قاۋىپسىزدىكتى جەتىلدىرۋ ماقساتىندا الماتى پوليتسەيلەرى زاماناۋي رەجيمدە جۇمىس ىستەيتىن بولادى. جاقىندا قالا پوليتسياسىنىڭ اۆتوپاركى 70 جاڭا اۆتوكولىكپەن تولىقتى.
وتاندىق ءارى گازبەن جۇمىس ىستەيتىن اۆتوكولىكتەردىڭ ارقايسىسى GPS-ناۆيگاتورىمەن جانە ۆيدەو-اۋديو انىقتاعىشتارمەن جابدىقتالعان. وسىنداي مالىمەتتەرمەن بولىسكەن الماتى قالاسى ءىىد باستىعى سەرىك كۇدەباەۆ جول-پاترۋل قىزمەتىنىڭ پلانشەتتەر, توسكەۋدەلىك ۆيدەورەگيستراتورلارمەن قامتاماسىز ەتىلگەندىگىن جەتكىزدى. وزىق تەحنولوگيالىق جەتىستىكتەر قالا پوليتسەيلەرىنە حاتتامالاردى ەلەكتروندى تۇردە تىركەۋگە مۇمكىندىك بەرەدى. ال الداعى جىلدىڭ ءبىرىنشى توقسانىنان باستاپ ايىپپۇلداردى ءتارتىپ بۇزىلعان اۋماقتا بانك كارتاسى ارقىلى بىردەن تولەۋ مۇمكىندىكتەرى قاراستىرىلعان.
قازىرگى كەزدە قالا پوليتسياسىنىڭ اۆتوپاركى كولىكپەن تولىق قامتاماسىز ەتىلگەن. الماتى قالاسىنىڭ اكىمى باۋىرجان بايبەكتىڭ ايتۋىنشا, بۇل ءوز كەزەگىندە پوليتسيا جۇمىسىن بارىنشا جەڭىلدەتەدى ءارى جەدەلدەتەدى. قاۋىپسىزدىك جۇيەسىنىڭ ساندىق جۇيەگە كوشۋى سىبايلاس جەمقورلىقپەن كۇرەسۋگە دە مۇمكىندىك بەرەدى. ال قالادا بەينەباقىلاۋ كامەرالارى سانىنىڭ ارتۋى ايىپپۇل سالۋ ماقساتىندا ەمەس, كولىك قوزعالىسىن تارتىپكە شاقىرىپ, جول-كولىك وقيعالارىن بارىنشا ازايتۋعا باعىتتالىپ وتىر. سوڭعى ءۇش جىل ىشىندە قالا بيۋدجەتىنەن پوليتسيانى جابدىقتاۋعا جەتكىلىكتى قارجى بولىنگەن, سوندىقتان دا قاۋىپسىزدىك ماسەلەسىندە قۇقىق قورعاۋ قىزمەتكەرلەرىنەن بارىنشا جۇمىس تيىمدىلىگى تالاپ ەتىلەدى.
بۇگىندە قالا پوليتسياسى ماتەريالدىق-تەحنيكالىق تۇرعىدان بارىنشا قامتاماسىز ەتىلگەن. سوڭعى ءۇش جىل ىشىندە 468 قىزمەتتىك كولىك الىنسا, «102» قىزمەتى جەتىلدىرىلىپ, وپەراتورلار سانى 2,5 ەسەگە كوبەيگەن. سايكەسىنشە ولاردىڭ جالاقىسى دا 3 ەسەگە ۇلعايىپ وتىر.
ەلۆيرا سەرىكقىزى,
«ەگەمەن قازاقستان»
الماتى