قازاقستان رەسپۋبليكاسى سىرتقى ىستەر مينيسترلىگىندە مەملەكەتتىك حاتشى گۇلشارا ابدىقالىقوۆانىڭ قاتىسۋىمەن «مەملەكەتتىڭ جانە ازاماتتىق قوعام ينستيتۋتتارىنىڭ قۇقىق قورعاۋ قىزمەتى» اتتى دوڭگەلەك ۇستەل وتىرىسى ءوتتى.
حالىقارالىق ادام قۇقىقتارى كۇنىنە جانە بۇۇ باس اسسامبلەياسىنىڭ ادام قۇقىقتارىنىڭ جالپىعا بىردەي دەكلاراتسياسىنىڭ قابىلدانعانىنا 70 جىل تولۋىنا ارنالعان ءىس-شاراعا جوعارعى سوت توراعاسى ج.اسانوۆ, پرەزيدەنت جانىنداعى ادام قۇقىقتارى جونىندەگى كوميسسيا توراعاسى ق.سۇلتانوۆ, سىرتقى ىستەر ءمينيسترى ق.ءابدىراحمانوۆ, بۇۇ-نىڭ قازاقستانداعى تۇراقتى ۇيلەستىرۋشىسى ن.شيمومۋرا, ەۋروپا وداعىنىڭ قازاقستانداعى وكىلدىگىنىڭ باسشىسى س-و.كارلسسون, ەقىۇ-نىڭ استاناداعى باعدارلامالار كەڭسەسىنىڭ باسشىسى د.سابو, ۇلىبريتانيانىڭ قازاقستانداعى توتەنشە جانە وكىلەتتى ەلشىسى م.گيففورد, مەملەكەتتىك ورگاندار, ازاماتتىق قوعام وكىلدەرى جانە باسقالار قاتىستى.
مەملەكەتتىك حاتشى ءوز قۇتتىقتاۋىندا قازاقستان پرەزيدەنتى نۇرسۇلتان نازارباەۆتىڭ «قۇقىق ۇستەمدىگى – ءبىزدىڭ رەفورمالارىمىزدىڭ تابىستى بولۋىنىڭ نەگىزگى فاكتورى» دەگەن سوزىنە توقتالدى.
– قازاقستاندا ادام قۇقىعىن قورعاۋدىڭ ۇلتتىق جۇيەسى ەلدىڭ قۇقىقتىق دامۋىنىڭ نەگىزگى كورسەتكىشى بولىپ سانالاتىن بەرىك ەكونوميكالىق ىرگەتاسىنا نەگىزدەلگەن جانە ازاماتتاردىڭ ءومىر ساپاسىن ارتتىرۋعا باعىتتالعان, – دەدى گ.ابدىقالىقوۆا.
القالى جيىن بارىسىندا كونستيتۋتسيا جانە قولدانىستاعى زاڭدار ارقىلى كەپىلدىك بەرىلگەن ادام قۇقىعى مەن بوستاندىعىن جۇزەگە اسىرۋ, ادام قۇقىعىن قورعاۋدىڭ ۇلتتىق تەتىكتەرىن جەتىلدىرۋ ماسەلەلەرى بويىنشا پىكىر الماسىلدى.
حالىقارالىق قۇقىق نورمالارىن يمپلەمەنتاتسيالاۋ پروبلەمالارى, قازاقستان رەسپۋبليكاسىندا ادام قۇقىعىن سوتتا جانە سوتتان تىس قورعاۋ ءىسىن جەتىلدىرۋ ماسەلەلەرى تالقىلاندى.
حالىقارالىق جانە ۇلتتىق ساراپشىلار قازاقستاننىڭ قۇقىق قورعاۋ تەتىكتەرى مەن ادام قۇقىعىن قورعاۋدىڭ ۇلتتىق جۇيەسىنە وڭ باعا بەردى.
سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ادام قۇقىعىن قورعاۋ سالاسىندا ءتيىمدى ىنتىماقتاستىق جۇرگىزىپ كەلە جاتقانى ءۇشىن حالىقارالىق ينستيتۋتتارعا جانە قۇقىق قورعاۋشى ۇكىمەتتىك ەمەس ۇيىمدارعا العىس ءبىلدىردى.
جولدىباي بازار,
«ەگەمەن قازاقستان»