نازارباەۆ ۋنيۆەرسيتەتىندە Self-made جاستار فورۋمى ءوتتى. شارانى قازاقستان حالقى اسسامبلەياسى كاسىپكەرلەر قاۋىمداستىعى جاستار جىلىنىڭ اشىلۋى اياسىندا, جەتىستىككە جەتكەندەردىڭ كوشباسشىلىق قۇپياسىن كاسىپكەرلىككە ەندى بەت بۇرىپ كەلە جاتقان جاندارعا جەتكىزۋ ماقساتىندا ۇيىمداستىرعان.
TEDx فورماتىندا وتكەن شارادا سپيكەرلەر وزدەرىنىڭ تابىستى كەيستەرى, كاسىپكەرلىك سالاسىنداعى مەملەكەتتىك قولداۋ جانە جاستار ساياساتى تۋرالى اڭگىمەلەيدى, كاسىپكەرلىكتى باستاۋ مەن ونى دامىتۋ اياسىندا بىلگەنىمەن ءبولىستى. فورۋم نەگىزىنەن جاس كاسىپكەرلەردىڭ اگرارلىق سەكتورداعى, عىلىمداعى, جەڭىل ونەركاسىپتەگى, جاسىل تەحنولوگيالاردى دامىتۋداعى بيزنەس باستامالارىن, ستارتاپ-جوبالارىن قولداۋدى كوزدەيدى.
ءىس-شارا بارىسىندا كاسىپكە بەت بۇرعان جانداردىڭ جۇمىستارىن كورسەتەتىن كورمە ۇيىمداستىرىلعان. كورمەدە قازاقى ناقىشپەن زاماناۋي ماتەريالداردان تىگىلگەن كوستيۋمدەر كوزگە جىلى ۇشىراستى. كوركەم جۇمىستاردىڭ يەسىن سوزگە تارتقانىمىزدا ونىڭ ايگىلى ءابىلحان قاستەەۆتىڭ شوبەرەسى ەكەنىن بىلدىك. قازاق ۇلتتىق ونەر ۋنيۆەرسيتەتىندە «كوستيۋم سۋرەتشىسى, تەاتر جانە كينو» ماماندىعىنىڭ 4 كۋرسىندا وقيتىن ءايسانىم قاستەەۆا كورمەگە قويىلعاندار – سەمەستر سايىن وتكىزەتىن ەمتيحان جۇمىستارى ەكەنىن ايتتى. ستۋدەنتتىڭ ديپلومدىق تا ەمەس, كوپ ەمتيحاندارىندا تىككەن كيىمدەرى مەن ىستەگەن بۇيىمدارى شىنىندا كوز تارتارلىق. ءبىر كيىمنىڭ ارقاسىنا ۇزاتىلعالى تۇرعان قىز كەلبەتىن بەينەلەسە, ەكىنشى بىرىندە ۇزاتۋ الدىنداعى ساۋكەلەلى قىز بەن ونى شىعارىپ سالىپ تۇرعان سۇلۋ قۇربىسىنىڭ قيماستىق سەزىمىن سۋرەتتەگەن.
ء«وزىمنىڭ اۆتورلىق ويۋلارىم بار, اتامنىڭ قالدىرعان باي مۇراسى دا بىرازعا ازىق. سونىڭ بارىنە وقۋ ورنىندا جيعان ءبىلىمىمدى قوسىپ, كيىم ارقىلى ۇلتىمىزدىڭ داستۇرلەرىن كورسەتكىم كەلدى», دەيدى ول. ءايسانىم شاراعا «شەبەرلەر اليانسى» قوعامدىق قورىنىڭ شاقىرتۋىمەن كەلگەن. اعىلشىن ءتىلىن جەتىك مەڭگەرگەن شەبەر قىز بولاشاقتا ۇمىتىلىپ بارا جاتقان ادەت-عۇرىپتارىمىزدى اعىلشىن تىلىمەن قاتار ۇيرەتۋدى كوزدەيدى. الەمدە قازىر برەندكە اينالعان ءتىلدىڭ ارقاسىندا ۇلتتىق ناقىشتى دا قايتا جاڭعىرتۋدى جوسپارلايدى. «وسىنداي باعىتتا وقىتاتىن بالالار ورتالىعىن اشقىم كەلەدى. جوبا كوپ, قارجى جاعى قينايدى, جولىمىزدى كەسكەستەيدى. وسى فورۋمعا سول ماسەلەمدى شەشۋ نيەتىندە كەلدىم, مەتسەناتتاردان قولداۋ كۇتەمىن», دەيدى ول. قازاقستان حالقى اسسامبلەياسى توراعاسىنىڭ ورىنباسارلارى لەونيد پروكوپەنكو «دوستىق ۇيىنەن» شەبەرحانا بەرۋگە ۋادە ەتىپتى.
ايدانا شوتبايقىزى,
«Egemen Qazaqstan»