانا قالاسى اكىمدىگىنىڭ قولداۋىمەن وتەدى.
«كورمە وتكىزۋدى ازيانىڭ ءىرى قالالارىنىڭ ىشىندە استانانىڭ جەڭىپ الۋى, ونىڭ ىسكەرلىك جانە تۋريزم بويىنشا ستاتۋسىنىڭ جوعارىلىعىن دالەلدەيدى. كورمەگە الەمنىڭ تۇكپىر-تۇكپىرىنەن شامامەن 1200 اسسوتسياتسيا مۇشەلەرى كەلەدى. نەگىزىنەن باسىمدىق تۋريزم نارىعى ءۇشىن ماڭىزدى بولىپ تابىلاتىن ازيا جانە ەۋروپا ەلدەرىنە بەرىلەدى. اتالعان شارادان سوڭ شەتەل تۋريستەرىنىڭ ءبىزدىڭ ەلگە دەگەن قىزىعۋشىلىعىنىڭ ارتا تۇسەتىنىنە سەنىمدىمىز», - دەدى «Kazakh Tourism» ۇلتتىق كومپانياسىنىڭ باسقارما توراعاسى راشيد كۇزەمباەۆ.