جاستىڭ قۋاتى – ءبىلىم-بىلىگىندە

مەملەكەت باسشىسىنىڭ ۇسىنىسىمەن 2019 جىل جاستار جىلى دەپ جاريالاندى. جاستىڭ قۋاتى – ءبىلىمى مەن بىلىگىندە, بىرلىگى مەن پاتريوتتىعىندا. ءبىز بابالاردان ميراس بولعان اتامەكەنىمىزدى تاۋەلسىز ەل ەتتىك. تۇرمىسى شالقىپ, ءتۇتىنى ءتۇزۋ ۇشقان باقۋاتتى مەملەكەتكە اينالدىردىق. ەلباسىنىڭ جار­لى­عىمەن بيىلعى جىلدى جاستار جىلى دەپ جاريالاۋى – جاستار ساياساتىنا, جاستار پروبلەماسىن شەشۋگە كوزقاراستاردى تۇبەگەيلى قايتا قاراۋعا, وزگەرتۋگە باعىت­تالعان يگى ءىس. 

جىل بويى ءار شارانىڭ سيپاتى, ناتيجەسى بارىسىنا مونيتورينگ جۇرگىزىپ, جاۋاپتى ادامداردىڭ كاسىبي دەڭ­گەيى دۇرىس باعالانىپ وتىرۋ كوزدەلۋدە. جاقسى ناتيجە كور­سەت­كەندەردى ماراپاتتاۋ, ەلگە ناسيحاتتاۋمەن قاتار, ناتيجەسىز جۇمىس ىستەپ, قارجىنى ءتيىم­سىز جاراتقان ادامعا قارسى قولدانىلاتىن امال-شارانىڭ تۇرلەرىن ازىرلەۋ جوسپارلانۋدا. تەك وسىلاردى قول­عا العان­دا عانا جىلدان دۇرىس ناتيجە كۇتۋ­گە بولادى.

ەركەبۇلان بازارباەۆ,

مەركى اۋدانى اكىمدىگى ىشكى ساياسات ءبولىمى «جاستار رەسۋرستىق ورتالىعى» كمم-ءنىڭ ديرەكتورى

جامبىل وبلىسى  

ماماندىق تاڭداۋدا قاتەلەسپەيىك

مەملەكەت باسشىسى جاستاردى قولداۋ جونىندە ۇكىمەتكە بۇرىننان تاپسىرما بەرىپ كەلەدى. وسىعان وراي قىزىلوردا وبلىسىنىڭ اكىمى قىرىمبەك كوشەرباەۆ جاستاردى قولداۋدا وزگە ايماقتارعا ۇلگى بولاتىن­داي باستامالار كوتەرگەن. كو­ر­شى­لەس رەسەيدە ءبىلىم الىپ, ەلگە ورال­عان العاشقى تۇلەكتەر – وسى باس­تامانىڭ وڭ ناتيجەسى.

مەن دە وبلىس اكىمدىگىنىڭ قولداۋىمەن وسى مۇمكىندىككە يە بولعان جاس رەتىندە سالىستىرا ايتار بولسام, ەكى ەلدىڭ جاستارى بىردەي دەڭگەيدە. مەملەكەت تاراپىنان جاسالاتىن جاعدايعا كەلەر بولساق, قوعامدىق كولىك جولاقىسىنا جەڭىلدىككە بىزدە مەكتەپ وقۋشىلارى عانا يە بولسا, رەسەيدە ستۋدەنتتەر مەن ماگيسترانتتارعا دا جەڭىلدىك قاراستىرىلعان. مەنىڭشە, ءبىزدىڭ ەل جاستارىنا ماماندىق تاڭداۋدا, جوو-عا قۇجات تاپسىراردا كوبىرەك كومەكتەسۋ قاجەت. وقۋشى كەزىندە دۇرىس موتيۆاتسيا بەرىلىپ, الەمدىك دەڭگەيدەگى جوو-عا نە جۇمىس ورنىنا كەرەكتى قۇجاتتار ءتىزىمىن كورسەتە وتىرىپ, بولاشاقتاعى پەرسپەكتيۆالارمەن قىزىقتىرا بىلسە جاقسى بولار ەدى. ايت­پەسە بىرەن-ساران ابدەن ىزدە­نىپ, زەرتتەيتىندەر بولماسا, كوپ­شىلىگى شەتەلدە وقۋ مۇم­كىندى­گىنەن بەيحابار قالىپ جاتادى. ءدال وسى سەكىلدى, وتاندىق كاسىپ­ورىنداردىڭ قولداۋى, جاستارعا قاراستىرىلاتىن جەڭىلدىكتەر تۋرالى جاستار اراسىندا ۇگىت-ناسيحات جۇرگىزىلسە, ارتىقتىق ەت­پەيدى. «سايتتا بار, ينتەرنەت­تە تۇر عوي» دەگەنمەن, كوبى ءدال ۋا­قى­تىندا بىلمەي قالىپ جاتادى.

ەلباسىنىڭ ايماقتاردا نازارباەۆ ۋنيۆەرسيتەت سياقتى جەتەكشى وقۋ ورىندارىنىڭ بولۋ قاجەتتىگى تۋرالى ايتقان ويى جاستارىمىزدىڭ شەتەلدە العان ءبىلىمدى وزىمىزدە دە قول جەتكىزۋگە بولاتىندىعىن كور­سەتەدى. ويتكەنى ساپالى ءبىلىم كۇتكەن ۇدەگە جەتكىزەدى.

ەلامان مەڭدىقۇل,

«ماسكەۋ بولات جانە قورىتپالار ينستيتۋتى» ۇلتتىق زەرتتەۋ تەحنولوگيالىق ۋنيۆەرسيتەتىنىڭ تۇلەگى

قىزىلوردا وبلىسى