ەكىباستۇز قالاسىندا «اتامۇرا» مادەنيەت ورتالىعىنىڭ ۇيىمداستىرۋىمەن تاۋەلسىزدىك كۇنىنە ارنالعان «تاۋەلسىزدىك – ماڭگىلىك ەل مۇراتى» اتتى رەسپۋبليكالىق اقىندار ايتىسى ءوتتى.
جىر دوداسىنا استانا, قاراعاندى, سەمەي, پاۆلودار, تاراز, ەكىباستۇز جانە باياناۋىل اۋدانىنان 12 اقىن قاتىسىپ, ەل تاۋەلسىزدىگى, رۋحاني جاڭعىرۋ تاقىرىپتارىن تىلگە تيەك ەتتى.
ء«ىس-شارانىڭ نەگىزگى ماقساتى – تاۋەلسىزدىك قۇندىلىقتارى مەن يدەيالارىن ونەر ارقىلى ناسيحاتتاۋ. ءبىز اتالعان اقىندار الامانىن وسىمەن ءۇشىنشى جىل قاتارىنان ۇيىمداستىرىپ كەلەمىز. جىل سايىن ءار ءوڭىردىڭ شايىرلارىن شاقىرىپ شاحتالى شاھاردا باستارىن قوسامىز. ولار دا تىڭعىلىقتى دايىندىقپەن كەلىپ, وركەندەگەن ءوڭىرىمىزدى ولەڭگە قوسىپ, كورەرمەننىڭ كوڭىلىن كوتەرىپ كەتەدى. جىل سايىن وتكىزىپ كەلە جاتقان جىر دوداسىن الداعى ۋاقىتتا دا جالعاستىرا بەرەمىز», دەدى «اتامۇرا» مادەنيەت ورتالىعىنىڭ ديرەكتورى نۇرسۇلۋ ەركەبايقىزى.
قازىلار القاسىنىڭ شەشىمىمەن باس جۇلدەنى راۋان قايداروۆ (ەكىباستۇز), ءبىرىنشى ورىندى ارۋنا كەرىمبەك (تاراز), ەكىنشى ورىندى اسپانبەك شۇعاتاەۆ (باياناۋىل) جانە ءۇشىنشى ورىندى قۋانىشبەك شارمانوۆ (پاۆلودار) يەلەندى. جەڭىمپازدارعا اقشالاي سىيلىقتار مەن ديپلومدار تابىستالدى.
ۇلاربەك نۇرعالىم ۇلى,
«ەگەمەن قازاقستان»