مەملەكەت باسشىسى نۇرسۇلتان نازارباەۆ زيمبابۆە رەسپۋبليكاسىنىڭ پرەزيدەنتى ەممەرسون منانگاگۆامەن كەزدەستى.
قازاقستانعا رەسمي ساپارمەن كەلگەن زيمبابۆە رەسپۋبليكاسىنىڭ پرەزيدەنتى ەممەرسون منانگاگۆانى سالتاناتتى قارسى الۋ راسىمىنەن كەيىن كەڭەيتىلگەن قۇرامداعى كەلىسسوز ءوتتى.
مەملەكەت باسشىسى ەكى ەل اراسىنداعى قارىم-قاتىناستاردى تەرەڭدەتۋدىڭ ماڭىزدىلىعىن اتاپ ءوتىپ, ىقپالداستىقتى ودان ءارى دامىتۋدىڭ نەگىزگى باعىتتارىنا ارنايى توقتالدى.
– ءبىز سىرتقى ساياساتىمىزدا, سونىڭ ىشىندە افريكا باعىتىندا كەڭ اۋقىمدى ساۋدا قارىم-قاتىناستارىن دامىتۋعا جانە حالىقارالىق باستامالاردى ءوزارا قولداۋعا ۇمتىلاتىن بولامىز, – دەدى قازاقستان پرەزيدەنتى.
زيمبابۆە رەسپۋبليكاسىنىڭ پرەزيدەنتى قازاقستانعا رەسمي ساپارمەن كەلۋگە مۇمكىندىك تۋعىزىپ, زيمبابۆە دەلەگاتسياسىنا قوناقجايلىق كورسەتكەنى ءۇشىن مەملەكەت باسشىسىنا العىس ايتتى.
كەزدەسۋ بارىسىندا تاراپتار اۋىل شارۋاشىلىعى مەن تاۋ-كەن ونەركاسىبى سالالارى بويىنشا ەكىجاقتى ىنتىماقتاستىق ورناتۋ, سونداي-اق زيمبابۆەنىڭ كولىك-لوگيستيكا جەلىسىن جاڭعىرتۋ جانە قايتا وڭدەۋ ىسىندە بىرلەسكەن جوبالاردى ىسكە اسىرۋ ماسەلەلەرىن تالقىلادى.
مەملەكەت باسشىسى نۇرسۇلتان نازارباەۆ زيمبابۆە رەسپۋبليكاسىنىڭ پرەزيدەنتى ەممەرسون منانگاگۆانىڭ رەسمي ساپارىنىڭ قورىتىندىسى بويىنشا بۇقارالىق اقپارات قۇرالدارى وكىلدەرى ءۇشىن بريفينگ وتكىزدى.
نۇرسۇلتان نازارباەۆ باق وكىلدەرى الدىندا سويلەگەن سوزىندە بۇل ساپاردىڭ 1992 جىلى قازاقستان مەن زيمبابۆە اراسىندا ديپلوماتيالىق بايلانىستار ورناتىلعاننان بەرى العاش رەت جۇزەگە اسىرىلعانىن اتاپ ءوتتى.
– بۇگىنگى كەزدەسۋدىڭ ەكى ەل اراسىنداعى, سونداي-اق ورتالىق ازيا مەن وڭتۇستىك افريكا وڭىرلەرىنىڭ ءوزارا قاتىناستارىن نىعايتۋ ۇدەرىسىندەگى تاريحي ماڭىزى زور, – دەدى مەملەكەت باسشىسى.
قازاقستان پرەزيدەنتى ەكىجاقتى كەزدەسۋ بارىسىندا ساياسي ديالوگتى قولداۋ جانە ساۋدا ىنتىماقتاستىعىن كەڭەيتۋ جونىندەگى ۋاعدالاستىقتارعا قول جەتكىزىلگەنىن ايتتى.
– جەكەلەگەن باعىتتار بويىنشا ءوزارا قارىم-قاتىناس ورناتۋعا مۇمكىندىكتەر مول. ءبىزدىڭ ەلدەرىمىز اراسىندا كەيبىر ۇقساستىقتار بار. زيمبابۆە دە قازاقستان سياقتى پايدالى قازبالارعا وتە باي. اۋىل شارۋاشىلىعى سالالارىمىز دا بىردەي دامۋدا. قازاقستان تاۋ-كەن ونەركاسىبىندە ىنتىماقتاستىق ورناتۋ جانە تاجىريبە الماسۋ, زيمبابۆەگە اۋىل شارۋاشىلىعى ونىمدەرىن جەتكىزۋ ماسەلەلەرىن قاراستىرۋعا ءازىر, – دەدى نۇرسۇلتان نازارباەۆ.
