شىعىس قازاقستان وبلىسى ءۇرجار اۋدانىنىڭ باقتى ورتا مەكتەبىندە, وسى مەكتەپتىڭ تۇلەگى, «2018 جىل شەكاراشىسى» قۇرمەتتى اتاعىنا يە بولعان لەيتەنانت عيبرات بەرىك ۇلى مۇسىلىممەن كەزدەسۋ ءوتتى, دەپ حابارلايدى شەكارا قىزمەتىنىڭ ءباسپاسوز ورتالىعى.
كەزدەسۋگە وفيتسەردىڭ اتا-اناسى شاقىرىلىپ, ولارعا قازاقستان رەسپۋبليكاسى ۇقك شەكارا قىزمەتىنىڭ ديرەكتورى گەنەرال-مايور دارحان ءدىلمانوۆتىڭ ارنايى جىبەرگەن العىس حاتى تاپسىرىلدى. سونىمەن بىرگە, عيبراتتاي شاكىرت تاربيەلەگەندەرى ءۇشىن بۇكىل ۇستازدار ۇجىمىنا العىس بىلدىرگەن شەكارالىق مەكەمە باسشىسىنىڭ حاتى وسى مەكتەپتىڭ ديرەكتورى ءلاززات تۇسىپقىزى جاعالباەۆاعا تابىس ەتىلدى.
ەستەرىڭىزگە سالا كەتەيىك, 2018 جىلعى 10 قاراشادا «جاعالاۋ كۇزەتى» وڭىرلىك باسقارماسىنىڭ اقتوبە شەكارا وتريادىنا قاراستى «سازدى» شەكارا زاستاۆاسىنىڭ اۋماعىندا زاستاۆا باستىعىنىڭ ورىنباسارى لەيتەنانت ءمۇسىلىم عيبرات بەرىك ۇلى باسقارعان شەكارا ناريادى قارۋلى شەكارا بۇزۋشىنى ۇستاعان بولاتىن.
جاقىن ماڭداعى اۋىلداردىڭ ءبىرىنىڭ تۇرعىنى «سازدى» شەكارا زاستاۆاسىنا تەلەفون شالىپ, مەملەكەتتتىك شەكارا سىزىعىنىڭ ماڭىنان كۇدىكتى ءبىر ادامدى بايقاعاندىعى تۋرالى اقپارات بەرگەن. ايتىلعان جەرگە تەز ارادا شەكارا ناريادى جىبەرىلەدى. بەيتانىس ادام, تەكسەرۋ كەزىندە نارياد باسشىسىنا تۇتقيىلدان پىشاق سىلتەپ, جارالاعان. شەكارا ناريادىنىڭ باسشىسى اۋىر جاراقات العاندىعىنا قاراماستان تابەلدى قارۋىنان شەكارا بۇزۋشىنىڭ ومىرىنە قاۋىپ تونبەيتىندەي ەتىپ وق اتىپ, شابۋىل جاساۋشىنى جارالاپ بارىپ ۇستاعان.