ەرتەڭ «الماتى ارەنا» سپورت كەشەنىندە ەرەجەسىز جەكپە-جەكتەن Titan FC حالىقارالىق تۋرنير وتەدى. وسىعان وراي, بۇگىن ۇلتتىق كىتاپحانادا ايتۋلى جارىسقا قاتىسۋشىلار سالماق ولشەۋ راسىمىنەن ءوتىپ, ودان كەيىن ءباسپاسوز ءماسليحاتى ۇيىمداستىرىلدى.
«Titan FC» – الەمدەگى ەڭ ءىرى پروموۋشەندەردىڭ ءبىرى. ءار جىلدارى وسى ۇيىمدا ونەر كورسەتكەن 74 سپورتشى ۋاقىت وزا UFC-دە كۇش سىناسۋ قۇرمەتىنە يە بولدى. ءبىزدىڭ دە كوزدەگەنىمىز سول. سوندىقتان دا «Titan FC» كلۋبىمەن بىرلەسىپ جۇمىس ىستەۋ ءۇشىن ەكى جىل بويى ەڭبەكتەندىك. اقىرى ورتاق تۋرنير وتكىزۋ جايىندا كەلىسىمگە قول قويدىق. ەرتەڭ بارلىقتارىڭىزدى الاتاۋ باۋرايىندا وتەتىن الاپات ايقاستى تاماشالاۋعا شاقىرامىز. جەكە ءوز باسىم, كەلەشەكتە UFC-دە قازاق جىگىتتەرىنىڭ قاراسى كوبەيەتىنىنە سەنىمدىمىن, – دەيدى «الەم فايتەرس» كلۋبىنىڭ باسشىسى, وسى جارىستى ۇيىمداستىرۋشىلاردىڭ ءبىرى ارداق نازاروۆ.
وسى كەشتىڭ باستى جەكپە-جەگى قازاقتىڭ قايسار ۇلى بەيبىت نازاروۆ پەن امەريكالىق مارتين براۋننىڭ اراسىندا وتەدى. ولار جەڭىل سالماق دارەجەسى (70,2 كيلو) بويىنشا ۋاقىتشا الەم چەمپيونى اتاعى ءۇشىن تالاسادى. تاعى ءبىر ماڭىزدا باسەكەدە قازىبەك ءاشىموۆ پەن كولۋمبيالىق حۋان پۋەرتا كۇش سىناسادى. ولار اسا جەڭىل سالماقتىڭ (57 كيلو) چەمپيوندىق بەلبەۋىن ساراپقا سالادى.
- مەن ءوز قارسىلاسىمدى ابدەن زەرتتەپ الدىم دا, وسى جاۋاپتى كەزدەسۋگە جاقسىلىپ تۇرىپ دايارلاندىم. ەرتەڭ بارلىعىن وزدەرىڭىز دە كورەسىزدەر. چەمپيوندىق بەلبەۋ ءبىزدىڭ ەلدە قالادى, – دەيدى بەيبىت نازاروۆ.
رەيتينگتىك باسەكەلەردە ايبەك نۇرسەيىت, نۇرجان تۇتقاەۆ, رۋسلان قامزاەۆ, سالاۋات بەيسەنحانوۆ جانە سىرىم بەكتۇرسىن سىندى قانداستارىمىز برازيليا, قىرعىزستان, رەسەي, ءازىربايجان جانە قىتاي سپورتشىلارىمەن شەبەرلىك بايقاسادى. ولاردان بولەك, وسى كەشتە گەرمانيا, گوللانديا جانە يامايكانىڭ ورەندەرى ونەر كورسەتەدى.
عالىم سۇلەيمەن,
«ەگەمەن قازاقستان»