مەملەكەت باسشىسى زيمبابۆە اۋماعىندا پايدالى قازبالار ءوندىرۋ سالاسىندا ءوزارا ىقپالداستىق ورناتۋدىڭ مۇمكىندىكتەرىنە توقتالدى.
سونداي-اق قازاقستان پرەزيدەنتى زيمبابۆەنىڭ كولىك-لوگيستيكا جەلىسىن جاڭعىرتۋ جانە قايتا وڭدەۋ ىسىندە بىرلەسكەن جوبالاردى ىسكە اسىرۋ جونىندەگى ىنتىماقتاستىقتىڭ الەۋەتى زور ەكەنىن اتاپ ءوتتى.
– جاھاندىق كۇن تارتىبىندەگى كوپتەگەن باستى ماسەلە بويىنشا وي-پىكىرلەرىمىز سايكەس كەلەدى. ءبىز قازاقستاننىڭ حالىقارالىق باستامالارىنا حارارەنىڭ قولداۋ بىلدىرگەنىن جوعارى باعالايمىز, – دەدى نۇرسۇلتان نازارباەۆ.
مەملەكەت باسشىسى كەلىسسوزدەر ناتيجەسىندە تاراپتار بىرىككەن ۇلتتار ۇيىمى اياسىندا بىرلەسكەن جۇمىستار مەن ءوزارا قولداۋ جونىندەگى قالىپتاسقان تاجىريبەنى جالعاستىرۋعا بايلانىستى نيەتتەرىن ماقۇلداعانىن ايتتى.
– ءبىز قازاقستان باقىلاۋشى ەل بولىپ سانالاتىن افريكا وداعى اياسىنداعى تىعىز ىنتىماقتاستىقتى ىلگەرىلەتۋ جونىندە ۋاعدالاستىق. جالپى, ەممەرسون منانگاگۆانىڭ استاناعا العاشقى رەسمي ساپارى ەكى مەملەكەتتىڭ ءتۇرلى سالالارداعى تىعىز قارىم-قاتىناستاردى ودان ءارى دامىتۋعا مۇددەلى ەكەنىن كورسەتىپ وتىر, – دەدى قازاقستان پرەزيدەنتى.
نۇرسۇلتان نازارباەۆ ساپار بارىسىندا قول جەتكىزىلگەن ۋاعدالاستىقتار ءتۇرلى باعىتتاعى ءوزارا ىنتىماقتاستىقتى دامىتۋعا وڭ سەرپىن بەرەتىنىنە سەنىم ءبىلدىردى.
زيمبابۆە رەسپۋبليكاسىنىڭ پرەزيدەنتى قازاقستاننىڭ ۇلتتىق ەكونوميكانى دامىتۋ جانە جاڭعىرتۋ جونىندەگى تاجىريبەسىن قولدانۋعا مۇددەلى ەكەنىن اتاپ ءوتتى.
– زيمبابۆەنىڭ قازىرگى دامۋى قازاقستاننىڭ وسىدان 20 جىل بۇرىنعى دەڭگەيىنە سايكەس كەلەدى. ءبىز دوستاس ەلدىڭ 27 جىل بويى ءوز ەكونوميكاسىن قالاي وركەندەتكەنى جونىندە ۇيرەنۋىمىز كەرەك. قازاقستاننىڭ مۇنداي جەتىستىككە جەتكەنىنە سۇيسىنەمىز ءارى وسىنداي دامۋ جولىمەن جۇرۋگە ۇمتىلامىز, – دەدى ەممەرسون منانگاگۆا.
زيمبابۆە رەسپۋبليكاسىنىڭ پرەزيدەنتى قازاقستاننىڭ ۇلتتىق ءال-اۋقات قورىن دامىتۋ جانە «استانا» حالىقارالىق قارجى ورتالىعىن قۇرۋ جونىندەگى تاجىريبەسىن اتاپ ءوتتى.
سونىمەن قاتار ەممەرسون منانگاگۆا زيمبابۆەنى قازاقستاننىڭ ۇلگىسىمەن وڭتۇستىك افريكاداعى كولىك-لوگيستيكالىق حاب رەتىندە دامىتۋدىڭ ماڭىزدىلىعىنا توقتالدى.
سوڭىندا زيمبابۆە پرەزيدەنتى قاۋىپسىزدىكتى ساقتاۋ جانە يادرولىق قارۋسىز الەم قۇرۋ جونىندەگى قازاقستاننىڭ حالىقارالىق باستامالارىن قولدايتىنىن ايتتى.
سۆەتلانا عالىمجانقىزى,
«Egemen Qazaqstan»