قورعاس شەكارالىق باقىلاۋ وتريادىنىڭ جاۋاپكەرشىلىك اۋماعىندا ورنالاسقان حالىقارالىق شەكارا بويى ىنتىماقتاستىعى ورتالىعىندا شەكارا ناريادى 2019 جىلعى 15 قاڭتاردا شەكارالىق جانە كەدەندىك باقىلاۋدان ءوتىپ بولعان 21 جاستاعى قازاقستاندىق ازاماتتى ۇستادى. بۇل تۋرالى قر ۇقك شەكارا قىزمەتىنىڭ ءباسپاسوز قىزمەتى حابارلادى.
ونىڭ جۇگىنەن شەكاراشىلار ءبىزدىڭ ەلدىڭ اۋماعىنا زاڭسىز ەنگىزبەكشى بولعان 4 قوراپتا, جالپى سالماعى 68,5 كگ تارتاتىن قىتاي ءدارى-دارمەگىن انىقتاعان. ۇستالعان ازاماتتىڭ جۇگى اكتىلەنىپ التىنكول كەدەن بەكەتىنە تاپسىرىلدى. ساراپتاما جۇرگىزىلەتىن بولادى. زاڭسىز جۇكتىڭ يەسى اكىمشىلىك جازاعا تارتىلاتىن بولادى.