ەلىمىزدىڭ ءبىلىم بەرۋ ساياساتىن جۇزەگە اسىرۋدا, جاس ۇرپاقتى وقىتۋ مەن تاربيەلەۋ ىسىندە ابىرويمەن ەڭبەك ەتىپ كەلە جاتقان تاريحى تەرەڭ, تاعىلىمى مول ءبىلىمدى ورداسى ءماسىمحان بەيسەباەۆ اتىنداعى تالعار اگروبيزنەس جانە مەنەدجمەنت كوللەدجىنە 100 جىل تولىپ وتىر.
كوللەدجدىڭ ءجۇز جىلدىق مەرەيتويىنا وراي «وتكەنى – تاريح, بۇگىنى – كەمەل, بولاشاعى – جارقىن!» تاقىرىبىندا سالتاناتتى كەش ءوتىپ, ءماسىمحان بەيسەباەۆقا ءمۇسىنى اشىلدى. مەرەيتوي قوناقتارى زاماناۋي جابدىقتالعان كوللەدج اۋديتوريالارىن ارالاپ, بۇگىنگى تىنىس-تىرشىلىگىمەن تانىستى.
سالتاناتتى جيىندا ءسوز العان تالعار اۋدانىنىڭ اكىمى رىسكەلدى ساتباەۆ, الماتى وبلىسىنىڭ ءبىلىم سالاسىنداعى باقىلاۋ دەپارتامەنتىنىڭ باسشىسى سالتانات دوسماتوۆا, الماتى وبلىسى ءبىلىم باسقارماسىنىڭ باسشىسىنىڭ ورىنباسارى گۇلسارا يساعۇلوۆا كوللەدجدىڭ ءبىلىم بەرۋ سالاسىنداعى اتقارىپ جاتقان سۇبەلى ىستەرىنە باعا بەرىپ, كوللەدج ۇستازدارىنا العىس حات تابىس ەتتى.
كوللەدج ديرەكتورى, ەكونوميكا عىلىمدارىنىڭ كانديداتى, پروفەسسور, ۇلتتىق ماشينا جاساۋ جانە كولىك عىلىم اكادەمياسىنىڭ اكادەميگى جاقسىلىق ساتىلعانوۆتىڭ ايتۋىنشا, عاسىرلىق تاريحى بار ءبىلىم ورداسى 1918 جىلى قازان ايىندا ۆەرنىي قالاسىندا كەڭ ءپروفيلدى اگرونومدار دايىندايتىن جەتىسۋ ورتا اۋىلشارۋاشىلىق ۋچيليششەسى بولىپ قۇرىلعان ءارى ەڭ العاش 22 تالىمگەر قابىلدانعان كوللەدج 100 جىلدىق تاريحىندا اۋىل شارۋاشىلىق سالاسىنا وتىز مىڭنان استام ماماندار دايارلاعان. وسى ورايدا ەڭبەك جولى كوللەدج تاريحىمەن تىكەلەي بايلانىستى تۇلعالاردىڭ ەسىمدەرىن ايتا كەتكەن ابزال.
