ەلباسى نۇرسۇلتان نازارباەۆ جۋرناليستەرگە بەرگەن سۇحباتىندا ەۋرازيالىق ەكونوميكالىق وداق اياسىنداعى ساۋدا-ەكونوميكالىق كورسەتكىشتىڭ جاقسارعانىنا توقتالدى.
«قازاقستاندا 2014 جىلى قۇرىلعان ەۋرازيالىق ەكونوميكالىق وداق بىردەن قيىن جاعدايعا تاپ بولدى. ءدال سول كەزدە داعدارىس شىرقاۋ شەگىنە جەتكەن ەدى. سوعان قاراماستان قازىرگى تاڭدا ەۋرازيالىق ەكونوميكالىق وداققا مۇشە مەملەكەتتەر اراسىنداعى تاۋار اينالىمى 24,5 پايىزعا ءوستى. ارينە, ونىڭ 90 پايىزى قازاقستان مەن رەسەي اراسىنداعى ساۋدا-ساتتىققا تيەسىلى. وداققا مۇشە مەملەكەتتەردىڭ اراسىنداعى تاۋار اينالىمى كوبەيىپ كەلەدى جانە بارىنە ءتيىمدى ەكەنىن كورسەتتى», دەدى ن.نازارباەۆ.
پرەزيدەنت ساۋدا-ەكونوميكالىق كورسەتكىشتىڭ جاقسارۋىنا كەدەندىك وداقتىڭ وڭ ىقپال تيگىزىپ وتىرعانىن اتاپ ءوتىپ, مۇنداي باستامالار كورشى مەملەكەتتەرمەن ءتيىمدى قارىم-قاتىناس ورناتۋعا مۇمكىندىك بەرەتىنىن جەتكىزدى.
«قازاقستان مەن رەسەي اراسىنداعى قارىم-قاتىناس – ارىپتەستىكتىڭ جارقىن ۇلگىسى. مينيسترلىك دەڭگەيدەگى, ۆەدومستۆوارالىق كەزدەسۋلەر ءوتىپ تۇرادى. قازاقستان رەسەيدىڭ 70-كە جۋىق وڭىرىمەن ساۋدا-ساتتىق بايلانىس ورناتقان. ءبىزدىڭ وبلىستارىمىز تىكەلەي رەسەيدىڭ اۋداندارىنا شىعا الادى. وعان قوسا, ەكى ەلگە ورتاق كاسىپورىندار وتە كوپ. كولىك قۇراستىرۋ, اۋىل شارۋاشىلىعى, ەنەرگەتيكالىق سالا بويىنشا ارىپتەستىك نىعايىپ كەلەدى», دەدى ەلباسى.
ن.نازارباەۆتىڭ سوزىنە قاراعاندا, الدا-جالدا ەكى ەل اراسىندا قانداي دا ءبىر ماسەلە تۋىنداسا, ونىڭ وڭ شەشىمىن تابۋدىڭ مۇمكىندىگى بار.
«كورشى مەملەكەتتەردە كەيدە تۇسىنىسپەۋشىلىك بولۋى زاڭدىلىق. ايتسە دە, ونىڭ ءبارى مينيسترلىك, ۆەدومستۆولىق دەڭگەيدە تەز شەشىمىن تابادى. قازىرگى تاڭدا رەسەي دە, قازاقستان دا دوستىق قارىم-قاتىناس ۇستانعان.