وسىدان بۇرىن ءبىرىنشى ۆيتسە-پرەمەر اسقار مامين اسا ءىرى قازاقستاندىق ءاۆتووندىرۋشى «سارىارقااۆتوپروم» جشس-ءنىڭ Genertec قۇرامىنا كىرەتىن اۆتوموبيلدەر يمپورتى جانە ەكسپورتى بويىنشا قىتايدىڭ سمس (China National Machinery IMP. & EXP. CORP) ترانسۇلتتىق مەملەكەتتىك كومپانياسىنىڭ كاپيتالىنا كىرۋى تۋرالى (اكتسيالاردىڭ 51%) كەلىسسوزدەر جۇرگىزىپ, ينۆەستيتسيالىق كەلىسىمگە قول قويىلعان بولاتىن.
قىتايلىق ءىرى ينۆەستورلار كەلىسىمنىڭ ارتىنشا «سارىارقااۆتوپروم» ماشينا جاساۋ زاۋىتى ورنالاسقان قوستاناي قالاسىنا كەلىپ, ءوندىرىستى ارالاپ كوردى. ودان كەيىن وبلىس اكىمى ارحيمەد مۇحامبەتوۆپەن ەكى جاقتى كەزدەسۋ ءوتتى.
ارحيمەد مۇحامبەتوۆ قىتايلىق ينۆەستورلارعا وبلىس ءوندىرىسى تۋرالى ايتىپ بەردى.
«بيىل بىلتىرعىدان ەداۋىر كوپ ءونىم ءوندىرىلدى. ال 2016 جىلمەن سالىستىرعاندا زاۋىتتان شىعارىلعان ءاۆتوموبيلدىڭ سانى التى ەسە كوپ. الداعى ۋاقىتتا دا قىتايلىق ينۆەسستورلارمەن بىرلەسىپ, ەكسپورت باعىتىنداعى تەحنيكالار وندىرەمىز. ال نەگىزگى ماقسات ماشينا جاساۋ ىسىندە جۇمىستىڭ 50 پروتسەنتىنە دەيىن جەرگىلىكتى جەردە اتقارۋعا قول جەتكىزۋ بولىپ تابىلادى» دەدى ارحيمەد بەگەجان ۇلى.
وبلىس اكىمى مۇنان كەيىن قوناقتارعا قوستاناي قالاسىندا سالىنىپ جاتقان وندىرىستىك ايماقتى تانىستىرىپ ءوتتى. وندا قازىر قۇنى 300 ميلليارد تەڭگە بولاتىن 11 ينۆەستيتسيالىق جوبا جۇزەگە اسىرىلىپ جاتىر. ولاردىڭ اراسىندا قىتايلىق ينۆەستورلاردىڭ قاتىسۋىمەن جۇزەگە اساتىن جوبالار دا بار.
مۇنان كەيىن Genertec (China General Technology Group) كومپانياسى باسقارما توراعاسى لۋ يمين جوبا ەكى ەلدىڭ ەكونوميكاسىنا دا وڭ اسەرى بولاتىنىن جانە «جىبەك جولىنىڭ ەكونوميكالىق بەلدەۋى» باعدارلاماسىنىڭ ماڭىزدى بولىگى بولىپ تابىلاتىنىن ايتتى. لۋ يمين مىرزا ەكى ەلگە ورتاق جوبا شەڭبەرىندە اتقارىلاتىن جۇمىستار مەن ماشينا ءوندىرىسىنىڭ ساپاسى ءۇشىن ينۆەستور تاراپىنان بارلىق مۇمكىندىكتەر, ونىڭ ىشىندە وزىق تەحنولوگيالار ەنگىزىلەتىنىنە ماڭىز بەردى.
ءنازيرا جارىمبەت,
«ەگەمەن قازاقستان»
قوستاناي