مەملەكەتتىڭ جاستارعا باعىتتالعان وڭ ساياساتىنىڭ ارقاسىندا قىتايدا, ۇلىبريتانيادا ءبىلىم الدىم. جاستىق شاعىمنىڭ ءبىراز جىلى امەريكا قۇراما شتاتتارىندا ءوتتى. باستاپقىدا ءىسىمدى جارناما سالاسىنان باستاعانىممەن, قازىر بيزنەستەگى ارىپتەستەرىممەن بىرگە وندىرىسكە قاتىستى جوبالاردى جۇزەگە اسىرۋعا كىرىستىك. ەلىمىزدە بۇرعىلاۋ تۇربالارىن شىعاراتىن زاۋىت سالۋ جونىندە جوسپارىمىز بار. سونداي-اق وتاندىق انشىلەردى قولداۋعا باعىتتالعان جوبامىز دا جۇزەگە اسىرىلۋدا.
جالپى, ەلباسىنىڭ قاتىسۋىمەن وتكەن سالتاناتتى جيىندا مەملەكەت باسشىسىنىڭ جاستارعا قاتىستى ماسەلەلەرگە وتە تەرەڭنەن قارايتىندىعىنا تاعى ءبىر مارتە كوز جەتكىزدىم. پرەزيدەنتتىڭ ءاربىر ۇسىنىسى مەن تاپسىرماسى جاستاردىڭ ءال-اۋقاتىن ارتتىرىپ, الەۋمەتتىك تۇرعىدا قولداۋ بولاتىندىعىنا كامىل سەنەمىن.
مەن شەت مەملەكەتتەردە كوپ جۇرگەن جانداردىڭ ءبىرى رەتىندە ەلىمىزدە جاستاردىڭ ءبىلىم الىپ, كاسىبىن اشۋىنا تولىق جاعداي جاسالعاندىعىن نىق سەنىممەن ايتا الامىن. ەل ەكونوميكاسىنىڭ قاي سالاسىن الساق تا, ءالى تۇرەن تۇسپەگەن باعىتتار بار. دەمەك, ءبىلىم العىسى كەلگەن, بايىعىسى كەلگەن زامانداستارىمىز دا جەردەگى جۇماقتى شەتتەن ىزدەمەۋى ءتيىس.
ەڭ باستىسى, مەملەكەت باسشىسى جاستارعا تولىق قولداۋ كورسەتۋدە. مەن ەلگە كەلگەندە جاستاردىڭ ەلدەگى ماڭىزدى باعدارلامالاردان, جوبالاردان حابارسىز ەكەندىگىنە كوز جەتكىزدىم. سوندىقتان قۇزىرلى ورىندار جاستار اراسىندا اعارتۋشىلىق قىزمەتكە كوبىرەك كوڭىل بولسە ەكەن. ويتكەنى اسىرەسە, شالعاي اۋىلداعى جاستار مەملەكەت تاراپىنان كورسەتىلەتىن جەڭىلدىكتەردى بىلمەيدى.
ال قولىنا دايىن بالىق ەمەس, قارماق العان جاستاردىڭ ءوسىپ-وركەندەۋى وزدەرىنە بايلانىستى. تاۋەلسىز قازاقستاننىڭ تاريحىندا تۇڭعىش رەت جاستار جىلىنىڭ جاريالانۋى بولاشاققا سەنىمدى ارتتىرا تۇسەدى.
شالقار امانباەۆ,
جەكە كاسىپكەر