مەملەكەت باسشىسى جىل قورىتىندىسى بويىنشا ەلىمىزدىڭ بۇقارالىق اقپارات قۇرالدارى وكىلدەرىمەن كەزدەستى. كەزدەسۋ بارىسىندا جىل بويى بولعان باستى وقيعالارعا توقتالىپ, قورىتىندىلادى.
نۇرسۇلتان نازارباەۆ شاعىن جانە ورتا بيزنەسكە بايلانىستى شارالاردىڭ الداعى ۋاقىتتا دا بەلسەندى جالعاساتىنىن ايتتى.
«وسىدان 7 جىل بۇرىنعى باستاما بۇدان دا ەرتەرەك باستالۋى كەرەك ەدى, بىراق يندۋستريالاندىرۋ ساياساتىن جۇرگىزۋ ءۇشىن قارجى جيناپ الۋ كەرەك بولدى. بارلىعى يندۋستريالاندىرۋ, جاڭا تەحنولوگيا دەپ جاتادى, دەگەنمەن ونى جۇزەگە اسىرۋ تەك مەملەكەتتە اقشا بولعان جاعدايدا عانا مۇمكىن بولادى, تسيفرلاندىرۋ دا, جاساندى ينتەللەكت تە سولاي. سوندىقتان قوردا اقشا جيناپ العان سوڭ ءبىز ونى بىردەن بالامالى ەكىنشى ەكونوميكا قۇرۋعا جۇمسادىق. الدىڭعى جىلعا دەيىن مىڭ كاسىپورىن, ال وسى جىلى ءجۇز كاسىپورىن پايدا بولدى, ولاردىڭ ءبارى بۇگىندە جۇمىس جاساپ جاتىر جانە اراسىندا شاعىن كاسىپورىن دا, ۇلكەن كاسىپورىن دا بار» - دەدى ەلباسى.
سونىمەن قاتار ەندىگى كەزەكتە باسەكەگە قابىلەتتى ساپالى كاسىپورىنداردىڭ سانىن كوبەيتۋ كەرەك ەكەنىن باسا ايتتى.
«بىزگە قىرىق مىڭ ادام جۇمىس جاسايتىن ۇلكەن كومبيناتتاردىڭ قاجەتى جوق. بىزگە ورتا جانە شاعىن كاسىپورىندار كەرەك, ەگەر وندا 50 ادام جۇمىس جاساسا, بۇل – وتە جاقسى نارسە. سوندىقتان ءبىز بۇل جۇمىستى ءارى قاراي بەلسەندى تۇردە جالعاستىرامىز. بىراق جۇمىستىڭ ساپاسى وزگەرەتىن بولادى, بۇرىندا كاسىپورىنداردىڭ نەعۇرلىم كوپ بولعانىن ءجون كورەتىنبىز. ال ەندى بىزدە باسەكەگە قابىلەتتى ءونىم ءوندىرىپ, ەكسپورتتاۋعا جۇمىس جاسايتىن ساپالى كاسىپورىندار بولۋى كەرەك» - دەدى نۇرسۇلتان نازارباەۆ.