اۆستراليادا ءوتىپ جاتقان «تۋر داۋن اندەر» كوپكۇندىگىنىڭ ءۇشىنشى كەزەڭى ءوز مارەسىنە جەتتى. ايتۋلى باسەكە 146,2 شاقىرىمدىق قاشىقتىقتى قۇراعان لوبەتال مەن يۋرەيدل ايماقتارى بويىنشا ءوتتى.
بۇل تارتىس «BORA-hansgroht» كلۋبىنىڭ مۇشەسى پەتەر ساگاننىڭ جەڭىسىمەن اياقتالدى. الەمنىڭ ءۇش دۇركىن چەمپيونى, ەۋروپا بىرىنشىلىگىنىڭ جەڭىمپازى دەگەن دارداي اتاعى بار سلوۆاكيانىڭ ساڭلاعى وسى قاشىقتىقتى 3 ساعات 46 مينۋت 06 سەكۋندتا ءجۇرىپ ءوتتى. «استانانىڭ» ساپىندا ونەر كورسەتىپ جۇرگەن يسپاندىق ۆەلوشاباندوز لۋيس لەون سانچەس ەكىنشى ورىندى يەلەنسە, وار-دىڭ وكىلى دەريل يمپي مارەگە ءۇشىنشى بولىپ جەتتى.
ارتتا قالعان ءۇش كەزەڭنىڭ ناتيجەسى بويىنشا جاڭا زەلانديانىڭ سپورتشىسى پاتريك بيۆين ءالى ەشكىمگە جەتكىزبەي كەلەدى. ونىڭ ۋاقىتى – 10 ساعات 20 مينۋت 09 سەكۋند. ەكىنشى ورىندا – پەتەر ساگان. ال كۇللى قازاقستاندىق جانكۇيەرلەر ءۇمىت ارتىپ وتىرعان لۋيس لەون سانچەس ءۇشىنشى ساتىعا تۇراقتادى. ول كوش باسىنداعى ۆەلوشاباندوزدان 9 سەكۋند قالىپ كەلەدى.
عالىم سۇلەيمەن,
«ەگەمەن قازاقستان»