ۇلى وتان سوعىسىنىڭ ارداگەرى, 1933-1936 جىلدارى وسى تەحنيكۋمنىڭ ديرەكتورى, قازاق كسر-ءى مينيسترلەر كەڭەسىنىڭ توراعاسى قىزمەتىن اتقارعان ءماسىمحان بەيسەباەۆتان باستاپ, ۇلى وتان سوعىسىنىڭ ارداگەرى, تاريحشى, تاريح عىلىمدارىنىڭ دوكتورى, ۇعا ۆيتسە-پرەزيدەنتى, 1932-1933 جىلداردا الماتى اۋىلشارۋاشىلىق تەحنيكۋمىنىڭ ديرەكتورى بولعان اقاي نۇسىپبەكوۆ, جەتىسۋ وڭىرىندەگى اۋىلشارۋاشىلىق اۋداندارىنىڭ قالىپتاسۋى مەن دامۋىنا ەلەۋلى ۇلەس قوسقان قوعام قايراتكەرى , وبلىستىق ارداگەرلەر كەڭەسىنىڭ توراعاسى بولعان زامانبەك باتتالحانوۆ, ۇلى وتان سوعىسىنىڭ ارداگەرى, ءىىى دارەجەلى داڭق وردەنىنىڭ يەگەرى احمەت قالدىباەۆ, ۆاسحنيل اكادەميگى, سوتسياليستىك ەڭبەك ەرى قاسىم اسانوۆ, سوتسياليستىك ەڭبەك ەرلەرى: قاپيز ابدىعۇلوۆ, جولسەيىت مولداسانوۆ, ىدىرىس ابدىعۇلوۆ جانە سەرگەي ءبۋرديننىڭ ەسىمى رەسپۋبليكا جۇرتشىلىعىنا تانىمال دەسەك, ىدىرىس سۇلەيمەنوۆ, سىرىم قاسىموۆ, تۇرسىن قالماقباەۆ, بەيبىت ەرۋباەۆ, ۆلاديسلاۆ كۋحارسكي, اندرەي كۋحارسكي, ۆلاديمير گابريليان, مامەد ماحمۋتوۆ, ماريا اندارجانوۆا, الەكساندر ۆولچەك, تاتيانا كرياجەۆا, قارلىعاش سارمانوۆا, گۇلنار قاڭتارباەۆا, ادايبەك توعاباەۆ, ەرعالي ماگرۋپوۆ, نايليا ۇمبەتوۆا, جارىلكاسىم شاكيەۆ, لاۋرا راحمانكۋلوۆا سىندى تۇلعالاردىڭ ەڭبەگى ءوز الدىنا ماقتانىش تۋعىزادى.
تالعار اگروبيزنەس جانە مەنەدجمەنت كوللەدجى ەلىمىزدىڭ ەڭ بايىرعى وقۋ ورنى رەتىندە قازاقستاننىڭ گيننەس رەكوردتار كىتابىنا ەنگەن. اگروونەكاسىپ كەشەنىنە مامانداردى دايىنداۋداعى ۇلەسى ءۇشىن رەسەيدىڭ م.لومونوسوۆ وردەنىمەن ماراپاتتالعان. «نۇر وتان» پارتياسى تاراپىنان قر تەحنيكالىق جانە كاسىپتىك ءبىلىم بەرۋ جۇيەسىنىڭ 70 جىلدىق مەرەيتويىنا وراي «اگرارلى ونەركاسىپ كەشەنىن دامىتۋ» نوميناتسياسىنىڭ جانە «ى.التىنسارين اتىنداعى قر ءبىلىم بەرۋ قىزمەتكەلەرىنىڭ بىرلەستىگى» رەسپۋبليكالىق قوعام ۇيىمىنىڭ 2-ءشى, 2017 جىلدىڭ ءبىلىم بەرۋ كوشباسشىسى اتتى 2-دارەجەلى, «حالىقارالىق ەكولوگيا, ينجەنەريا جانە پەداگوگيكا عىلىم اكادەمياسى» قوعامدىق قورى اتىنان ۇيىمداستىرىلعان ء«بىلىم بەرۋ سالاسىنداعى كوشباسشى -2017» ۇلتتىق سىيلىقتارىنىڭ يەگەرى اتانۋى سالاعا قوسقان كوللەدج ۇجىمىنىڭ زور جەتىستىگى. ال الماتى وبلىستىق «ۇزدىك كاسىپتىك ءبىلىم بەرۋ ۇيىمى» بايقاۋىنداعى III دارەجەلى ديپلومى, «فەرمەر-فەرمەرۋ» باعدارلاماسىن دامىتۋ بويىنشا جوباعا قوسقان ۇلەسى ءۇشىن Winrock International كومپانياسىنىڭ العىس حاتى, بيىلعى جىلى الماتى وبلىسىنىڭ اكىمى اماندىق باتتالوۆتىڭ «اۋىل شارۋاشىلىق ماماندارىن دايارلاۋداعى جەتىستىكتەرى ءۇشىن اۋىلشارۋاشىلىق سالاسىنىڭ ۇزدىك وقۋ ورنى» بويىنشا قۇرمەت گراموتاسىمەن ماراپاتتالۋى جانە تاعى باسقا ماراپاتتارى ۇزدىكسىز ىزدەنىس پەن ەڭبەكتىڭ جەمىسى.
ەلۆيرا سەرىكقىزى,
«ەگەمەن قازاقستان»
الماتى