ەكونوميكالىق ديپلوماتيانىڭ ناتيجەسى

ساران قالاسىنداعى ەلەكتر ستان­سا­سىنىڭ ىسكە قوسىلۋى مەملەكەت باسشى­سىنىڭ سىرتقى ساياساتتى «ەكونوميزاتسيالاۋ», قازاقستانعا وزىق تاجىريبەنى, ءبىلىمدى, تەحنولوگيا مەن ينۆەستيتسيالاردى تارتۋ بويىنشا مىندەتتەرىن جۇزەگە اسىرۋدىڭ جارقىن ۇلگىسى بولىپ تابىلدى.

قىسقا مەرزىمدە ىسكە اسىرىلعان جوبا ورتالىق جانە جەرگىلىكتى بيلىك ورگان­دارىنىڭ گەرمانيا, چەحيا جانە سلوۆاكيا مەملەكەتتەرى كومپانيالارىنىڭ توبىمەن, سونداي-اق ەۋروپا قايتا قۇرۋ جانە دامۋ بانكىمەن (ەققدب) بىرلەسكەن جۇمىستىڭ ناتيجەسى بولدى.

ەلەكتر ستانساسىنىڭ قۇرىلىسى بارىسىندا جەرگىلىكتى مازمۇنعا, ونىڭ ىشىندە سارانداعى كومپانيالاردان ەڭبەك ءونىمدى, بۇيىمداردى جانە قۇرىلىس ماتەريالداردى تارتۋعا ەرەكشە نازار اۋدارىلدى. سونىمەن قاتار جاڭا ەلەكتر ستانساسىندا جەرگىلىكتى تۇرعىندار ءۇشىن جۇمىس ورىندارى اشىلدى. ەلەكتر ستانساسىنىڭ ىسكە قوسىلۋى ەلىمىزدەگى جاڭارتىلاتىن ەنەرگيا كوزدەرىنىڭ ۇلەسىن ارتتىرۋ, «جاسىل» تەحنولوگيالارعا كوشۋ بويىنشا پرەزيدەنت نۇرسۇلتان نازارباەۆتىڭ تاپ­سىرمالارىن ىسكە اسىرۋدىڭ تاعى ءبىر قادامى بولدى.

بۇل تۋرالى ەنەرگەتيكا ءمينيسترى قانات بوزىمباەۆ, گەرمانيانىڭ قازاقستانداعى ەلشىسى تيلو كليننەر, قاراعاندى وبلى­سىنىڭ اكىمى ەرلان قوشانوۆ, «جاسىل تەحنولوگيالار جانە ينۆەستيتسيالىق جوبالار حالىقارالىق ورتالىعى» اق باسشىسى ءراپىل جوشىباەۆ اتاپ ءوتتى. بۇعان دەيىن «ساران قالاسىندا 100 مۆت قۋاتى بار كۇن ەلەكتر ستانساسىن سالۋ» جوباسى «استانا ەكسپو-2017» ما­مان­داندىرىلعان كورمەسى اياسىندا تانىس­تى­رىلدى.

اشىلۋ راسىمىنە دەيىن تاراپتار 500 ملن اقش دوللارىن قۇرايتىن ينۆەستيتسيالاردى كەڭەيتۋدى كوزدەيتىن «SES Saran» جوباسىن دامىتۋ تۋرالى مەمو­ران­دۋمعا قول قويدى.

سونىمەن قاتار رەسمي اشىلۋ راسىمىنە قازاقستان سىرتقى ىستەر مينيسترلىگىنىڭ وكىلدەرى قاتىسىپ, قاراعاندى وبلىسى مەن گەرمانيالىق «Goldbek Solar» كومپانياسىنىڭ باسشىلىعى كەلىسسوزدەر جۇرگىزدى. كەلىسسوزدەردىڭ ناتيجەلەرى بويىنشا, ەۋروپالىق ينۆەستورلاردىڭ قاتىسۋىمەن ايماقتىق جوبالاردى ىلگەرىلەتۋدە جانە ولاردىڭ تەحنولوگيالارىن تارتۋعا ەكونوميكالىق ديپلوماتيانى ودان ءارى دامىتۋ تۋرالى كەلىسىمدەرگە قول جەتكىزىلدى.

دايىنداعان جولدىباي بازار,

«Egemen Qazaqstan»