حالىقارالىق وليمپيادا كوميتەتى قازاقستاندىق ءۇش سپورتشىعا وليمپيادا مەدالىن تابىستايتىنى تۋرالى بۇگىن ۇلتتىق وليمپيادالىق كوميتەتىنە رەسمي تۇردە حابارلاما جىبەردى. اتاپ ايتار بولساق, زىلتەمىرشى اللا ۆاجەنينا مەن اننا نۇرمۇحامبەتوۆا جانە جەڭىل اتلەت ولگا رىپاكوۆاعا بىرنەشە جىلعا سوزىلعان تەكسەرۋدەن سوڭ مەدالدار قايتارىلادى دەپ حابارلايدى Olympic.kz.
حالىقارالىق وليمپيادا كوميتەتى مەن سپورتتىق اربيتراجدى سوتتىڭ تارتىپتىك كوميسسياسى 2008 جىلى بەيجىڭدە وتكەن جازعى وليمپيادا ويىندارىندا اۋىر اتلەتيكادان 75 كەلى سالماقتا ءبىرىنشى ورىن يەلەنگەن قىتايلىق لەي تساونىڭ سپورتتان شەتتەتىلگەنىن حابارلايدى. سونداي-اق, حالىقارالىق اۋىر اتلەتيكا فەدەراتسياسىنىڭ قايتا تەكسەرۋىنەن سوڭ قازاقستاندىق اللا ۆاجەنينا بەيجىڭ وليمپياداسىنىڭ التىن جۇلدەگەرى دەپ تانىلدى.
سونىمەن قاتار, 2008 جىلعى بەيجىڭ وليمپياداسىندا ءۇش قارعىپ سەكىرۋدەن ءتورتىنشى ورىن يەلەنگەن ولگا رىپاكوۆا سپورتشىلار دوپينگ-سىناماسىن قايتا تەكسەرگەن سوڭ وليمپيادانىڭ كۇمىس جۇلدەگەرى دەپ تانىلدى. حوك پەن CAS تارتىپتىك كوميسسياسى رەسەيلىك تاتيانا لەبەدەۆا مەن گرەكيالىق كريسوپيگي دەۆەتتسيدى سپورتتان شەتتەتتى.
2012 جىلعى لوندون وليمپياداسىندا اۋىر اتلەتيكادان 69 كەلى سالماق دارەجەسىندە 5-ءشى ورىن يەلەنگەن قازاقستاندىق اننا نۇرمۇحامبەتوۆا وليمپيادانىڭ قولا جۇلدەگەرى دەپ تانىلدى. مۇنداي شەشىمگە تارتىپتىك كوميسسيا وليمپيادا ويىندارىندا تيىسىنشە ەكىنشى جانە ءۇشىنشى ورىن يەلەنگەن مارينا شكەرمانكوۆا مەن دزينا سازاناۆەتستى سپورتتان شەتتەتكەن سوڭ قابىلدادى.
وسىلايشا, اللا ۆاجەنينا 2008 جىلعى وليمپيادا ويىندارىنىڭ چەمپيونى, ولگا رىپاكوۆا بەيجىڭ وليمپياداسىنىڭ كۇمىس جۇلدەگەرى جانە اننا نۇرمۇحامبەتوۆا لوندون وليمپياداسىنىڭ قولا جۇلدەگەرى اتاندى.
حوك مەدالدى تابىستاۋ ۋاقىتى مەن ورنىن سپورتشىلاردىڭ وزدەرى تاڭدايتىنىن جەتكىزدى. ەستەرىڭىزدە بولسا, دەنيس ۋلانوۆ ريو وليمپياداسىنىڭ قولا مەدالىن اشحابادتا وتكەن الەم چەمپيوناتىندا قابىل العان بولاتىن.
ايتا كەتەلىك, ۇوك حالىقارالىق قاتىناستار دەپارتامەنتىنىڭ بەلسەندى قىزمەتىنىڭ ارقاسىندا حوك جانە حالىقارالىق فەدەراتسيالارمەن مەدالداردى رەتتەۋ جونىندە جەدەل اقپارات الۋعا مۇمكىندىك بار.