«الاش ادەبيەتتانۋى» اتتى كىتابىنىڭ تۇساۋكەسەرى ءوتتى

ايتۋلى شاراعا كەنجەحان ماتىجانوۆ, ءابساتتار دەربىسالى, ءۋاليحان قاليجان, جاڭعارا دادەباي, تەمىرحان تەبەگەنوۆ, جۇماباي شاشتاي ۇلى جانە تاعى باسقا قازاقتىڭ كورنەكتى عالىمدارى مەن جازۋشىلارى قاتىسىپ, ايگۇل ىسىماقوۆانىڭ عىلىم جولىنداعى ىزدەنىسى مەن تالپىنىسى, وسى باعىتتا اتقارعان جۇمىستارى, قايراتكەرلىگى مەن شىعارماشىلىعى جايىندا كەڭىنەن اڭگىمە قوزعادى.

قارىمدى قالامگەر, فيلولوگيا عىلىمدارىنىڭ دوكتورى ءۋاليحان قاليجان ايگۇل مۇحاممەدسەرىكقىزىنىڭ الاش تاقىرىبىنا ۇلكەن دايىندىقپەن كەلىپ, كوپتەگەن قۇندى ەڭبەكتەر جازعانىن تىلگە تيەك ەتسە, شىعىستانۋشى, ءدىنتانۋشى, ادەبيەت زەرتتەۋشىسى, فيلولوگيا عىلىمدارىنىڭ دوكتورى ءابساتتار دەربىسالى ونىڭ كەمەلەنە كەلگەن عالىم ەكەنىن اتاپ ءوتتى.  

مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, قازاقستان جازۋشىلار وداعىنىڭ مۇشەسى ايگۇل ىسىماقوۆا جايىندا ايتار بولساق, ول «الاش ادەبيەتتانۋى», «اسىل ءسوزدىڭ تەورياسى», «تاۋەلسىزدىك جانە الاش عىلىمى», «الاش عىلىمى جانە تاۋەلسىزدىك», «جازعان ءسوز جانىم اشىپ الاشىما...», «قازاق ادەبيەتتانۋىنداعى تاۋەلسىزدىك يدەياسى», «قازىرگى ادەبيەتتانۋدىڭ تەوريالىق ماسەلەلەرى», «قازىرگى ادەبيەت پەن ادەبيەتتى زەرتتەيتىن قاۋىم», «قازاق ادەبيەتتانۋى», «تاۋەلسىزدىك كەزەڭىندەگى ادەبيەتتانۋ» جانە وزگە دە تىلدەردە جازعان بىرنەشە عىلىمي مونوگرافيالاردىڭ اۆتورى, امەريكا بيوگرافيا ينستيتۋتىنىڭ «عىلىم ادامى – 2004» سىيلىعى جانە احمەت بايتۇرسىن ۇلى اتىنداعى «ساڭلاق اۆتور» مەدالىنىڭ يەگەرى.

ادەبيەتتانۋشى ا.ىسىماقوۆانىڭ «الاش ادەبيەتتانۋى» اتتى ەڭبەگى  حح عاسىردىڭ باسىنداعى الاش ادەبيەتى مەن قازاق ادەبيەتتانۋ عىلىمىنىڭ ۇلتتىق كوركەمسوز ونەرىن زەردەلەۋگە ارنالعان. وندا قازاقتىڭ اسىل ءسوزىن قاستەرلەگەن اتا-بابا مۇرالارى قاي كەزدەن باستالعاندىعى, الاش ادەبيەتتانۋ ۇعىمىنىڭ قالاي قالىپتاسقاندىعى جونىندە تۋىندايتىن سانسىز ساۋالدارعا ناقتى جاۋاپتار بەرىلگەن. سونىمەن قاتار, كىتاپتا الاش عالىمدارىنىڭ جالپى عىلىمعا قانداي ۇلەس قوسقاندىعى جانە الاش عىلىمي مۇراسى نەسىمەن قۇندى ەكەندىگى جان-جاقتى تالدانادى.

عالىم سۇلەيمەن,

«ەگەمەن قازاقستان».

الماتى